Para raw madaling maintindihan…PH entrepreneurship adviser: Gawing simple ang quarantine protocol

ni Jasmin Joy Evangelista | September 10, 2021

Marami ang nadismaya nang biglang bawiin ang desisyon na ilagay na sa GCQ ang Metro Manila at panatilihin sa MECQ.

Kabilang na rito ang mga may trabaho at negosyo dahil sa pag-aakalang luluwag na ang community quarantine status at makapagbubukas o makapagtatrabaho na nang mas maluwag.

Dapat kasi'y ilalagay na noong Miyerkoles ang Metro Manila sa general community quarantine (GCQ) with alert level system pero binawi ito at pinalawig pa ang modified enhanced community quarantine (MECQ) sa capital region hanggang Setyembre 15.

Dahil dito, ipinanukala ni Presidential Adviser for Entrepreneurship Joey Concepcion sa Inter-Agency Task Force na simplehan na lang ang quarantine restrictions para madaling maintindihan at maipatupad.

"If you can keep it to GCQ 1 and GCQ 2, but if you really have to, then you limit to 3 [alert] levels... huwag muna ilagay 'yong 4," ani Concepcion.

"What will determine [a] restaurant to operate at 20 percent, at 40 percent? So I think let's simplify it," dagdag niya.

Iminungkahi rin ni Concepcion na subukan na ang "bakuna bubble" sa Metro Manila kahit pa palawigin ang MECQ hanggang katapusan ng Setyembre.

Sa ilalim ng "bakuna bubble," bibigyan ng pribilehiyo ang mga bakunadong indibidwal na makapasok sa ilang establisimyento at transportasyon.

Mga ospital, puno na… Sri Lanka, ini-lockdown dahil sa pagtaas ng kaso ng COVID-19

ni Ronalyn Seminiano Reonico | August 21, 2021

Isinailalim sa nationwide lockdown ang Sri Lanka noong Biyernes matapos lumobo ang kaso ng COVID-19 at napupuno na rin ang mga ospital, ayon sa awtoridad.

Pahayag ni Health Minister Keheliya Rambukwella, “Nationwide lockdown in effect from 10 PM today (20/08) to Monday (30/08).

“All essential services will function as normal. I sincerely request all citizens to adhere to the law and #StayHome.”

Ayon sa ulat, noong Miyerkules, umabot sa 3,793 ang naitatalang bagong kaso ng COVID-19 sa isang araw lang at sa kabuuang bilang ay pumalo na sa 372,079 ang Coronavirus cases sa naturang bansa. Nakapagtala rin ang Sri Lanka ng 6,604 bilang ng mga pumanaw.

Nilinaw naman ni Rambukwella na hindi maaapektuhan ng lockdown ang vaccination drive sa Sri Lanka at aniya pa, “It remains the only way we can stem the #COVID19SL spread & protect the population whilst giving the hospitals a chance to recover. The best vaccine is the first vaccine. Don't delay.”

Samantala, sa ilalim ng lockdown, ipinagbabawal ang mga religious at social gatherings at ang operasyon ng mga restaurants, hotels, cinemas, at spas. Bawal ding magsagawa ng mga village fairs at sports festivals.

Taas-presyo ng bilihin, stop! — DILG

ni Lolet Abania | August 12, 2021

Ipinagpaliban muna ng Department of Trade and Industry (DTI) ang napipintong pagtaas ng presyo ng mga pangunahing bilihin para makabawas sa hirap na dinaranas ng mga konsyumer sa gitna ng 2-linggong hard lockdown sa Metro Manila at iba pang mga pamilihan sa bansa.

“Yes, we have postponed any adjustment on SRPs (suggested retail prices), especially during ECQ (enhanced community quarantine),” ayon kay DTI Secretary Ramon Lopez.

Matatandaang noong nakaraang Hunyo, pinayagan ng DTI ang ilang brands ng mga basic goods na magtaas ng kanilang presyo ng P0.25 hanggang P0.75 o tinatayang nasa 3.5% dahil sa pagtaas din ng halaga ng mga raw materials nito.

Inaprubahan ng ahensiya ang taas-presyo sa pangunahing bilihin kabilang ang sardines, canned meat, noodles, gatas at kape, kung saan magiging epektibo ito ngayong Agosto.

Ang pag-apruba sa price increase ay ginawa matapos na i-lift ng DTI ang mahabang buwan na price freeze sa mga pangunahing bilihin noong Hulyo 9.

Gayunman, ang Metro Manila ay isinailalim sa ECQ mula Agosto 6 hanggang 20. Bukod sa National Capital Region (NCR), ang mga lalawigan ng Laguna at Cagayan de Oro at ang Iloilo City ay isinailalim na rin sa pinakamahigpit na quarantine classification. Gayundin, ang Bataan ay nasa ECQ na mula Agosto 8 hanggang 22, dahil ito sa pagtaas ng kaso ng COVID-19 at pagkalat ng Delta variant.

Sa ilalim ng ECQ protocol, ang mga essential trips at essential services gaya ng pagkain at medisina lang ang pinapayagang mag-operate.