1,036 lugar sa bansa, naka-granular lockdown — PNP

ni Jasmin Joy Evangelista | January 31, 2022

Nasa 1,036 lugar sa bansa ang nasa ilalim ng granular lockdown, ayon sa Philippine National Police (PNP).

Sa monitoring bulletin ng PNP, 404 dito ay mino-monitor ng Police Regional Office (PRO) sa Cordillera, 252 sa region 1, 173 sa Calabarzon, at 152 sa Region 2.

Samantala, sa National Capital Region (NCR) na ngayon ay nasa ilalim ng Alert Level 2, mayroong 14 lugar na naka-granular lockdown.

Noong Huwebes, 853 lamang ang mga lugar na nasa ilalim ng granular lockdown sa buong bansa.

Nasa 33 cities at municipalities at 399 barangays ang mayroong ipinapatupad na granular lockdowns.

Karamihan sa mga barangay ay mula sa Region 1, at sinunand ng Cordillera na may 103.

Mayroon namang 1,320 households at 2,512 indibidwal na apektado ng naturang quarantine restriction.

Ang Cordillera ang may pinakamaraming bilang ng households at indibidwal na nasa ilalim ng granular lockdown na may 551 at 1,022.

Ang mga Local government units (LGUs) ang nagdedesisyon kung ipapatupad o ili-lift ang granular lockdown sa isang bahay, compound, street, o building base sa bilang ng reported COVID-19 patients.

Simula ng Alert Level 4... 93K pasaway sa NCR – PNP

ni Lolet Abania | September 24, 2021

Mahigit sa 93,000 pasaway na indibidwal sa ipinatutupad na COVID-19 quarantine restrictions ang nai-record ng Philippine National Police (PNP) simula ng pilot implementation ng Alert Level 4 sa Metro Manila.

Sa Laging Handa briefing, sinabi ni PNP chief Police General Guillermo Eleazar na nasa kabuuang 93,894 violators ang nahuli o nasita ng pulisya mula Setyembre 16 hanggang 23.

Ibig sabihin nito, ayon kay Eleazar nasa average na 11,712 mga indibidwal ang nasisita ng mga pulis kada araw sa mga naturang panahon, mas mababa ito kumpara sa 12,600-per-day average na kanilang naitala noong Agosto.

“There are still a lot. 51% were issued warning. 43% were issued tickets, 6% were brought to police station. But I would say it is generally peaceful,” sabi ni Eleazar.

Sinabi rin ni Eleazar na nasa 220 lugar na ang isinailalim sa granular lockdown sa Metro Manila, batay sa pinakabagong nai-record.

Aniya, ang mga lugar ay matatagpuan sa 82 barangay ng siyam na lungsod/munisipalidad ng nasabing rehiyon.

“This has affected 2,697 households and 8,550 individuals,” ani pa ng PNP chief.

Sa ilalim ng Alert Level 4, ang outdoor o al fresco dining ay pinapayagan ng hanggang 30% ng venue/seating capacity, anumang vaccination status ng mga kustomer.

Pinapayagan din ang indoor dine-in services sa limitadong 10% ng venue/seating capacity subalit para lamang ito sa mga indibidwal na fully vaccinated kontra-COVID-19.

Habang ang curfew ay itinakda ng alas-10:00 ng gabi hanggang alas-4:00 ng madaling-araw.

Apektado ng granular lockdown... Food packs ready na – DSWD

ni Lolet Abania | September 21, 2021

Nakapaghanda na ang Department of Social Welfare and Development (DSWD) ng libu-lubong food packs na ipapamahagi sa mga residente sa Metro Manila na apektado ng granular lockdowns sa gitna ng COVID-19 pandemic.

Ayon kay DSWD Assistant Secretary Glenda Relova, nasa 1,000 food packs ang kanilang inihanda bawat isa sa Caloocan, La Piñas, Parañaque, Pateros, Mandaluyong, Manila, Marikina, Taguig at Valenzuela.

“Later in this week ipe-preposition na rin natin sa ibang cities at sa isang municipality ng NCR (National Capital Region) ‘yung atin pong mga food packs,” ani Relova sa isang interview ngayong Martes.

Sinabi ni Relova na ang apektadong pamilya ay makatatanggap ng tatlong food packs sa isang linggo.

Paliwanag ni Relova, sa ilalim ng guidelines para sa bagong alert level system na isinasagawa na sa Metro Manila, ang DSWD ay magbibigay ng assistance sa mga apektadong pamilya sa ikalawang linggo ng two-week granular lockdown, kung saan ang unang linggo ay sasagutin ng local government unit (LGU).

“In the event na hindi pa rin bumababa ang surge at kinakailangan pa rin ng ayuda, o ma-extend ang granular lockdown, patuloy pa rin na mag-o-augment ang DSWD,” sabi ni Relova.

Ayon pa kay Relova, ang ahensiya ay mayroong P1.3 billion halaga ng food packs “and non-food items” na nakaposisyon na para sa pilot implementation ng alert level system at granular lockdown sa NCR.

“Nagprepara na rin kami ng paghingi ng supplemental budget sa DBM (Department of Budget and Management) para kung sakaling maging nationwide ang implementation nito,” saad ng kalihim.