Walang face mask, ikulong! – P-Duterte

ni Lolet Abania | May 6, 2021

Makikipagpulong ang Department of the Interior and Local Government (DILG) sa Philippine National Police (PNP) at mga local government units (LGUs) kaugnay sa pagpapatupad ng bagong direktiba ni Pangulong Rodrigo Duterte na arestuhin ang sinuman na walang suot na anti-virus masks o face mask kapag nasa pampublikong lugar, ayon kay DILG Usec. Jonathan Malaya.

“We have to talk with the LGUs and the Philippine National Police about the presidential directive and we have to reconcile the presidential directive and the ordinances passed by the LGUs,” ani Malaya.

Dagdag pa niya, “I must emphasize that what is violated here are local ordinances that were issued by the local sanggunian. So we will take a look on how we can implement this directive of the president because this was just given to us last night,” sabi ni Malaya.

Giit ni Malaya, ang mga LGUs ay may iba’t ibang ipinatutupad na mga penalties laban sa sinumang lumabag sa kanilang ordinances lalo na sa pagsusuot ng face mask sa mga pampublikong lugar.

Sa kasalukuyan, ayon kay Malaya, ang pag-aresto ay ginagawa sa mga violators ng ordinansa kung ang indibidwal ay pumalag o hindi sumunod sa mga awtoridad.

“But in light of the President’s pronouncements, we might need to do some recalibration and make necessary preparations because if we do some arrests, we will also need to prepare our detention cells because there might be a larger number of people detained than before,” ani Malaya.

Paliwanag pa ng DILG official, habang nakakulong ang violator sa mga detention cell, maaaring magdulot ito ng panganib sa kanilang kalusugan.

Gayunman, nakikipag-ugnayan na ang ahensiya sa LGUs at PNP upang bumuo ng guidelines upang masiguro ang kaligtasan ng mga kababayan at magkaroon ng tamang implementasyon sa bagong direktiba ng pangulo.

Gayundin, ayon kay Malaya, ang mabubuong guidelines ang magiging batayan para maiwasan ang posibleng pang-aabuso ng pulisya.

Matatandaang nitong Miyerkules ng gabi, ipinag-utos ni Pangulong Duterte sa mga opisyal ng pulis na ikulong at imbestigahan ang sinuman na walang suot na face mask at mga taong hindi tamang nagsusuot nito sa pampublikong lugar.

Ayon kay Pangulong Digong, ang mga face mask ay kinakailangan para matigil na ang pagtaas ng COVID-19 cases sa bansa.

DILG, nagbabala… Pekeng Pfizer COVID vaccine, kalat na

ni Ronalyn Seminiano Reonico | May 1, 2021

Nagbabala ang Department of the Interior and Local Government (DILG) sa publiko at sa mga local government units (LGUs) sa mga pekeng Pfizer COVID-19 vaccine.

Pinaalalahanan ni DILG Secretary Eduardo Año ang lahat ng LGU officials na maging mapanuri matapos maglabas ng babala ang World Health Organization (WHO) na posibleng kalat na sa merkado ang pekeng Pfizer COVID-19 vaccine.

Ayon kay Año, dapat alamin ng mga local executives ang pinagmulan o pinanggalingan ng suplay ng bibilhing bakuna laban sa COVID-19. Dapat din umano na ang lahat ng medical products lalo na ang mga COVID-19 vaccines ay bilhin lamang sa mga awtorisado at lisensiyadong suppliers.

Saad pa ni Año, “While there is no information yet on the presence of the fake vaccines in the country, LGUs should exercise increased diligence as these fake vaccines may be dangerous to the health of those who get inoculated.”

Kamakailan ay naglabas ng global medical alert ang WHO na ang pekeng COVID-19 vaccine ay may product name na “BNT162b2” na nagkukunwaring gawa ng Pfizer BioNTech.

Ayon din sa WHO, unang napag-alaman ang naturang pekeng bakuna sa Mexico.

Kahit pinayagan na… Malls sa Metro Manila, ayaw pang magbukas ng sinehan

ni Lolet Abania | March 6, 2021

Nagdesisyon ang malalaking mall operators na hindi muna buksan ang kanilang mga sinehan kahit na pinayagan na ito ng pamahalaan sa mga lugar na nasa ilalim ng general community quarantine (GCQ) gaya ng Metro Manila, araw ng Biyernes, Marso 5. Anila, hihintayin nila ang approval mula sa mga local governments (LGUs) kung saan sila nag-o-operate.

Matatandaang inisyu ng Department of Trade and Industry (DTI) ang Memorandum Circular No. 21-08, na nagpapahintulot na muling magbukas ang mga sinehan na may 25% venue capacity sa mga lugar na nasa ilalim ng GCQ.

Gayunman, ang pagkain at pag-inom sa loob ng movie houses ay hindi pinapayagan, habang kinakailangang nakasuot ng face mask sa lahat ng oras.

Nagpahayag naman ng pangamba ang mga Metro Manila mayors sa naging desisyon ng COVID-19 task force na payagang muling magbukas ang mga sinehan noong Pebrero 15, sa dahilang mataas ang tiyansa sa mga enclosed spaces ng pagkalat ng virus.

Gayundin, hiniling ng mga alkalde sa Malacañang na iurong ang muling pagbubukas ng mga sinehan sa mga GCQ areas sa Marso.

Kabilang sa mga mall operators na piniling ipagpaliban ang pagbubukas ng kanilang mga sinehan ay ang SM Supermalls na nag-o-operate ng mga SM Cinemas, na susundin nila ang itatakdang seat gaps at capacity.

Ang Ayala Malls, hihintayin ang approval ng kani-kanilang LGUs. Ang Robinsons Malls ay hindi rin nagbukas ngayong Biyernes. Maging ang pamunuan ng Araneta City ay nagsabing hihintayin nila ang guidelines at approval ng lokal na pamahalaan ng Quezon City.

“We will follow DOH-IATF (Department of Health-Inter-Agency Task Force) guidelines and final LGU approval for cinema operations,” ayon sa mga mall operators. “But we have already put in place a safety protocol inside our cinemas in preparation for our reopening,” dagdag pa nila.