Candy Pangilinan: A selfless mother

ni Crystal Jhen Samson (OJT) @Life & Style | Mar. 28, 2025

Candy Pangilinan-National Womens Month

Kung kagitingan din lang ang pag-uusapan, hindi maipagkakailang kaya itong gawin ng mga ina ng tahanan. Bilang patunay, may mga katangiang taglay ang kababaihang tulad nila na maipagmamalaki natin gaya ng hindi madaling sumuko, pagiging matatag, mapagmahal at handang lumaban para sa pamilya at sa bansa.

Hindi ba’t marami na ring naitala sa ating kasaysayan ng mga babaeng bayani sa katauhan nina Melchora Aquino, Gabriela Silang at Gregoria de Jesus? Sila ang mga nagbuwis ng buhay at itinuturing na mga ina ng ating bayan.

Sa kasalukuyang panahon, may mga ganitong klase pa rin ng mga ina. Ang mga tulad nila ay may kakayanang gawin ang lahat para itaguyod ang kanilang pamilya sa kabila ng mga hamon sa kanilang buhay, strong-willed ‘ika nga. Isa na rito si Candy Pangilinan na kilalang movie and television actress at comedian simula pa noong 1990.

Umusbong ang kanyang career sa mga mini-series gaya ng ‘For the Love’ (2023), ‘Ang Probinsyano’ (2012), ‘Miracle in Cell No. 7’ (2019), at ang kamakailan lang ipinalabas na Sunny (2024). Bukod sa pagiging mahusay na aktres siya rin ay isang business owner.

Sa kabila ng mga sunud-sunod na mga project sa showbiz na kanyang natatanggap, hindi maitatanggi na nasubok din ang kanyang katatagan kung saan naranasan ni Candy ang napakabigat na hamon sa kanyang buhay. Taong 2003 nang isinilang niya ang nag-iisa anak na si Quentin Alvarado na mayroong ADHD o Attention Deficit Hyperactivity Disorder at may Autistic Spectrum Disorders (Autism).

Kuwento ni Candy, una niyang napansin ang tila sintomas o kondisyon ng kanyang anak nang minsang marinig na hindi pa developed ang pagsasalita nito, hindi rin kayang makipag-eye contact at pagkahumaling sa mga bilog na bagay.

Nang dalhin ni Candy sa isang ispesyalista si Quentin ay doon niya natuklasan ang kalagayan ng anak na may Autism. Bilang optimistic mom at single mother na rin dahil sa hiwalay na sila ng kanyang asawa, hindi nawalan ng pag-asa si Candy, sa halip ay mas tinatagan niya ang sarili para sa kanilang dalawa ng mahal na anak at pamilya.

Doble-kayod ang ginagawa ni Candy at todo-raket din sa mga shows habang nagbebenta ng mga bags para may pang-therapy at gamutan ni Quentin kasi para sa kanya kailangang unahin at dapat maibigay niya ang lahat ng pangangailangan ng anak.

Hindi madali kay Candy ang magpalaki ng anak na katulad ni Quentin, kailangan ng may malawak na pang-unawa, 100% na pag-aalaga, matinding pagsasakripisyo at lubos na pagmamahal.

At dahil din sa suporta sa kanya ng kanyang ina, kapatid at mga kaibigan, dito humuhugot ng lakas si Candy upang magpatuloy sa laban at mabuhay nang masaya kasama ang anak. Labis din ang pasasalamat ni Candy sa Diyos dahil sa ibinigay sa kanyang munting anghel at hindi sila pinababayaang mag-ina.

Gaya ni Candy Pangilinan, ina na may malaking puso at handang gawin ang lahat para mapabuti ang kalagayan ng anak, gayundin sa iba pang mga ina, isang pagsaludo sa inyong lahat!

Kasabay ng pagdiriwang ng Women’s Month, binibigyang pugay natin ang kagitingan ng mga ina at kababaihan sa iba’t ibang dako ng bansa, at kinikilala rin natin ang kanilang katatagan at pagsasakripisyo na handang ialay ang mga sarili maitaguyod lamang ang pamilya.

Kara David: Protektor ng katotohanan

ni Shine Hubilla (OJT) @Life & Style | Mar. 24, 2025

Sa mundo ng pamamahayag, hindi biro ang tumayo sa gitna ng peligro, lalo na kung ang mga kuwentong nais mong ihayag ay binabalewala ng lipunan. Pero para kay Kara David, walang puwang ang takot pagdating sa paghahanap ng katotohanan.

Si Kara Patria Constantino David-Cancio o mas kilala bilang Kara David ay lumaki sa Maynila, na bata pa lamang ay nahubog na sa mundo ng media at serbisyo-publiko. Siya ang bunso sa apat na magkakapatid.

Ang kanyang ama, na si Professor Randy David ay isang batikang sociologist, journalist at public intellectual, habang ang kanyang ina naman ay si Karina Constantino-David, isang kilalang civic leader at dating chairperson ng Civil Service Commission.

Sa halos tatlong dekada niya bilang isang journalist, dokumentarista at propesor, si Kara ay hindi lang simpleng tagapaghatid ng balita, isa siyang tunay na tagapagtanggol ng mga inaapi.

Sa bawat kuwentong kanyang inilahad, bitbit niya ang tinig ng mga nasa laylayan, mga buhay na hindi madalas nabibigyang pansin, mga pangarap na nais magtagumpay at mga pamilyang patuloy na lumalaban para sa mas magandang kinabukasan.

Sa kanyang mga dokumentaryo, hindi lang siya tagapag-ulat kundi katuwang ng mga taong kanyang nakikilala. Isa sa kanyang pinakatanyag na gawa ay ang ‘Ambulansiyang de Paa (2009)’, na tumalakay sa kakulangan ng serbisyong pangkalusugan sa Oriental Mindoro.

Ipinakita rito kung paano kailangang maglakad nang ilang oras ang mga pasyente para makarating sa pinakamalapit na ospital, isang realidad na hindi dapat ipagsawalang-bahala. Dahil sa kanyang matapang na pagsasaliksik, hinirang siya at nagwagi ng George Foster Peabody Award, isang prestihiyosong parangal sa larangan ng journalism.

Hindi lang iyon, sa iba niyang dokumentaryo tulad ng ‘Gamu-gamo sa Dilim’, ‘Buto’t Balat’ at ‘Selda Inosente’, mas lalo niyang pinatingkad ang mga nararanasang suliranin ng mga Pilipino sa malalayong lugar, ang malnutrisyon, kahirapan at kawalan ng access sa edukasyon.

Pero para kay Kara, hindi sapat ang pagsisiwalat ng katotohanan, kailangan ito ng aksyon. Kaya noong 2002, itinatag niya ang Project Malasakit, isang foundation na nagbibigay ng scholarship sa mga kabataang gustong makapag-aral ngunit walang kakayahang tustusan ang kanilang edukasyon.

Sa loob ng mahigit dalawang dekada, daan-daang kabataan na ang natulungan ng proyektong ito, marami sa kanila ngayon ay matagumpay na sa kani-kanilang larangan. Bukod sa pagiging isang journalist, isa rin siyang propesor sa Unibersidad ng Pilipinas, kung saan ibinabahagi niya ang kanyang kaalaman at prinsipyo o papanaw sa mga susunod na henerasyon ng mga mamamahayag. Masasabi rin natin na isa siyang mapagmahal na ina sa kanyang anak na si Julia, isang lector at commentator sa simbahan at isang triathlete.

Sa kabila ng kanyang abalang iskedyul, sinisigurado niyang nabibigyan ng sapat na oras ang kanyang pamilya at personal na interes gaya ng sports at ang kanyang faith. Sa panahon ngayon, kung saan patuloy na hinahamon ang kakayahan ng kababaihan, si Kara David ay isang patunay na hindi lamang tapang ang kailangan, dapat may taglay na talino, malasakit, at paninindigan. Hindi siya umuurong sa mga mapanganib na kuwento, hindi siya natatakot sa mga hadlang at higit sa lahat, hindi niya isinuko ang kanyang misyon. At sa pamamagitan ng kanyang propesyon, ipinapakita niyang hindi kailangan ng mataas na kapangyarihan para maging isang bayani ng ating bayan at protektor o tagapagligtas ng katotohanan.

Bilang pagdiriwang ngayong Women’s Month, kaisa tayong nagbibigay pugay sa lahat ng kababaihan sa buong mundo!

Jennica Garcia, best role ang pagiging supermom

ni Marish Rivera (OJT) @Life & Style | Mar. 18, 2025

What makes a superhero?

Marami sa atin ang lumaki na bilib na bilib sa mga superhero. Halos ilan nga sa gamit natin ay kailangang sila pa ang disenyo.

Pero bakit? Ano nga bang meron sa kanila na hinahangaan natin kahit na fictional lamang sila?

Unang-una siguro ang katapangan at katatagan nila. ‘Yung literal na kung sinong humarang-harang ay sasamain.

Malaki rin ang malasakit ng mga superhero sa kanilang kapwa, selfless kumbaga.

Maaasahan ang kanilang katapatan at may integridad. Higit dito, nagsisilbi silang inspirasyon sa iba.

Hindi man natin aminin, hindi ba’t naglalagay din tayo ng kapa sa likod nu’ng mga bata pa?

Pero, hindi lamang sa aspetong ito sila nagiging inspirasyon, naeengganyo nila ang marami na ipalaganap ang kabutihan at gawin kung ano ang tama at nararapat.

Kung ito ang qualities ng isang superhero, saan naman tayo makakakita niyan in real life? May kilala ako, pero paalala lang na sa tunay na buhay, may mga superheroes na hindi kinakailangang magsuot ng kapa o lumunok ng bato.

Isa si Jennica Garcia sa kilalang mahusay na artista sa mundo ng showbiz. Ang career na meron siya ngayon, talagang pinaghirapan niya kahit na ang kanyang ina ay ang nag-iisang Jean Garcia.

Sa likod ng camera, ginagampanan niya ang napakahalaga at napakabigat na papel sa buhay, ang pagiging single mom sa kanyang dalawang prinsesa.

2021 nang mahiwalay sina Jennica at tatay ng mga anak niya na si Alwyn Uytingco. Kalaunan, nagdesisyon ang dalawa na magpa-annul ng kanilang marriage. Pero, nilinaw ni Jennica na in “good terms” pa rin sila ng estranged husband sa dahilang nag-uusap naman sila as they’re co-parenting sa mga anak.

Hindi naging madali sa mga bata na maintindihan ang kanilang sitwasyon, pero para kay Jennica, forgiveness is the key.

Kailangan niyang patawarin ang ama ng mga anak para maunawaan ng mga itong kahit hindi sila magkasama sa iisang bahay, magkaibigan at okay ang relasyon nila.

Saan kaya nanggagaling ang ganitong pananaw ni Jennica?

Mula rin sa isang broken family ang aktres. Bata pa lamang siya nang maghiwalay ang kanyang parents. Laking pasalamat lang ni Jennica sa kanyang tatay na si Jigo Garcia dahil sa effort nitong mapalapit siya sa mga half siblings, gayundin sa kanyang ina na never nagsalita ng masama tungkol sa kanyang ama.

Malaking adjustments ang ginawa ni Jennica at mga anak matapos ang kanilang hiwalayan ni Alwyn. Mula sa isang two-bedroom home ay lumipat sila sa isang studio-type condo unit.

Simula noon, itinaguyod na ni Jennica ang dalawang anak, at ngako siya sa sariling gagawin niya ang lahat maibigay lang kung ano ang deserve at pangangailangan nila.

Nakakatuwang makita ang “small wins” na ibinahagi ni Jennica sa social media. Matatandaang, naging emosyonal pa ang aktres nang i-share ang pagbili niya ng aircon at water heater para sa kanilang bahay.

Nito lang nakaraan ay nai-share rin niya sa isang interview ang kanilang “major milestone” mag-iina. Mula sa studio-type condo unit na nilipatan nila ay naka-two bedroom unit na sila at may hagdan pa, na kuwento ni Jennica, gusto ng kanyang mga anak na may stairs ang kanilang tirahan.

Talagang Nanay Jennica will always get what’s best for her daughters at masaya siyang ibigay ang mga bagay gaano man ito kamahal dahil para sa kanya worth it ang lahat ng kanyang pagsisikap.

Hindi rin dito natatapos ang “small wins” in life ni Jennica, very thankful siya dahil lumalaking mabuti at responsable ang mga anak, at malaking tulong ito lalo’t single parent siya.

Ang greatest reward para sa kanya, ang makita silang lumaking thoughtful at mapagmahal. Very grateful din si Jennica sa Diyos na binigyan siya ng dalawang anak, kaya pangako niya sa mga ito na silang mag-iina ay bestfriends for life.

Kanino pa ba magmamana ang mga bata? Siyempre kay Nanay Jennica!

Pinatunayan din ni Jennica na hands-on siya sa mga anak habang working naman sa showbiz. Puspusan ang pagtatrabaho ng aktres all because and for her kids. Pero isang araw, na-realize na lang ni Jennica na kung para sa kanyang mga anak ang mga ginagawa, bakit nawawalan siya ng panahon para makasama sila?

Wakeup call sa kanya nang minsang matanong ng anak kung bakit parang hindi na siya umuuwi ng bahay. As expected, naglaan siya ng oras para maka-bond sila at gawin ang mga bagay na nag-e-enjoy silang tatlo gaya ng crafting na namana ng kids niya sa kanya.

Payo ni Jennica sa kapwa niya working moms na mas mahalaga ang memories kaysa sa pera, dahil sabi niya ang pera ay puwede i-earn pero ang memories kapag lumipas na, lumipas na. Hirit niya sa mga mommy, take it “day at a time”.

Wait, there’s more! Kahit full-time mom si Jennica, self-care is a must pa rin sa kanya. Taray, multitasking at its finest!

Para sa aktres ang mga single parents deserve din ang ‘me’ time. Aniya, “You really can’t pour from an empty cup. I learned this the hard way, but I’d like to think that I’m doing much better now.”

Bilang parte ng kanyang self-care journey, alam n’yo bang si Jennica ay nagtapos din sa esthetician school?

Pero, hindi lamang siya ang nag-benefit dito, kuwento niya, “’Yung mga bata talaga, what they see you doing, they’d be so inclined to do as well. Because my child sees me doing, putting on so many skincare, not just on my face but also on my body, she’s very curious and my nine-year-old started putting sunscreen every day.”

Advice niya sa mga katulad niya, “To all single parents, our future can be bright. I hope you know that a failure in a relationship, married or otherwise, can also lead to a bright future.”

Isa si Jennica sa mga single moms na nagpapatunay na hindi kailangan ng superpowers para maging superhero. Hindi rin sa komiks lang at palabas sila matatagpuan, kundi maging sa ating mga tahanan. Life didn’t end when you became a solo parent to your children.

Ngayong National Women’s Month, ipagdiwang natin ang kabutihan at kagandahan ng sarili at kapwa babae. Remember, “empowered women, empower the world!”