ni Mabel G. Vieron @Life & Style | June 28, 2023
Laganap na naman ngayon ang kaso ng dengue dahil sa madalas na pag-uulan kung saan dumarami rin ang itlog ng lamok na may dalang virus.
ANO NGA BA ANG DENGUE AT SAAN ITO NAGMUMULA? HALINA’T SABAY-SABAY NATIN ITONG ALAMIN.
Ang dengue fever ay isang mapanganib na sakit na dulot ng mga infected na lamok na kung tawagin ay Aedes aegypti. May mga kaso ng dengue na asymptomatic o walang anumang sintomas na pinapakita. Ngunit kadalasan, ang pinakakaraniwang dengue symptoms ay mataas na lagnat, rashes, at pananakit ng kasu-kasuan.
Itinuturing na “endemic” ang sakit na ito, dahil halos taun-taon ay may napapabalitang dengue outbreak sa bansa. Bagama’t karamihan sa mga pasyente ay gumagaling nang walang malubhang komplikasyon, mayroong namang mas matinding uri ng dengue na kung tawagin ay dengue shock syndrome (DSS) o dengue hemorrhagic fever (DHF) na maaaring ikamatay ng mga tinatamaan nito.
Hanggang ngayon ay wala pa ring natutuklasang lunas sa sakit na ito, ngunit maaari natin itong maiwasan sa pamamagitan ng wastong pag-iingat at kalinisan sa bahay.
Narito ang ilang sa mga tips upang mapigilan ang pamumugad ng mga lamok sa ating mga kabahayan para maprotektahan ang ating mga mahal sa buhay.
TAKPAN AT LAGING LINISIN ANG MGA NAKAIMBAK NA TUBIG. Marapat nating siguraduhing nakatakip ang mga ito upang ‘di pamahayan at ‘di pangitlugan ng mga lamok.
PANATILIHIN ANG KALINISAN SA BAHAY. Iwasan ang pagsampay ng mga nakatiwangwang na damit at lalung-lalo na ang nakatambak na mga basura gaya ng mga lumang gulong at mga container na maaaring pamahayan ng mga lamok.
GUMAMIT NG MOSQUITO NET. Isa ito sa paraan upang ‘di tayo makagat ng lamok habang natutulog, siguraduhin lamang na wala itong butas na maaaring pasukan ng mga mapaminsalang lamok.
GUMAMIT NG MGA INSECTICIDES. Mabisa ito laban sa mga lamok ngunit siguraduhing ligtas itong gamitin sa loob ng bahay lalo na kung may mga bata sa inyong bahay.
AYUSIN ANG PAGTAPON SA BASURAHAN. Mas mainam na gumamit ng mga basurang may takip at laging ilabas ang inyong mga basura. Malaki rin ang naitutulong ng wastong paghihiwalay ng basura.
GUMAMIT NG MOSQUITO REPELLANT. Makakatulong ito lalo na kung tag-ulan, ngunit ‘wag basta-basta bumili sa mga palengke ng kung anu-anong repellant, okie? Mas maiging magtanong pa rin tayo sa mga doktor bago natin ito gamitin lalo na sa mga chikiting.
ANO ANG SINTOMAS NG DENGUE?
Lagnat na inaabot ng tatlo hanggang pitong araw
Pananakit ng katawan at kalamnan
Pagdurugo ng ilong at gilagid
Rashes
Pagsusuka
Pagkahilo
Kawalan ng gana kumain
Pantal na maihahalintulad sa tigdas
PAANO ALAGAAN ANG TAONG MAY DENGUE?
Sa katunayan ay walang dengue treatment. Kaya importanteng alaga natin ang ating mga katawan upang ‘di tayo dapuan ng anumang sakit. Narito ang mga maaaring gawin upang maagapan ang sintomas ng dengue:
I-MONITOR ANG LAGNAT
Iwasang tumaas ang lagnat ng higit 39 degrees Celsius ang temperatura ng katawan
Painumin ng paracetamol kada anim na oras.
Huwag hayaang ma-dehydrate ang pasyente lalo a’t kung ito ay patuloy sa kanyang pagsusuka.
Pakainin ang pasyente ng masustansiyang mga pagkain.
Bumalik na sa normal ang blood pressure, heart beat at breathing rate.
PAANO MALALAMAN KUNG IKAW AY WALA NG DENGUE?
Bumalik na sa normal ang blood pressure, heart beat at breathing rate.
Normal na ang body temperature.
Wala ng pagdurugo sa ilong o gilagid.
Mayroon na muling gana sa pagkain.
Natigil na ang pagsusuka.
Maayos at regular na muli ang pag-ihi.
Ito ay hindi nakakahawa, ngunit pakakatandaan na ang isang lamok ay maaaring ma-infect matapos makakagat ng isang taong may dengue. Kaya kung tutuusin, maaari pa rin itong lumaganap.
Makabubuting alamin ang mga dengue symptoms upang maagapan ito. ‘Ika nga nila, “prevention is always better than cure.” Kumonsulta muna sa doktor bago uminom ng anumang uri ng gamot gaya ng vitamins at mga creams. Kung pansin niyong lalo itong lumalala, pumunta na agad sa pinakamalapit na ospital. Okie?