Online kasalan, ‘di na praktikal, pagmumulan pa ng kalokohan

ni Leonida Bonifacio Sison - @Boses | February 15, 2021

Dahil sa pandemya, natutunan nating marami palang bagay ang puwede nating gawin online.

Mula sa pag-aaral ng mga estudyante, pagtatrabaho, konsultasyon sa mga doktor, gayundin ang mga miting at gathering ay kadalasang online na rin. Ngunit paano kung ang kasalan ay gawin na ring online?

Kaugnay nito, pinalagan ng Catholic Bishops Conference of the Philippines (CBCP) ang panukala sa Kongreso na gawing legal ang ‘virtual nuptials’ o pagpapakasal sa pamamagitan ng internet ngayong magkakahiwalay ang mga magkasintahan dahil sa pandemya.

Layon ng House Bill No. 7042 na amyendahan ang Family Code para kilalanin na legal o may bisa sa batas ang virtual weddings.

Ito ay sa kabila ng pagtala Philippine Statistics Autho­rity (PSA) ng pinakamababang porsiyento ng mga nagpakasal noong 2020 kung saan base sa datos, 50% ang ibinaba ng bilang ng mga nagpapakasal kumpara sa 2010 survey.

Samantala, pangamba ng simbahan, posibleng dumami ang mga pekeng kasal dahil sa pagsasamantala ng mga manloloko. Gayundin, hindi umano sapat ang restriksiyon sa mga simbahan dahil sa mga protocols ng pamahalaan para magpasa ng naturang batas.

Sa totoo lang, may punto naman ang simbahan, kaya siguro, kailangang pag-aralan nang mabuti kung dapat ba talagang magpasa ng ganitong panukala.

Baka ang ending kasi, maging wa’ ‘wenta ang panukala sa oras na maging normal na ang sitwasyon sa bansa.

Panawagan sa mga kinauukualan, ‘wag lang ang kasalukuyang sitwasyon ang inyong ikonsidera dahil mahalaga ring tingnan ang magiging epekto nito sa susunod na mga taon.

Totoo na marami pang mga kailangan pag-aralan at silipin, kaya ‘wag nating madaliin ang mga ganitong bagay para maiwasan din ang laban-bawi na mga panukala.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Panibagong pagluluwag sa GCQ areas, ‘wag sanang mauwi sa hawaan

ni Leonida Bonifacio Sison - @Boses | February 14, 2021

Dahil hindi umano tumataas ang “attack rate” ng COVID-19, pinayagan na ang mas maluwag na patakaran sa general community quarantine (GCQ) areas sa ilang industriya.

Inaprubahan ng Inter-Agency Task Force on Emerging Infectious Diseases (IATF) mula sa kasalukuyang 30% ay itataas sa 50% ang capacity sa religious gatherings sa mga lugar na nasa GCQ.

Gayundin, pinayagan ang ilang industriya o aktibidad na magbukas o dagdagan pa ang kapasidad, pero kailangan nilang sundin ang ilalabas na patakaran ng Department of Health (DOH) at lokal na pamahalaan. Kabilang sa mga magbubukas ang driving school, traditional cinemas, video and interactive game arcades, libraries, archives, museum at cultural center, meeting, incentives conferences and exhibitions, limited social events, accredited establishments ng Department of Tourism, at tourist attractions tulad ng park, theme park, natural sites at historical landmarks.

Bukod sa Metro Manila, nasa ilalim din ng GCQ ang Cordillera Administrative Region (CAR), Batangas, Tacloban City, Davao City, Davao del Norte, Lanao del Sur at Iligan City.

Ikinatuwa naman ng ilang sektor ang pagluluwag ng patakaran dahil senyales ito ng unti-unting paggalaw ng ekonomiya sa bansa. Gayundin, malaking tulong ito sa iba nating kababayan dahil balik-trabaho na rin sila, ibig sabihin, may pagkakakitaan na rin kahit papaano.

‘Yun nga lang, kailangan nating matiyak na masusunod ang mga umiiral na health protocols sa lahat ng oras.

Baka kasi ang mangyari, maging kumpiyansa tayo na porke mababa ang attack rate ay wala nang hawaan, pero ang ending, baka biglang taas pala ang COVID-19 cases.

Pero siyempre, hindi lang ang mga industriyang magbabalik-operasyon ang dapat sumunod sa health protocols kundi pati tayong mamamayan.

‘Ika nga, kusa na tayong sumunod at ‘wag nang magpasaway. Ang pagluluwag na ito ay hindi para umasta tayong normal na ang lahat kundi para makatulong sa ekonomiya.

Sa panahon ng pandemya, higit nating kailangan ang kooperasyon ng bawat isa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Colorum “pasabay service” pa-probinsiya, ‘di titigil hangga’t kaunti ang provincial bus

ni Leonida Bonifacio Sison - @Boses | February 13, 2021

Dahil nananatiling limitado ang mga bus na may biyaheng pa-probinsiya, marami tayong kababayan ang hirap humanap ng masasakyan.

Ang siste, kani-kanyang diskarte para makarating sa pupuntahan. Halimbawa ng mga pasaherong papuntang Tarlac, napipilitang bumaba sa bayan ng Dau sa Pampanga at doon maghahanap ng ibang masasakyan dahil Pampanga na lang ang natirang probinsiya na may biyahe sa Araneta City Bus Station sa Quezon City, na kilala sa malayong ruta sa southern Luzon at Visayas.

Ang iba naman, sa social media naghahanap ng masasakyan mula sa mga colorum, habang ang iba, may alok pang sasagutin na rin ang travel documents ng biyahero.

Gayunman, depende sa layo ang presyo, pero mas mahal ito kaysa sa pagsakay ng bus at sa labas ng bus station at paligid ng isang mall ang meet-up location, bagay na ikinabahala naman ng manager ng bus station.

Aniya, ginagamit pa umano ang istasyon para gawing pick-up point kaya sa halip na tumuloy ang pashero, nahahatak ng mga ito.

Gayunman, habang tuluy-tuloy ang panghuhuli sa mga colorum na sasakyan, umapela ang Provincial Bus Operators of the Philippines (PBOAP) na payagan silang magbukas ng linya at kasabay nito ang pangako na susunod sila sa health protocols.

Matatandaang higit kalahati pa lang ang ruta ng mga provincial bus na nakakabiyahe ngayon kumpara noong bago ang lockdown noong Marso, 2020.

Pinaplano ng Land Transportation Franchising and Regulatory Board (LTFRB) kung paano mapabibilis ang proseso ng pagbubukas ng linya, pero nakasalalay pa rin umano sa LGU ang pagtanggap ng mga provincial bus mula sa Kamaynilaan.

Kung tutuusin, no choice lang naman ang mga tumatangkilik ng pasabay services na ito, kaya pakiusap natin sa mga kinauukulan, pakibilis-bilisan ang paghanap ng solusyon. Mahirap kasi ‘yung puro tayo pagbabawal at panghuhuli pero wala naman tayong ginagawang paraan para matigil ang ganitong gawain.

Ang ending niyan, mamamayan ang gagawa ng paraan para makabiyahe kahit alam nilang bawal.

Kung gusto nating maisaayos ang ganitong bagay, pag-aralang mabuti kung ano ang mga dapat at hindi dapat ipatupad. Gayundin, panawagan sa mga lokal na pamahalaan, makiisa tayo at magkaroon ng konsiderasyon para sa ating mga kababayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com