Taas-singil sa ATM fees, ‘di napapanahon!

ni Leonida Bonifacio Sison - @Boses | February 18, 2021

Marami pa ring Pinoy ang patuloy na naghihikahos sa gitna ng pandemya.

Ito ay dahil karamihan sa kanila ay nawalan ng hanapbuhay dahil hindi kinaya ng kumpanya ang pagkalugi at ang iba na bagama’t may trabaho, bawas naman ang sahod.

Sa kabila ng lahat ng ito, ipatutupad ang taas-singil sa mga transaksiyon sa automated teller machine (ATM), bagay na inalmahan ng ordinaryong mamamayan at ilang mambabatas.

Kasabay nito ang panawagan na ipagpaliban muna ang pagtaas ng mga bangko sa interbank charges dahil magiging pabigat ito sa mga konsumer na hirap pa ring makabangon.

Sa ngayon, inaasahang ipatutupad ang pagtaas ng interbank ATM transaction fees sa Abril 7, kung saan nasa P10 hanggang P18 na ang singil kada withdrawal transaction, habang ang balance inquiry naman ay P1.50 hanggang P2 na, kung ang terminal ay hindi sa iyong bangko.

Ngunit paliwanag ng Bangko Sentral ng Pilipinas (BSP), ito ay pinag-aralan at nagkaroon ng konsultasyon, kaya nakakuha ng approval ang mga bangko hinggil sa dagdag-singil, bagay na kailangan upang mapalakas pa ang banking system ng bansa.

Kung tutuusin, barya lang ito para sa iba, pero napakalaking bagay para sa ordinaryong mamamayan.

Bagama’t nais nating palakasin ang banking system ng bansa, paano naman ang ating mga kababayan? Kakarampot na lang ang kinikita, papatawan pa natin ng dagdag-singil.

Hindi natin maitatangging hanggang ngayon ay napakarami nating kababayang hirap na hirap makaraos sa araw-araw, kaya panawagan sa mga kinauukulan, galaw-galaw ho para maipagpaliban ang taas-singil na ito.

Sa gitna ng pandemya, hangad nating makaraos ang bawat isa. Kaya utang na loob, ‘wag tayong magbulag-bulagan dahil sa totoo lang, hindi napapanahon para magdagdag tayo ng singil.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

MGCQ sa buong ‘Pinas, pag-aralang mabuti!

ni Leonida Bonifacio Sison - @Boses | February 17, 2021

Labing isang buwan matapos manalasa ang COVID-19 pandemic sa bansa, lubhang naapektuhan ang ating ekonomiya, gayundin ang iba pang sektor ng gobyerno.

Milyun-milyong manggagawa ang nawalan ng hanapbuhay dahil sandamakmak na negosyo ang tuluyang nagsara.

Kaya upang maibangon ang ekonomiya, hiniling ng National Economic and Development Authority (NEDA) na isailalim sa modified general community quarantine (MGCQ) ang buong bansa mula Marso 21.

Sa ilalim ng mas maluwag na quarantine, nais payagang makalabas ang mga nasa edad lima hanggang 70, pagdagdag ng kapasidad sa pampublikong transportasyon hanggang 75%, pagbiyahe ng mas maraming provincial bus at pagbalik ng pilot-testing ng face-to-face classes.

Dagdag pa ng NEDA, maaaring magpatupad ng localized lockdown ang mga lokal na pamahalaan para mapigil ang pagkalat ng virus.

Samantala, pumalag ang dalawang alkalde sa National Capital Region (NCR) sa hiling na isailalim sa MGCQ ang buong bansa.

Kasabay nito, umapela ng mas mahabang pasensiya sa publiko ang mga alkalde habang hinikayat ang pamahalaan na ikonsidera ang payo ng mga eksperto hinggil dito.

Naninindigan din ang alkalde na mas magandang manatili muna sa kasalukuyang quarantine status dahil parating na ang bakuna.

Gayundin, ang desisyon para sa quarantine classification ay hindi lang umano dapat ibase sa mga eksperto sa ekonomiya dahil dapat ding konsultahin ang mga health experts.

Bagama’t totoong kailangang-kailangan nang bumangon ng ekonomiya sa kabila ng ating pakikipaglaban sa pandemya, marami tayong dapat ikonsidera.

Kabilang na riyan ang posibilidad ng panibagong hawaan, lalo pa ngayong may bagong variant ng COVID-19, na sinasabing mas mabilis makahawa.

Sa totoo lang, napakarami pang dapat pag-aralan at silipin, lalo na ang opinyon ng mga eksperto at lider.

Mahirap kasing basta na lang tayo magpatupad ng pagluluwag, tapos ang ending, LGUs ang sasalo ng problema ‘pag may hawaan sa kanilang nasasakupan.

Napakalaking hamon nito para sa ating lahat, pero ‘ika nga, kung magiging maingat at maagap tayo sa mga hakbang na nais nating maipatupad, magtatagumpay din tayo sa laban na ito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mas malinaw na panuntunan ‘pag pinayagang lumabas ang mga bata, plis lang!

ni Leonida Bonifacio Sison - @Boses | February 16, 2021

Matatandaang Oktubre 2020 pa lang, pinapayagan na ng Resolution 79 ang Inter-Agency Task Force for the Management of Emerging Infectious Diseases (IATF-EID) ang mga batang nasa edad 15 hanggang 17 na lumabas ng bahay, ngunit agad itong pinalagan ng Metro Manila Council (MMC).

Ngunit matapos ang ilang buwan, aprub na sa mga alkalde ng National Capital Region (NCR) ang paglabas ng mas maraming tao, partikular ang mga menor-de-edad sa gitna ng pandemya.

Paliwanag ng MMC chairman at Parañaque City Mayor Edwin Olivarez, planong gawin ng mga lokal na pamahalaan ang hakbang na ito upang muling buhayin ang ekonomiya na lubhang naapektuhan ng pandemya.

Kamakailan, inirekomenda ng IATF-EID ang pagluluwag ng quarantine restrictions para sa mga batang nasa edad 10 hanggang 14 sa mga lugar na nasa ilalim ng modified general community quarantine (MGCQ), ngunit agad itong tinutulan ni Pangulong Rodrigo Duterte dahil pa rin sa banta ng COVID-19.

Kung tutuusin, kailangan na talagang umusad ng ekonomiya kahit patuloy na nananalasa ang pandemya, pero ang hamon ay kailangang matiyak na hindi makaaapekto ang planong pagpayag na lumabas ang ilang menor-de-edad sa pagsirit ng kaso ng COVID-19 sa bansa.

Isa pa, kung talagang papayagang makalabas ang mga bata, tiyaking magkakaroon ng malinaw na panuntunan tulad ng mga lugar na puwedeng puntahan at kung kailangan ng guardian o magulang. Baka kasi ang ending, alam lang nilang puwedeng lumabas, pero hindi nauunawaan ang iba pang bagay na bawal at puwede.

Gayundin, hinihikayat natin ang mga lokal na pamahalaan na ipagpatuloy ang paghihigpit sa mga health protocols, lalo pa ngayong muli nang binuksan ang ilang industriya sa mga lugar na nasa general community quarantine (GCQ) kabilang ang Metro Manila.

Paalala rin sa mga magulang, oras na maisapinal ang pagluluwag na ito, ‘wag nating kalimutan ang ating obligasyon sa ating mga anak. Hindi porke pinayagang makalabas, larga na lang nang larga ang mga bagets at ‘pag napahamak, sino ang sisisihin, ang gobyerno?

Tandaan, tayo ang responsable sa bawat kilos ng ating mga anak at hindi ang ibang tao.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com