‘Pinas, ready na raw magbakuna pero delayed ang COVID vaccine, anyare?

ni Leonida Bonifacio Sison - @Boses | February 21, 2021

Nakatakdang dumating ngayong ikalawa hanggang ikatlong linggo ng Pebrero ang COVID-19 vaccine mula sa COVAX facility ng World Health Organization (WHO) pero naantala ito.

Kasabay ng patuloy na paghahanda ng mga lokal na pamahalaan at ilang ospital, humingi ng pasensiya si vaccine czar Carlito Galvez Jr. sa mga alkalde ng Metro Manila dahil sa pagkaantala ng pagdating sa Pilipinas ng mga bakuna kontra COVID-19.

Paliwanag ni Galvez, naghigpit ang Pfizer sa indemnification agreement na gagarantiyang protektado ito mula sa habla, sakaling may makaranas ng adverse o negatibong side effect sa mga mababakunahan.

Rekisito ang indemnification agreement o bayad-pinsala — sa pagkuha ng Pilipinas ng tiyak na petsa ng pagdating ng COVAX facility vaccines sa bansa.

Habang naghihintay ang taumbayan sa pagdating at pag-rollout ng bakuna, inihayag ng Malacañang, maging si Pangulong Rodrigo Duterte ay naiinip na sa pagdating ng bakuna, na dapat darating ngayong buwan.

Gayundin, nananabik na umanong magpaturok ang mga frontliners, partikular ang mga medical workers bilang dagdag-proteksiyon laban sa virus.

Habang naghihintay ng bakuna, ang tanging magagawa natin ay ang ‘wag magpasaway.

Baka kasi masyado tayong kampante na may parating na bakuna, at ang ending, hindi pa man nababakunahan ay umaasta na tayong normal na ang lahat.

Panawagan sa mga kinauukulan, galaw-galaw ho at ‘wag puro pramis. Sana naman, matiyak na kung kailan ang dating ng bakuna para maiwasan ang delay sa rollout at pagbabakuna.

Matatandaang kamakailan, sinabi pa nating handa na tayo sa gagawing pagbabakuna, pero ang ending, delayed pala.

Maraming umaasa sa bakuna para sa kanilang kaligtasan, lalo na ang mga medical frontliners na buwis-buhay sa araw-araw na pakikipaglaban sa pandemya.

Hangad nating masolusyunan ito agad dahil sayang ang panahon, lalo pa ngayong usap-usapan ang pagluluwag ng quarantine sa bansa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

‘Pinas, ready ba talaga sa MGCQ?!

ni Leonida Bonifacio Sison - @Boses | February 20, 2021

Matapos hilingin ng National Economic Development Authority (NEDA) na isailalim sa modified general community quarantine (MGCQ) ang buong Pilipinas sa Marso upang umusad ang ekonomiya, agad na nagpahayag ng iba’t ibang opinyon ang publiko, ilang alkalde at maging ang ilang ahensiya ng gobyerno.

Unang pinalagan ng dalawang NCR mayors ang proposal dahil anila, dapat hintayin na lang ang bakuna, gayundin, kailangan umanong hilingin ang opinyon ng mga health experts hinggil dito.

Ang Department of Transportation (DOTr) naman, nangakong kayang itaas sa 70% ang kapasidad ng public transport sakaling payagan ang MGCQ sa bansa.

Samantala, ibinabala rin ng ilang health experts ang posibilidad na humiling ulit ng “time-out” ang mga medical frontliners dahil posibleng muling tumaas ang COVID-19 cases sa bansa. At kamakailan naman, mayorya ng Metro Manila Mayors ang pumabor sa MGCQ sa Marso 1 para makabawi ang ekonomiya.

Kaya naman, nagpaalala ang World Health Organization (WHO) sa mga opisyal ng Pilipinas sa posibleng sumirit ulit ang COVID-19 cases kung itutuloy ang pagbababa ng quarantine protocols sa ‘Pinas.

Bagama’t nauunawaan ng WHO ang pangangailangan na buksan na ang ekonomiya, kailangan din umanong masusing pag-aralan ang mga lahat ng panuntunan bago ito pagdesisyunan at ipatupad.

Sa totoo lang, napakarami pang kailangan ikonsidera, kaya ang tanong, handa na ba talaga tayo sa mga susunod na mangyayari oras na payagan ang pagluwag ng quarantine?

Tulad ng paulit-ulit nating sinasabi, dapat nating pag-aralang mabuti kung paano maibabangon ang ekonomiya nang hindi nalalagay sa panganib ang ating mga kababayan dahil ngayon pa lang, kung kinakailangang mas higpitan ang pagpapatupad ng health protocols, gawin na.

Tulad na lang ng signages sa mga estabilsimyento na “No facemask and no face shield, no entry”, pero nakakapasok naman ang mga kostumer nang walang faceshield at hindi nakasuot nang maayos ang facemask. Sa mga pampublikong sasakyan, kung hindi kapiraso ang pagitan ng mga pasehero, sira-sira naman ang barrier.

Ilan lang ‘yan sa mga kasalukuyang nangyayari habang nasa general community quarantine (GCQ) ang ilang lugar sa bansa, kabilang ang Metro Manila.

Napakalaking hamon nito para sa ating pamahalaan, kaya kung mailalagay sa MGCQ ang ‘Pinas, paano na? Kakayanin ba talaga?

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Dagdag-kapasidad sa PUV, oks lang kung ‘di malalabag ang health protocols

ni Leonida Bonifacio Sison - @Boses | February 19, 2021

Kasunod ng hiling ng National Economic and Development Authority (NEDA) na isailalim sa modified general community quarantine (MGCQ) ang buong bansa sa Marso, tiniyak ng Department of Transportation (DOTr) na handa silang itaas sa 75% ang public transportation capacity.

Sa oras na aprubahan ng Inter-Agency Task Force for the Management of Emerging Infectious Diseases (IATF) ang proposal ng NEDA, nangako ang DOTr na titiyakin nilang maipatutupad ang istriktong health protocols sa lahat ng pampublikong sasakyan at pasilidad para matiyak na maiiwasan ang hawaan ng COVID-19.

Sa totoo lang, wala namang problema kung patataasin pa natin ang kapasidad sa mga pampublikong sasakyan dahil kung tutuusin, tulong ito sa mga tsuper at pasahero.

Ngunit ngayong nasa 50% pa lang ang kapasidad sa PUV, kapansin-pansing napakarami nang lumalabag sa minimum health standards, kaya ang tanong, paano kapag dinagdagan pa ang puwedeng makasakay?

Samantala, sa halos araw-araw na nakikita sa tuluy-tuloy na operasyon ng Inter-Agency Council for Traffic (I-ACT) laban sa mga pasahero at motoristang hindi sumusunod sa health protocols, karamihan sa mga bus ay punuan, sira-sira ang barrier sa mga jeep at mga pasaherong hindi maayos na nakasuot ng facemask at face shield. Palusot ng mga pasahero, nakalimutang magdala ng face shield, habang ang katwiran ng iba, hindi alam na required ito sa PUV.

Bagama’t wala pang desisyon kung matutuloy ang MGCQ sa buong bansa, tayo ay may hiling sa DOTr at mga kababayan nating komyuter.

Habang hindi pa pinal ang mga susunod na hakbang, baka puwedeng ito muna ang tutukan natin.

Mahirap kasi ‘yung puro pramis tayo para payagang magdagdag ng kapasidad, pero ang kasalukuyang protocols ay hindi naman nasusunod.

‘Ika nga, tugunan muna natin ang kasalukuyang problema bago tayo gumawa ng panibagong hakbang. Tiyakin nating hindi dagdag-problema ang mga ginagawa natin ngayon upang hindi panibagong sakit ng ulo pagdating ng panahon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com