Iba’t ibang standard requirement ng LGUs, ikinalito ng mga nais bumiyahe

ni Leonida Bonifacio Sison - @Boses | February 24, 2021

Bilang tulong sa sektor ng turismo na isa sa mga labis na naapektuhan ng pademya, unti-unti nang binuksan sa publiko ang ilang tourist destination sa bansa.

Pero siyempre, may mga panuntunang dapat sundin nang sa gayun ay maiwasaan ang pagtaas ng COVID-19 cases sa mga probinsiya, na pinagkasunduan naman ng mga lokal na pamahalaan at ahensiya ng gobyerno.

‘Yun nga lang, iba-iba ang mga standard requirement ng bawat local government units (LGUs), bagay na ikinalito ng 8 sa 10 Pilipino, base sa survey ng Department of Tourism (DOT).

Kaugnay nito, nais ng DOT at Department of the Interior and Local Government (DILG) na mas padaliin ang pagbiyahe at gawing standard ang mga requirement ng mga lokal na pamahalaan sa mga turista.

Matatandaang mayroong mga lugar na tumatanggap ng turista kung makapagpapakita ng negatibong resulta ng COVID-19 antigen test, pero mayroon ding nanghihingi ng RT-PCR test. Gayundin, may ilang lugar na tumatanggap ng mga batang turista, habang ang iba naman ay hindi.

Dahil dito, irerekomenda ng DOT na gawing standard ang test bago makabiyahe ang isang tao at depende na sa LGU kung ano’ng klase ng test ang hihingin.

Kung nais nating padaliin ang pagbiyahe ng mga turista, dapat lang nating matiyak na hindi ito masasamantala. Halimbawa na lang ng pamemeke ng test result para makabiyahe, alamin natin kung paano ito mapipigilan sakaling maging mas madali ang pagbiyahe.

Baka kasi layunin nating maiwasan ang kalituhan ng ating mga kababayan, pero baka ito pa pala ang maging dahilan para mas dumami ang mga mananamantala. At oras na may mahuling lumabag, dapat silang masampolan para hindi tularan.

Samantala, malamang ay kailangan ng mas masusing pag-aaral upang matiyak na magiging tamang hakbang ito para maiwasan ang kalituhan, gayundin upang patuloy na makabangon ang sektor ng turismo.

Kaya ang ating panawagan sa mga kinauukulan, bagama’t nais nating mag-ingat para sa mga ating nasasakupan, baka puwede tayong makiisa para naman sa mga nais bumiyahe.

Hindi man madali ito para sa lahat, ‘wag nating kalimutang isaalang-alang ang kaligtasan ng bawat isa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagbalik ng face-to-face classes, ikonsulta sa mga eksperto, ‘wag sa pulitiko!

ni Leonida Bonifacio Sison - @Boses | February 23, 2021

Habang papalapit ang pagtatapos ng school year, usap-usapan na rin ang pagbabalik ng face-to-face classes.

Kaugnay nito, ilang mambabatas ang nagsusulong na ibalik na ang face-to-face classes ngayong taon.

Matatandaang kasama sa mga nais payagan ang pagbabalik ng face-to-face classes kung matutuloy ang hiling ng National Economic and Development Authority (NEDA) na pairalin ang modified general community quarantine (MGCQ) sa buong bansa.

Kaugnay nito, iginiit ng isang mambabatas na bumuo ang Department of Education (DepEd) ng grupo ng mga eksperto sa agham at medisina na magpapayo hinggil sa pagbabalik ng face-to-face classes. Aniya, dapat ipaubaya sa mga eksperto ang pagdedesisyon sa pagbabalik-eskuwela ng mga mag-aral at nanindigang hindi dapat ang mga pulitiko ang masusunod sa isyu.

Samantala, sa press briefing kahapon, Pebrero 22, sinabi ni presidential spokesperson Harry Roque na nagdesisyon na ang Pangulo na wala pa ring face-to-face classes ngayong taon dahil ayaw nitong malagay sa alanganin ang mga mag-aaral at guro habang wala pang nababakunahan sa bansa.

Dagdag pa rito, sinabi ng tagapagsalita na maaaring ikonsidera ang face-to-face classes sa Agosto sa mga low-risk areas.

Kung tutuusin, may punto naman ang mambabatas. Hindi naman talaga basta-basta natin puwedeng isulong ang pagbabalik-eskuwela ng mga bata nang walang konsultasyon mula sa mga eksperto.

Baka kasi todo-pilit tayo na pabalikin ang mga mag-aaral, pero ‘pag nagkaroon ng hawaan, saka tayo magtuturuan kung sino ang may kasalanan.

Kaya ngayon, kailangan munang pag-aralan kung uubra ang face-to-face classes sa mga matutukoy na low risk areas, depende na rin sa magiging rekomendasyon ng mga eksperto.

Habang nakikipaglaban sa pandemya, natutunan natin ang kahalgahan ng opinyon at payo ng mga eksperto sa kung paano natin ito tutugunan.

Ngayong kaligtasan ng kabataan ang ating kailangan iprayoridad, dapat lang na makinig tayo sa mga eksperto at iwasang magpadalos-dalos sa mga desisyon. Kung kinakailangan nating maghintay pa rin, ‘wag tayong manghinayang.

‘Ika nga, hindi natin kailangang magmadali para maiwasan ang mga panibagong problema.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagtiyak na walang hawaan ‘pag nag-MGCQ, ‘wag lang iasa sa LGUs!

ni Leonida Bonifacio Sison - @Boses | February 22, 2021

Hindi pa man pinal ang desisyon kung isasailalim sa modified general community quarantine (MGCQ) ang bansa sa susunod na buwan, kani-kanyang payo na ang mga eksperto at ilang ahensiya ng pamahalaan sa taumbayan, partikular sa mga lokal na pamahalaan.

Kaugnay nito, sinabihan ng Department of Health (DOH) ang local government units (LGUs) na mag-level up sa COVID-19 response sakaling matuloy ang pagluluwag ng quarantine.

Dagdag pa ng ahensiya, alam na dapat ng mga lokal na pamahalaan kung paano reresponde sa pandemya, luwagan man o hindi ang quarantine restrictions.

Matatandaang sa kabila ng pagiging sentro ng pandemya at matagal na pagdadalawang-isip, mayorya ng NCR mayors ang pabor sa pagsailalim ng buong bansa sa MGCQ upang umusad ang ekonomiya.

Gayunman, nagbabala ang health experts at ilang alkalde na possible itong maging sanhi ng muling pagtaas ng COVID-19 cases at nanindigang dapat munang hintayin ang bakuna.

Sa totoo lang, malaki ang papel ng mga lokal na pamahalaan sa pagtugon sa pandemya, pero aminin na natin, hindi lamang sila ang dapat nating asahan dahil ang nasyonal na pamahalaan ay may dapat ding gawin. Kumbaga, ‘wag lang ipasa sa mga LGU ang responsibilidad, galaw-galaw din dahil ‘ika nga, “We Heal as One”.

Mula nang ipatupad ang enhanced community quarantine (ECQ) noong Marso ng nakaraang taon, kapansin-pansing napakarami nang nagawa ng ating mga alkalde.

Kani-kanilang diskarte upang makakuha ng pondo para patuloy na makapagbigay ng ayuda, kani-kanyang kilos para mapabilis at maging epektibo ang contact tracing at ngayon, todo-kayod para makakuha ng bakuna.

Oras na luwagan ang quarantine restrictions, napakaraming magbabago. Asahan na nating mas maraming tao sa labas, lalo na ang mga bata, kaya plis lang, palakasin pa ang puwersa ng ating mga barangay tanod o kapulisan upang matiyak na nasusunod ang health protocols.

Isa pa, dapat lang din na paghandaan, hindi lang ng LGUs kundi pati ang nasyonal na pamahalaan, ang mga puwedeng mangyari sakaling matuloy ang hakbang na ito.

Nakakabilib din dahil kitang-kita naman ang mga pagsisikap ng ating mga lokal na pamahalaan, kaya hangad nating magtuluy-tuloy pa ito hanggang malampasan natin ang pandemya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com