Kakulangan sa contact tracers dahil sa limitadong pondo, panibagong hamon vs. COVID-19

ni Leonida Bonifacio Sison - @Boses | January 18, 2021

Matapos ang pagtala ng unang kaso ng mas nakahahawang variant ng COVID-19 sa bansa, nakitaan agad ng Department of the Interior and Local Government (DILG) ng malaking hamon ang pagpapatupad ng mahigpit na contact tracing.

Ayon kay DILG Usec. Jonathan Malaya, nasa P1.9 milyon lang ang pondo ngayon ng mga contact tracer, kaya aabot lamang sa 15,000 contact tracers ang kayang i-hire ulit ng ahensiya sa loob ng anim na buwan.

Giit ng opisyal, bagama’t nais nilang maituloy ang serbisyo ng 50,000 contact tracers na natanggap noong 2020, kailangan umanong bawasan ang mga ito dahil sa limitadong budget ng ahensiya.

Gayunman, makatatanggap ng pinakamaraming contact tracers mula sa DILG ang Metro Manila, Central Luzon at Central Visayas dahil sa bilang ng mga active cases dito.

Matatandaang, unang iniutos ng pandemic task force ang pagpapalawak ng contact racing para maisama pati ang ikatlong generation contacts ng mga positibo sa UK variant.

Nakasaad sa resolusyon na dapat i-quarantine sa pasilidad ang lahat na matutukoy na close contact.

Bagama’t nauunawaan nating napakarami pang problema na dapat tugunan sa bansa, alam naman natin kung gaano kahalaga ang contact tracing.

Kaya panawagan sa mga kinauukulan, galaw-galaw ho para matugunan ang budget para rito. Hindi kasi puwedeng todo-himok tayo sa mga lokal na pamahalaan na paigtingin ang contact tracing, pero wala naman tayong pambayad para sa mga gagawa ng trabaho.

Isa pa, hindi basta-basta ang hakbang na ito dahil tila isinusugal din ng contact tracer ang kanilang kaligtasan.

Kaya plis lang, kung gusto natin ng mabilis at epektibong contact tracing, pag-aralan kung paano at saan makakukuha ng pera para rito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga hotel na dedma sa health protocols, sampolan!

ni Leonida Bonifacio Sison - @Boses | January 17, 2021

Dahil sa umano’y paglabag ng City Garden Hotel sa Makati City kung saan natagpuang walang buhay ang flight attendant na si Christine Dacera noong Enero 1, iniimbestigahan na ng Department of Tourism (DOT) ang ilang mga hotel na lumalabag umano sa mga health at quarantine protocols ng bansa.

Ito ay kasunod ng imbestigasyon sa naturang hotel hinggil sa pagtanggap umano ng mga staycation guest.

Ayon kay Tourism Secretary Bernadette Romulo-Puyat, may iba pa silang mga hotel na iniimbestigahan, gayundin, naghain na ng show cause order sa ibang establisimyento sa paglabag sa protocols.

Giit pa ng kalihim, hindi umano nagkulang ang ahensiya sa pagpapaalala at kasuwapangan na umano kung pagsasamahin ang mga staycation guest at mga naka-quarantine.

Dahil dito, nagdesisyon ang DOT na tanggalin ang certificate to operate ng City Garden Grand Hotel habang may quarantine at sinuspinde ng 6 buwan ang accreditation nito.

Gayundin, mas mahigpit na ang DOT ngayon, lalo na’t may bagong strain ng COVID-19 sa Pilipinas na sinasabing mas madaling makahawa, sa kabila ng layuning pataasin ang domestic tourism sa bansa dahil matatandaang, bumagsak ng 84% ang foreign tourism arrivals sa bansa dahil sa mga travel restriction.

Sa totoo lang, nakadidismaya dahil hanggang ngayon, napakarami pa ring lumalabag sa iba’t ibang kautusan kontra COVID-19. Ang masaklap pa, mga negosyante ang lumalabag at tila wa’ paki kung magkaroon ng hawaan sa kanilang establisimyento.

Kaya pakiusap sa mga kinauukulan, patuloy na imbestigahan at sampolan ang mga hotel na dedma sa umiiral na protocols.

At paalala sa mga negosyante riyan, kapag binigyan kayo ng pagkakataong kumita, sana ay sumunod naman kayo sa mga kautusan. Hindi kasi puwedeng kumikita nga kayo at nakakabawi sa pagkalugi, pero inilalagay n’yo naman sa panganib ang kaligtasan ng inyong mga kostumer.

‘Ika nga, ‘wag pera-pera. Magpakita naman kayo ng malasakit sa ating mga kababayan at ‘wag puro sa sarili.

Sa panahon ng pandemya, lahat tayo ay dapat maging bahagi ng solusyon at hindi maging ugat ng panibagong problema.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagiging arogante at kawalan ng simpatya ng gov’t officials, ‘di nakakatulong sa bansa!

ni Leonida Bonifacio Sison - @Boses | January 16, 2021

Hanggang ngayon, hindi pa rin tapos ang diskusyon hinggil sa naging pahayag ni Presidential Spokesperson Harry Roque na hindi dapat maging mapili ang mga Pilipino sa bakuna vs. COVID-19 gayung libre naman ito.

As usual, inulan ito ng iba’t ibang reaksiyon sa publiko, gayundin sa ilang opisyal ng gobyerno.

Kaugnay nito, napatanong tuloy ang isang mambabatas ng, “Gaano kahirap magpakita ng simpatya sa panahong ito?”

Giit ng mambabatas, dapat pagsabihan ng Palasyo ang tagapagsalita dahil hindi umano nakatutulong ang insensitive at aroganteng pananalita nito sa damdamin ng publiko.

Bagama’t kinikilala ang pagsisikap ng Inter-Agency Task Force at vaccine czar na makabili ng COVID-19 vaccines, hindi umano dapat palampasin ang mga aroganteng pahayag ng opisyal.

Sa totoo lang, maraming nadidismaya sa paraan ng pagsasalita ng ni Spox Roque.

Anila, parang hindi opisyal ng gobyerno ang nagsasalita dahil madalas, baluktot na katwiran ang ibinibigay nito sa mamamayang humihingi ng mahusay na serbisyo.

Ngayong panahon ng pandemya, mas kailangan ng taumbayan ang inyong lubos na pang-unawa at simpatya. Kaya utang na loob, maging sensitibo naman tayo sa mga pahayag na ating binibitiwan, lalo pa’t anumang gawin o sabihin n’yo ay dala-dala n’yo ang pangalan ng gobyerno.

Bilang opisyal, dapat ninyong ipakita na kayo ay handang magserbisyo sa publiko, anuman ang kalagayan ng bansa.

Kumbaga, gawin ninyong makabuluhan ang inyong pagsisilbi sa bayan dahil mas magandang tumatak sa publiko ang inyong magandang serbisyo at hindi ang pagiging arogante.

Tandaan, ang bawat ginagawa n’yo ay may epekto sa publiko at ngayong nakikipaglaban tayo sa pandemya, maging mabuti tayo sa isa’t isa — mapa-salita man ‘yan o gawa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com