Parusa sa mga quarantine violators, dapat patas!

ni Leonida Bonifacio Sison - @Boses | January 31, 2021

Nagbayad ng P1,500 multa ang events host at social media personality na si Tim Yap kasama ang asawa ni Mayor Benjamin Magalong na si Arlene Magalong, aktres na si KC Concepcion at 30 pang bisita sa kontrobersiyal na birthday party na ginanap sa The Manor sa loob ng Camp John Hay sa Baguio City.

Ito ang resulta ng paglabag sa COVID-19 health protocols ng mga nabanggit na personalidad kung saan P1,000 ang multa dahil sa paglabag sa hindi pagsusuot ng facemask at P500 sa kabiguang sumunod sa physical distancing sa naturang party.

Bukod pa rito, nagmulta rin ng kabuuang P9,000 ang The Manor P1,000 para sa paglabag sa Ord. 45-2020 Physical Distancing Ordinance at P5,000 sa Ord. 53-2020 New Normal Operation for Business Establishments.

Samantala, umani ng iba’t ibang reaksiyon sa taumbayan ang naganap na party at pagmumulta.

Tulad ng inaasahan, hindi ikinatuwa ng netizens ang naging aksiyon sa paglabag ng mga nabanggit na personalidad, gayundin ang mga kasama nito. Pero ang iba naman, hayaan na lang daw dahil nagmulta naman.

Giit ng netizens, parang hindi naman patas ang pagpaparusa sa mga lumalabag sa quarantine protocols. Anila, ‘pag ordinaryong mamamayan ang lumabag, kulong agad, pero ‘pag artista o mayaman, multa lang?

Kung tutuusin, may punto ang netizens dahil karamihan sa mga ordinaryong mamamayan na lumabag noon, napilitan lang para makapaghanapbuhay, pero ang mga nag-party, nagsaya lang. Tsk!

Dahil dito, panawagan sa mga kinauukulan, maging patas tayo sa pagpaparusa sa mga lumalabag.

Nakadidismaya kasi na palagi nating sinasabi na mananagot ang dapat managot, pero ang totoong nangyayari, ‘yung mga walang pera lang ang napaparusahan.

Siguro, isa rin ito sa mga dahilan kaya hindi na siniseryoso ng ilan ang mga umiiral na health protocols dahil katwiran nila, mga nakaaangat nga sa buhay ay puwedeng lumabag, bakit sila, hindi?

Bagama’t dapat lang namang magmulta ang mga ito, pakiusap natin sa mga awtoridad, ‘wag tayo puro salita at banta.

Parusahan ang mga dapat parusahan, anuman ang kanilang posisyon sa buhay. Dahil sa panahong ito, dapat maging mas seryoso tayo sa ating mga babala dahil kaligtasan ng taumbayan ang ating itinataya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Estafa sa mga namemeke ng COVID test result, dapat lang!

ni Leonida Bonifacio Sison - @Boses | January 30, 2021

Sa kabila ng mga babala at paalala, patuloy na nakatatanggap ng reklamo ang Philippine National Police (PNP) hinggil sa mga insidente ng pamemeke ng COVID-19 test result.

Ayon sa PNP, nakakukuha umano ng pekeng ng COVID-19 test result ang ilang indibidwal dahil may mga koneksiyon sa ospital, at nadiskubre rin ng Research Institute for Tropical Medicine (RITM) na mismong mga ospital at clinic pa ang nagbibigay ng mga papeles o impormasyon para sa pekeng test result.

Dahil dito, nagbabala ang PNP na puwedeng kasuhan ng estafa ang mga mahuhuling gumagawa nito, lalo na kung may nangyaring bayaran kapalit ng pekeng resulta.

Sa ngayon, naglalaro pa rin umano sa libo ang presyo ng pagpapa-swab test na kinakailangan partikular na sa mga babiyahe sa iba’t ibang bahagi ng bansa.

Samantala, hinimok din ng PNP ang mga kumpanya na maging mabusisi sa isusumiteng RT-PCR test ng kanilang mga empleyado na magbabalik-trabaho.

Ilang beses nang may naiulat na nameke ng COVID-19 test result, at hanggang ngayon, hindi pa rin pala tapos ang isyung ito.

Nakadidismaya dahil para bang wala tayong kadala-dala. Kung ‘yung iba ay no choice dahil requirement sa pagbabalik-trabaho, ‘yung iba ay pasaway lang talaga. ‘Yung tipong kaya nilang gumawa ng ilegal para lang maipilit ang kanilang lakwatsa o kung anu-ano pa. Tsk!

Gayunman, wala rin naman kasing gagamit ng pekeng resulta kung walang namemeke. Kaya dapat ding sisihin dito ang mga gumagawa ng pekeng dokumento.

Dapat lang na makasuhan kayo at managot dahil hindi biro ang ginagawa n’yo. Buhay at kaligtasan ang nakataya rito kaya utang na loob, makonsensiya kayo.

Siyempre, ang taumbayan ay may kailangan ding gawin. Bagama’t mahal talagang magpa-swab test ngayon, kailangan talaga.

Tandaan natin na kaya may ganitong hakbang o requirement ay upang matiyak na hindi kayo nahawa o wala kayong bitbit na virus.

Sa gitna ng pandemya, napakahalagang maging tapat at responsable para sa ikabubuti ng nakararami.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Doble-facemask, dagdag-proteksiyon o panibagong gastos at kalat?!

ni Leonida Bonifacio Sison - @Boses | January 29, 2021

Doble-facemask.

Ito ang pag-aaralan ng Department of Health (DOH) para mas epektibong makaiwas sa COVID-19, lalo na ngayong mayroon nang bagong variant nito sa bansa.

Sa rekomendasyon ng Estados Unidos, pagsusuot ng dobleng facemask ang nakikitang paraan upang magkaroon ng dagdag na takip sa mukha upang hindi makadaan ang ‘respiratory droplets’.

Gayunman, giit ni Health Undersecretary at spokesperson Maria Rosario Vergeire, dobleng proteksiyon na ang ginagawa ng mga Pilipino sa pagsusuot ng facemask at face shield.

Pero kung talagang nararapat ang pagsusuot ng dobleng facemask, kakailanganin ng ahesiya ng sapat na ebidensiya na mas mabisa ito.

Matatandaang sa Amerika, hindi inirerekomenda ang pagsusuot ng faceshield sa kanilang mamamayan at marami pa rin ang tumatangging magsuot ng facemask sa pampublikong lugar.

Kung dagdag-proteksiyon ang pag-uusapan, ayos lang naman magdoble ng ginagamit na facemask, pero ang siste ay dagdag-gastos at kalat na naman.

Kamakailan, naitalang tumaas ng 280 tonelada kada araw ang medical waste sa Metro Manila dahil sa COVID-19 pandemic.

At base sa report ng Asian Development Bank at United Nations, umaabot ng 3.5 kilo ang medical waste ng bawat tao sa isang health care facility dahil sa pandemya.

Gayundin, facemask umano ang madalas nilang nakikita dahil walang malinaw na tapunan ang publiko.

Kaya panawagan natin sa ahensiya, pag-aralang mabuti kung karapat-dapat ipatupad ang hakbang na ito. Baka kasi akala natin, karagdagang proteksiyon ito pero hindi pala.

Isa pa, panibagong gastos ito at tiyak na kawawa na naman ang ordinaryong mamamayan.

Tulad ng paulit-ulit nating pakiusap sa kinauukulan, tiyaking talagang makatutulong kontra COVID-19 ang mga ipatutupad o ginagawa nating hakbang.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com