Senatorial candidate Samira Gutoc, ipinaalam kay VP Leni ang paglipat ng partido

ni Jasmin Joy Evangelista | October 4, 2021

Ipinaalam daw ng senatorial candidate na si Samira Gutoc sa dating kaalyadong si VP Leni na siya ay lilipat ng partido.

Si Gutoc ay opisyal nang naghain ng certificate of candidacy sa ilalim ng partidong Aksyon Demokratiko.

Aniya, pinadalhan niya ng sulat si Robredo upang ipaalam ang paglipat sa partido ni Manila Mayor Isko Moreno.

“I wrote to VP Leni if I could meet her at least maybe get a guidance on political, but I respected her, siya po ay talagang manager ng operations kasi ka-partner niya ako sa Ako Bakwit so more deeply kami magkapatid or inaanak sa humanitarian operations so huwag naman sana masamain ng publiko na nagtraydor si Sam, no,” ani Gutoc.

Hindi rin umano siya pinigilan ng pangalawang pangulo sa kanyang desisyon.

“VP Leni understood, she didn’t dissuade me. I reached out na ito po yung offer ng Aksyon Demokratiko. Hindi naman po ako dinissuade ni Ma’am VP,” aniya.

Nawa raw ay hindi sumama ang loob sa kanya ng dati na niyang supporters.

“I’m the same woman who fights and who fought for you na talagang pinanggalingan ay giyera and I will continue to speak about kahirapan at kagutuman,” paliwanag ni Gutoc.

Dagdag pa ni Gutoc, ipinagdadasal niya si Robredo sa pagdedesisyon nito kung tatakbo o hindi sa pagkapangulo.

VP Robredo, pambato ng 1Sambayan sa pagka-pangulo sa 2022 elections

ni Lolet Abania | September 30, 2021

Opisyal nang inendorso ng opposition coalition 1Sambayan ngayong Huwebes si Vice President Leni Robredo na kanilang pambato sa pagka-pangulo sa 2022 national elections.

Ito ang inanunsiyo ni retired Associate Justice Antonio Carpio sa naganap na media briefing ng 1Sambayan.

"We hope that she will accept the challenge," ani Carpio.

Nabuo ang desisyon ng naturang koalisyon na kanilang maging kandidato si Robredo sa presidential race matapos ang isinagawang survey sa lahat ng kanilang miyembro, habang ayon sa grupo, mag-uudyok din ito sa kanilang mga supporter para isulong ang isang opposition nominee na lumaban sa administration candidates.

Noong Marso nailunsad ang grupo, kung saan target ng 1Sambayan na makapag-endorso ng isa sa mga kandidato para sa 2022 national elections na kayang tapatan ang Duterte administration’s bets.

Ang grupo ay binubuo ng 123 organizations at coalitions, 47 local chapters, 22 foreign chapters at 12 youth chapters at organizations.

Kamakailan, ang 1Sambayan ay nagsagawa ng survey sa kanilang mga miyembro kung saan ang mga respondent ay tinanong hinggil sa mga issues na napakaimportante sa kanila at ang naging basehan nila sa pagpili ng mga kandidato.

Ilan sa mga qualities ng mga kandidato na nakasama sa mga kinuwestiyon sa mga respondent at nakapaloob sa survey at kanila ring kinonsiderang mapili ay personal at public integrity, track record o past performance, at campaign machinery.

VP Leni, may pahayag sa mga kumukumbinsi sa kanya na tumakbong presidente

ni Jasmin Joy Evangelista | September 25, 2021

Nagpahayag ng malamang mensahe si VP Leni Robredo hinggil sa isyu ng kanyang pagtakbo sa susunod na eleksiyon.

Marami pa rin kasi ang nag-aabang sa kanyang magiging desisyon.

"Naririnig ko kayo... Naririnig ko rin 'yung sinasabi ng iba. Kesyo pagod na raw ako. Natatakot daw akong matalo. Kinakabahan daw ako na dehado tayo sa resources at makinarya, na baka hindi natin kayanin ang kampanya. Tanungin ko nga kayo ngayon: Mukha ba akong pagod? Mukha ba akong natatakot? Mukha ba akong kinakabahan?" sabi ni Robredo.

Ayon pa sa kanya, pagtiwalaan lang daw siya ng mga supporters na patuloy na kumukumbinsi sa kanya na siya ay tumakbong presidente sa 2022.

“Magtiwala kayo: Pagdating sa usapin ng halalan, isa lang ang nasa isip ko: Siguruhin na mawawakasan ang uri ng pamumunong ugat ng pagdurusa, paghihirap, at pagkamatay ng napakarami sa atin," sambit niya.

Sabi pa ni Robredo, "mangyayari ang dapat mangyari."

"Mulat ako sa mga deadline; umuusad ang panahon; sa huli, mangyayari ang dapat mangyari."