VP Leni, balik-opisina na bukas pagkatapos ng 14-day quarantine

ni Jasmin Joy Evangelista | September 5, 2021

Ngayong araw matatapos ang mandatory 14-day quarantine ni VP Leni Roberedo matapos magka-close contact sa isa sa kanyang mga staff na nag-positibo sa COVID-19.

Matatandaang inanunsiyo niya na siya ay sasailalim sa quarantine noong Agosto 25 kahit nag-negatibo sa virus.

"Ang protocol kasi, kahit negative ka na kailangan tapusin ang 14-day quarantine so 14th [day] ko na ngayon" saad ni VP Leni sa kanyang weekly radio program.

"Bukas [Monday] regular schedule na ako. Regular na ako kasi nasa opisina na ako", dagdag niya.

Pinaalalahanan din niya ang kanyang mga staff na iwasan na ang pagkain nang sabay-sabay upang maiwasan ang hawahan.

"Kapag kumakain nang sabay-sabay doon nagkakahawaan kasi tinanggal mo 'yung mask", pahayag ni Robredo.

VP Leni, fully vaccinated na

ni Lolet Abania | August 11, 2021

Nakumpleto na ni VP Leni Robredo ang kanyang second dose ng AstraZeneca COVID-19 vaccine ngayong Miyerkules. Sa kanyang Facebook post, makikitang tinanggap ni VP Leni ang ikalawang dose niya ng bakuna sa Pinyahan Elementary School sa Quezon City, kasama ang kanyang mga staff members na tulad niya ay tinatawag na persons with comorbidities o nasa A3 category sa ilalim ng vaccination program ng gobyerno. Una nang sinabi ni Robredo na siya ay mayroong hypertension.

“Mabilis at maayos pa rin ang sistema. Napakabait ng mga nag-aasikaso na mga from QC LGU, doctors, nurses, teachers, other volunteers,” ani Robredo. “We were done in about 30 minutes,” dagdag ni VP Leni.

Binanggit din ni Robredo na dalawa sa kanyang staff ay nag-aalangan noon na magpabakuna kontra-COVID-19 subalit pumayag na rin ang mga ito sa ngayon. Matatandaang natanggap ni Robredo ang kanyang first dose ng AstraZeneca COVID-19 vaccine noong nakaraang Mayo 19.

Ang AstraZeneca ay may efficacy rate na 70% matapos ang unang dose base sa evaluation ng Philippine Food and Drug Administration (FDA). Ang 70% rating ay tataas ng hanggang 90% matapos naman ang second dose na ma-administer pagkaraan ng apat hanggang 12 linggo.

Panawagan ni Robredo sa pamahalaan na dapat ay makapagbakuna ng hanggang 750,000 indibidwal kada araw habang lockdown ng Agosto 6 hanggang 20 sa Metro Manila dahil ito ang epicenter ng COVID-19 pandemic sa bansa.

Nursing students, isalang na rin para magbakuna - VP Leni

ni Mary Gutierrez Almirañez | June 6, 2021

Magtatayo ng vaccination hub ang Office of the Vice-President (OVP) sa Maynila, ayon kay Bise-Presidente Leni Robredo sa kanyang weekly radio program.

Aniya, nakipagkita siya kay Manila Mayor Isko Moreno upang mapag-usapan ang pinaplanong mobile vaccination, kung saan economic frontliners ang prayoridad mabakunahan kontra COVID-19.

Sabi pa niya, "Ipa-pilot na natin ‘yung Manila City sa mobile vaccination para ipakita na it can be done.”

"So ngayon, nagta-time and motion study kami, naghahanap kami ng lugar na puwedeng gawan. ‘Yung nagbabakuna, hindi na kailangang bumaba sa sasakyan. Ang uunahin namin ay ibang frontliners, non-medical frontliners na kailangan ng protection," dagdag niya.

Iginiit din ni Robredo na tinatarget nilang mabakunahan ang 24,000 indibidwal.

Samantala, inirekomenda rin niya ang mga intern sa nursing at medical schools para maging COVID-19 vaccinators.

Aniya, "Ie-explore namin kung papayag, puwedeng mag-partner tayo with a medical school, partner with a nursing school na 'yung mga estudyanteng nag-clerk na, nag-i-intern na, nag-hospital duty na mapayagan magbakuna basta supervised."

Kaugnay ito sa kakulangan ng vaccinators sa ilang local government units (LGU) kaya bumabagal ang rollout kahit may sapat na suplay ng bakuna.

Sa ngayon ay 5.38 million indibidwal na ang nabakunahan laban sa COVID-19. Kabilang dito ang 1.2 million na fully vaccinated o nakakumpleto sa dalawang turok, at ang 4,088,422 indibidwal na nabakunahan ng unang dose.