Judge na may hawak sa huling drug case ni de Lima, bumitaw

ni Aileen Taliping | July 7, 2023

Nag-inhibit si Muntinlupa Regional Trial Court Judge Abraham Joseph Alcantara sa paghawak sa huling kaso sa ilegal na droga ni dating Senadora Leila de Lima.

Ang hakbang ni Judge Alcantara ay bilang tugon sa kahilingan ng state prosecutors upang maalis ang anumang pagdududa.

Ang huling kaso ni De Lima sa ilegal na droga ay napunta kay Alcantara noong June 30 matapos mag-inhibit si Judge Romeo Buenaventura na naunang pinag-inhibit ng mga abogado ng dating senadora.

Si Alcantara rin ang nag-acquit sa ikalawang drug case ni De Lima noong Mayo.

Sinabi ni Alcantara na pinagbigyan niya ang kahilingan ng mga prosecutor para sa voluntary inhibition upang maalis ang mga agam-agam at pagdududa sa kanyang kredibilidad integridad at pagiging patas.

"At the very first sign of lack of faith and trust in his or her actions, whether well-grounded or not, the judge has no other alternative but to inhibit himself or herself from the case," ani Alcantara.

After 6 yrs. na kulong.. De Lima, absuwelto sa droga

ni Gina Pleñago | May 13, 2023

Inabsuwelto kahapon si dating Senadora Leila De Lima ng Muntinlupa Regional Trial Court ( RTC) Branch 204 matapos ang anim na taong pagkakakulong sa kasong conspiracy to commit illegal drug trading, mula sa isa sa dalawang natitirang kaso nito.

Base sa 39 pahinang desisyon ng Muntinlupa ETC, ipinawalang sala nito si De Lima sa kaso nito na may kinalaman sa illegal drug trade sa New Bubid Prison (NBP).

Abril 2022 nang bawiin ni dating Bureau of Corrections officer-in-charge Rafael Ragos ang kanyang naging alegasyon na nagbibigay siya ng drug money sa dating senadora noong 2012.

Sinabi nito na napuwersa at pinilit lamang umano siya ni dating Justice Secretary Vitaliano Aguirre II na tumestigo laban kay De Lima.

"Binanggit din ng hukuman na importante ang naging recantation ni Deputy Director Ragos dahil nung binawi niya itong salaysay eh nawala na nang tuluyan ang basehan ng akusasyon sa kanya at nagkaroon ng reasonable doubt sa akusasyon laban kay Senator De Lima," sabi ng abogado ni De Lima na si Atty. Filibon Tacardon.

"A glorious day. This is the beginning of my vindication," ani De Lima habang naka-escort naman sa kanya ang mga pulis.

Matatandaan na si De Lima ay nakakulong simula noong Pebrero 2017 matapos siyang akusahan ng panahon ng Duterte administration na sinasabing nanghihingi siya ng pera mula sa mga inmate sa NBP kapalit ng umano’y pagpayag nito sa bentahan ng droga sa loob ng naturang bilangguan.

Labis na nagpasalamat si De Lima sa mga tumulong sa kanya at nakipaglaban upang patunayan na siya ay inosente sa inaakusa sa kanya.

Paliwanag ng abogado ni De Lima, walang nakitang ebidensiya ang prosekusyon na mag-uugnay kay kina De Lima at Ronnie Dayan sa sinasabing illegal drug trading.

Matatandaan na una nang ibinasura ng korte ang iba pang kaso ni De Lima na may kaugnayan sa droga noong 2021.

Sa kabila na inabsuwelto si De Lima, mayroon pa itong natitirang kasong kinakaharap na may kaugnayan pa rin sa droga at humiling ito sa hukuman na makapagpiyansa para sa pansamantalang paglaya, na hinihintay pa ang magiging desisyon ng hukom.

Ayuda at bakuna, tugon sa pandemya

ni Leila De Lima - @Laban lang! | July 04, 2021

Mahigit isang taon na nating nararanasan ang krisis na dulot ng pandemya kaya patuloy ang pagdausdos ng ekonomiya. Nagsara ang maraming negosyo dahilan para mawalan ng trabaho ang maraming Pilipino.

Kaya sa simula pa lang, maigting na nating panawagan ang pagkakaloob at pagpapabilis ng ayuda, lalo na para sa matagal nang hikahos sa buhay. Marami sa ating mga kababayan ang bago pa man ang pandemya, pilit nang pinagkakasya ang kita sa kanilang pang-araw-araw na pangangailangan.

Paano pa kaya kung nawalan pa sila ng trabaho dahil nalugi ang kumpanya o kasama sila sa mga na-retrench o kinailangang mabawas na empleyado?

Kaya hindi maiwasan ang pag-asam ng marami sa agarang tulong at ayuda mula sa gobyerno. At ito rin ang dahilan kaya lubos ang pasasalamat at pagsuporta ng mga Pilipino sa community pantry.

Nauna na nating nabanggit ang halaga ng ayuda para maibsan ang pagkalam ng sikmura ng marami nating kababayan at mabigyan sila ng kakayahan na makatawid sa bawat araw. Hindi ibig sabihin nito ay gagawin na lang silang dependent, tamad o palaasa. Mayroon lang talagang pagkakataon o sitwasyong kahit anong sipag o kayod ang gawin ay wala silang maipantustos dahil sa labis na kahirapan, pagkakaroon ng karamdaman o pagdating ng biglaan at matinding trahedya o sakuna.

Ito ang prinsipyong itinaguyod natin ng ating isabatas, bilang Chairperson ng Senate Committee on Social Justice, Welfare and Rural Development, ang Pantawid Pamilyang Pilipino Program (4Ps) Act noong 2019. At kita naman natin, lalung-lalo na ngayong panahon ng pandemya, kung gaano kalaki ang naitutulong nito sa milyun-milyong pamilyang benepisaryo.

Kaya nang magkaroon ng mungkahi na huwag ipagkaloob ang cash grant ng 4Ps sa mga hindi pa nagpapabakuna, agad tayong tumutol dito. Ang 4Ps ay tulong sa mga nangangailangan. Hindi ito kasangkapan para pilitin ang mga tao na naghahanap ng paglilinaw at impormasyon tungkol sa bakuna.

Linawin lang natin: Dapat makapagpabakuna agad ang mga Pilipino dahil ito ang pinakamabisang panlaban sa mga direktang pinsalang dulot ng COVID-19. Pero hindi makatarungang ipagkait ang ayuda sa mga nag-aalinlangan pa. Kung walang ayuda at wala pang bakuna, nasaan ang hustisya?

Para sa atin, okay lang kung hindi na inaanunsiyo o walang prior announcement sa kung ano ang ibibigay na bakuna. Pero ang mahalaga at nararapat pa rin na pagdating sa lugar ng pagpapabakuna ay maipaalam sa babakunahan kung ano ang ituturok at kung ano ang posibleng side effect nito. Karapatan ‘yun ng bawat Pilipino.

Malinaw kung ano’ng klaseng bakuna ang gusto ng karamihan sa ating mga kababayan at hindi natin maiaalis sa kanila na magkaroon ng pagkiling at timbangin muna kung ano’ng nararapat sa kanila. Huwag nating ipagkait iyon sa kanila.

Patuloy ang ating panawagan para sa mabilis na pamamahagi ng bakuna at ayuda. Kaakibat ng ating pag-iingat, dasal natin ang kaligtasan ng bawat isa, ang pagbangon ng ekonomiya at ang tiyak na kabuhayan para sa mga Pilipino para maitaguyod ang pamilya at ang marangal na pamumuhay.

Ingat tayo palagi. Laban lang!

#LABANLANG