'Pinas, 'di mapipigil ang ICC vs. Duterte — De Lima

ni Angela Fernando @News | Oct. 22, 2024

Photo: Leila De Lima at Rodrigo Duterte - FB

Nagpahayag si dating Senadora at Justice Sec. Leila de Lima nitong Martes na hindi mapipigilan ng pamahalaan ng 'Pinas ang International Criminal Court (ICC) sa pagsasagawa ng imbestigasyon laban kay dating Pangulong Rodrigo Duterte at iba pang opisyal kaugnay ng war on drugs.

Ayon kay De Lima, ang nasabing mga krimen ay may kaparusahan sa ilalim ng batas ng bansa. Tinukoy niya ang Republic Act 9851 o ang Philippine Act on Crimes Against International Humanitarian Law, Genocide, and Other Crimes Against Humanity, na nagpaparusa sa mga krimen laban sa mga indibidwal tulad ng: sadyang pagpatay, extermination, enslavement, arbitrary deportation, pagkakulong o iba pang malubhang paglabag sa kalayaan na umaapak sa mga batayang patakaran ng batas pang-internasyonal at pagpapahirap o torture.

Kasama rin sa mga krimen laban sa mamamayan ang iba pang hindi makataong gawain na may katulad na katangian, o sadyang nagdudulot ng matinding pagdurusa at malubhang pinsala sa katawan, isipan, kalusugan, at iba pa. “Hindi natin [puwedeng] pigilan ang ICC [na mag-imbestiga].

Du'n sila nakatutok [du'n] sa may greatest responsibility,” saad ni de Lima sa mga mambabatas sa imbestigasyon ng House QuadComm kadikit ng war on drugs sa ilalim ng administrasyong Duterte. Matatandaang iniimbestigahan na si Duterte at iba pang matataas na opisyal sa kanyang administrasyon ng ICC kaugnay ng mga nasabing krimen kadikit ng marahas na pagpatay sa mga nakaladkad sa isyu ng droga.

Ayon sa mga record ng pulisya, umabot sa humigit-kumulang 6K ang mga namatay, ngunit iginiit ng mga human rights groups na umabot ito sa 30K, kasama na ang mga biktima ng pamamaslang ng mga ‘vigilante,’ na bunga ng polisiya ni Duterte.

De Lima, absuwelto na sa lahat ng kaso sa droga

ni Eli San Miguel @News | June 24, 2024

Ibinasura na ng Muntinlupa Regional Trial Court ang huling drug case na isinampa ng administrasyong Duterte laban kay dating Senador Leila de Lima.

Inihayag ng abogado ni De Lima na pinagbigyan ng korte ang kanilang demurrer to evidence, na nagpapalaya sa nasasakdal mula sa lahat ng mga drug case na isinampa laban sa kanya.

“Demurrer is granted,” pahayag ni Atty. Boni Tacardon kaugnay sa desisyon ng korte. Inilalarawan ang 'demurrer to evidence' bilang hakbang sa ilalim ng Rules on Criminal Procedure upang i-dismiss ang kaso dahil sa kakulangan ng ebidensya.

Sinasabi ng akusado na hindi sapat ang ebidensya upang patunayan ang kaso, anuman ang katotohanan nito. Kapag pinagbigyan ang hakbang na ito, maibabasura ang kaso na tulad ng pagpapawalang-sala.

Paratang kay De Lima, babawiin ng dating pulis na si Valeroso

ni Eli San Miguel - Trainee @News | December 21, 2023

Nagpaplano ang isa pang saksi na bawiin ang kanyang mga akusasyon laban kay dating Senador Leila de Lima at iba pa na maling naakusahan sa korte.

Sa isang liham na may petsang Disyembre 18 kay Muntinlupa RTC Branch 206, naglalayon si Ret. Police Brig. Gen. Jerry Valeroso na bawiin ang kanyang mga pahayag laban kay De Lima, na layuning palayain ang mga "wrongly charged individuals" sa korte.

Idinadahilan din ni Valeroso na puro tsismis at puno ng kasinungalingan ang mga reklamo laban kay De Lima at sa iba.

“Because my conscience disturbed me, I planned to recant in early 2019. However, fearing for my life and my family’s safety, I lost the courage to do so,” pahayag ni Valeroso.

Binabalak ng retiradong pulis na isumite ang kanyang opisyal na salaysay ng pagbawi sa RTC pagkatapos kumonsulta sa kanyang abogado.

Ika-13 na saksi si Valeroso na bumawi sa kanyang mga pahayag laban kay De Lima, na isang kilalang kritiko ni dating Pangulong Rodrigo Duterte.