Malaysian, huli sa bitbit na P1.1-M sa NAIA

Isang pasaherong Malaysian ang pinigilan ng Bureau of Customs (BOC) sa Ninoy Aquino International Airport (NAIA) makaraang tangkaing ipalusot ang 1.1 milyong Philippine currency.

Kararating lamang ni Gan Kang Hsiung, 32, mula sa Kota Kinabalu kasama ang dalawang kaibigan nito noong Biyernes ng gabi, lulan ng AirAsia Flight Z2-502 nang harangin siya sa Customs area.

Ayon kay Port of NAIA District Collector Mimel Talusan, napansin ng on-duty Customs examiner na hindi mapakali si Gan habang papalabas ng Customs.

Nagduda ang examiner sa mga ikinikilos ni Gan kaya bago ito lumabas sa Customs area ay inatasan siya na dalhin ang kanyang checked-in luggage sa examination lane.

Agad tinulungan ng Customs Intelligence and Investigation Service (CIIS) at Enforcement and Security Service (ESS) ang examiner para alamin ang nilalaman ng bagahe. Lumantad ang tig-P1,000 at 500 peso bills na umabot sa halagang P1.1 milyon.

Mahigpit na ipinagbabawal ng Bangko Sentral ng Pilipinas ang importation at exportation ng Philippine currency alinsunod sa ilalim ng BSP Advisory on Cross-Border Transfer of Local and Foreign Currencies.

Pinahihintulutan lamang na magdala ng pera ang pasahero na hindi lalampas sa P50,000 cash.

Libreng sakay sa kababaihan at transgender women

May handog na libreng sakay ang Philippine Coast Guard (PCG) para sa mga kababaihan at transgender women ngayong Marso.

Ito ay kasunod ng selebrasyon ng National Women’s Month.

Ayon sa PCG, ilulunsad ang “ARANGKADA: Libreng Sakay Para kay Juana” bukas, araw ng Lunes, March 9.

Sa pamamagitan ng Coast Guard Gender and Development Office, magkakaroon ng libreng sakay papunta at mula sa Parañaque Integrated Terminal Exchange (PITX), Mall of Asia (MOA), Anda Circle at Port Area tuwing Lunes at Biyernes ngayong Marso.

Magsisimula ang libreng sakay bukas, Lunes mula alas-6:00 ng umaga hanggang alas-7:00 ng umaga sa PITX bilang point of origin sa pang-umagang iskedyul.

Alas-5:30 ng hapon hanggang alas-6:30 ng hapon naman ang libreng sakay mula Port Area at Anda Circle bilang point of origin sa panghapong iskedyul.

Sinabi ng PCG na walang kailangang iprisintang ID para makapag-avail ng libreng sakay. Dagdag ng ahensiya, sakaling may bakanteng upuan, maaari ring makapag-avail ang mga lalaki ng libreng sakay.

DOLE: Work from home, aprub

Pabor ang Department of Labor and Employment (DOLE) na magpatupad ang ilang kumpanya ng ‘work from home’.

Ito ay para maiwasan ang mga empleyado na mahawahan ng COVID-19.

Ayon kay DOLE Bureau of Working Conditions Director Teresita Cucueco, ang nasabing hakbang ay maaaring ipatupad basta hindi maapektuhan ang trabaho sa kumpanya.

Kahit na ang nasabing hakbang ay hindi magpapatigil sa nasabing pagkalat ng virus ay makatutulong naman ito sa pagbawas ng posibleng pagkalat nito.

Kailangan lamang ng kasunduan sa pagitan ng employer at mga empleyado.