13-anyos, sex slave ng stepdad

Kulong ang 43-anyos na company driver matapos umanong pagsamantalahan ang anak ng kanyang kinakasama sa Malabon City.

Kinilala ni Malabon Police Chief P/Col. Jessie Tamayao ang suspek na si Roland Bacsan, na naaresto ng mga tauhan ng Malabon Police Community Precinct 3 makaraang matuklasan ng ina ng biktimang itinago sa pangalang ‘Anna’ ang ginagawang panghahalay ng ka-live-in sa kanyang anak na ngayon ay 13-anyos na at Grade 8.

Sa imbestigasyon ni P/SSgt. Diana Palmones, taong 2018 nang magsimula ang kalbaryo ng biktima sa kamay ng amain matapos umano itong sapilitang pagsamantalahan ng suspek habang natutulog sa loob ng kanilang bahay sa Bgy. Longos, at tinakot umanong papatayin kapag nagsumbong kaninuman. Pebrero 20 ng kasalukuyang taon nang muling halayin ng suspek ang biktima sa loob din ng kanilang tirahan habang wala ang ina ng dalagita.

Alas-10:00 kamakalawa ng umaga, muling naulit ang panghahalay kaya nagsumbong na ang dalagita sa kanyang ina na naging dahilan upang humingi ng tulong sa pulisya na nagresulta sa pagkakadakip kay Bacsan.

Ani Col. Tamayao, tatlong bilang ng kasong rape ang isasampa ng pulisya laban sa suspek sa piskalya ng Malabon City.

**** RAPIST NG 11-YRS. OLD, NANLABAN SA PULIS, PATAY

Patay ang umano’y nanggahasa sa 11-anyos na babae matapos makaengkuwentro ang mga awtoridad sa Purok Mulawin, Bgy. Isabang, Lucena City, Quezon.

Pinuntahan ng mga awtoridad ang kinaroroonan ng suspek na si Michael Zafranco alyas Zailo, 26, baker, upang arestuhin kaugnay sa panggagahasa sa biktimang si alyas Angie.

Batay sa salaysay ng biktima, pasado alas-5:00 ng hapon, naglalaro siya sa tabi ng ilog kung saan agad siyang hinatak ng suspek at dinala sa madamong lugar saka hinalay.

Binigyan umano siya ng P20 saka nagbanta pa itong huwag magsusumbong kaninuman kundi ay papatayin siya nito.

Agad namang ipinaalam sa kinauukulan ang insidente. Gayunman, papalapit pa lamang sila nang bumunot ng baril ang suspek saka pinaputukan ang mga awtoridad.

Nagkaroon ng palitan ng putok hanggang sa tuluyang bumulagta ang suspek na napag-alamang isa ring tulak ng droga. (Levi Gonzales)

Ayaw magpautang, pinatay

Isang ginang ang pinaslang ng dalawang hindi pa nakikilalang lalaki, kamakalawa ng tanghali sa Sta. Barbarra, Pangasinan.

Kinilala ang biktima na si Sheryl Agusan, nasa hustong edad, may asawa, naninirahan din sa nasabing lugar.

Nagtitinda ang biktima sa restoran nang dumating ang mga suspek at um-order ng ulam at kanin.

Matapos kumain, tinawag ang ginang at walang sabi-sabing binaril ng dalawang beses sa ulo bago nagsitakas sakay ng motorsiklo.

Nabatid na may nakaalitan ang ginang noong nakaraang araw na umuutang at hindi binigyan.

Pinaghahanap na ngayon ng mga pulis ang mga salarin.

Binti, bali.. 2 yrs. old ginulpi ng kinakasama ni Lola

Bali ang kanang binti ng isang 2-anyos na batang lalaki na pinagpapalo umano ng kahoy ng isang construction worker na kinakasama ng kanyang lola sa Sampaloc, Manila, noong Miyerkules.

Ginagamot sa Jose Reyes Memorial Medical Center (JRMMC) ang paslit na si ‘Benjie’, anak ni Christine Anne Pascual, 22, vendor at residente ng Malabon City.

Naaresto naman ng Manila Police District-Station 4 ang suspek na si Cedric Domingo, 28, residente ng Sampaloc, Manila na nahaharap sa reklamong Physical Injury in relation to Republic Act 7610 o Anti-Child Abuse Law.

Batay sa imbestigasyon, nasa pagitan ng alas-7:00 at alas-8:00 ng gabi noong Marso 4, nang mangyari ang insidente sa loob ng bahay ng suspek kung saan sila nagsasama ng lola ng biktima.

Nadiskubre lamang ang pangyayari nang umuwi mula sa trabaho ang lola ng bata na si Charrilyn Juan, na nakitang nakahiga sa kama ang apo na namamaga ang mukha at may mga pasa sa iba’t ibang bahagi ng katawan.

Naiwang nagbabantay umano ang suspek sa bata na nagdahilang nabagsakan ang kanang binti nito ng lamesa kaya nabalian.

Agad na itinakbo nila sa naturang pagamutan ang bata at lingid sa kaalaman ng suspek ay itinawag na ito sa ina ng bata na nagsampa ng reklamo sa pulisya dahilan upang siya ay arestuhin. Naniniwala naman ang kaanak ng bata na sinadyang saktan ito ng suspek.

Batay sa post sa Facebook ng tiyuhin ng biktima, pinagpapalo ng suspek ng kahoy ang bata na ikinabali ng binti nito.