2 tulak, patay sa pulis

Dalawa umanong tulak ng ilegal na droga ang nakaengkuwentro ng mga awtoridad matapos ang buy-bust operation sa Bgy. San Francisco, San Pablo City, Laguna.

Alas-9:35 ng gabi nang ikinasa ng kapulisan ang nasabing operasyon laban sa mga suspek na si Alexander Minalang at isang hindi pa nakikilalang lalaki.

Nagpanggap munang bibili ng shabu ang police asset kung saan nagpositibo ang dalawang tulak ng droga.

Nakatunog umano na mga operatiba ang kanilang katransaksiyon kaya pinaputukan sila na nauwi sa engkuwentro na ikinamatay ng mga suspek.

Nakuha sa kanila ang ilang sachets ng hinihinalang shabu, marked money at baril.

Ang mga suspek ay notoryus umano sa pagiging gun for hire at nagsusuplay ng droga sa Laguna.

Pulis, timbog sa sabong

Inaresto ng Philippine National Police Integrity Monitoring and Enforcement Group (PNP-IMEG) ang isang pulis nang mahuling nagsasabong sa Pangasinan.

Tinukoy ni PNP-IMEG Director Colonel Ronald Lee ang pulis na dinampot habang nasa JBC Cockpit Arena sa Tayug, Pangasinan na si Police Staff Sergeant Sherwin Salazar ng Pangasinan Police Provincial Office 1.

Sinabi ni Lee na mahaharap ngayon si Salazar sa mga kasong administratibo dahil sa grave misconduct.

Alas-8:30 ng gabi ng Sabado nang ilunsad ng PNP-IMEG ang raid sa sabungan kung saan nahuli rin ang dalawa pang sibilyan na sina Fiddie Rosario at Florendo Mando.

Sinasabing ilegal ang sabungan kung saan nakipaglaro si Salazar.

Nauna nang pinaigting ng PNP ang kampanya nito kontra sa mga ilegal na pasugalan sa bansa.

9 tiklo sa P4-M droga

Nasa P4.4 milyong halaga ng marijuana ang nasamsam ng Northern Police District sa siyam katao kabilang ang isang menor-de-edad sa follow-up buy-bust operation sa Hagonoy, Bulacan, kahapon.

Ayon kay NPD-District Director P/Brig. Gen. Ronald Ylagan, alas-3:20 ng madaling-araw nang isagawa ng District Special Operation Unit (DSOU), District Drug Enforcement Unit (DDEU) at District Mobile Force Battalion (DMFB) sa koordinasyon kay P/Lt. Col. Roginald Francisco, hepe ng Hagonoy, Bulacan Police ang buy-bust operation sa Bgy. Iba, Sitio Sandoval, na nagresulta sa pagkakaaresto kina Kevin Paul Jose, 26; Joshua Gabriel Faustino, 23; Anthony Chino Morales, 28; Ken Alec MC Claine Cruz, 22; Tyrone Gipala, 23; Marc Mariano, 22; Kate Desaluna, 18; Ivanah Nanit, 22, at sa 17-anyos na binatilyo.

Narekober sa mga suspek ang nasa 37 kilos ng pinatuyong dahon ng marijuana at fruiting tops na nasa P4,440,000 ang halaga, P20,000 boodle money, kasama ang dalawang P1,000 genuine bill, digital weighing scale, dalawang cellphone at sasakyan.

Ani DSOU Head P/Lt. Col. Giovanni Hycenth Caliao, ang pagkakaaresto sa mga suspek ay kaugnay pa rin sa nauna nilang buy-bust operation sa Lungsod ng Caloocan at Quezon.