2 residente ng condo sa Makati, positibo sa COVID-19

Kinumpirma ng Rockwell Land Corporation na dalawang residente ng isang condominium sa Makati City ang nagpositibo sa COVID-19.

Ayon sa kumpanya, residente ng Joya North Tower sa Rockwell Center ang nasabing mga pasyente.

Kaugnay nito, isa sa mga pasyente ay nasa pangangalaga na ng ospital habang ang dalawang kaanak nito ay napasailalim sa self-quarantine.

Samantala, kinumpirma rin ng Las Piñas City Local Government Unit na naitala ang unang kaso na nagpositibo ng COVID-19. Ayon sa Las Piñas Public Information Office, walang history of travel abroad ang 53-anyos na lalaki na ngayo’y nakaratay sa Las Piñas General Hospital and Trauma Center.

BGH, ibalik sa gobyerno

Aprubado na sa Kongreso ang panukalang-batas na maglalayong ibalik sa national government ang pamamahala sa Benguet General Hospital (BGH) sa La Trinidad.

Ayon kay Benguet Legislative caretaker at ACT-CIS Partylist Rep. Eric Go Yap, na siya ring may akda ng House Bill 6171 o Re-nationalizing the BGH, layunin ng panukala na maibalik sa direktang pamamahala ng DOH ang naturang ospital.

Sa ilalim ng panukala, gagawing 400-bed capacity ang ospital at dadagdagan ng pondo para makabili ito ng mga makabagong kagamitan.

Kasama rin dito ang kumpletong benepisyo ng health workers na nagtatrabaho sa naturang ospital, magandang pasilidad at iba pa na mapakikinabangan ng mga residente ng Benguet.

2 Pinoy sa HK, naka-recover sa COVID-19

Nakarekober na sa COVID-19 ang dalawa pang Filipino sa Hong Kong.

Ayon sa Philippine Consulate General sa HK, maituturing nang COVID-19 free ang dalawang Filipino at nailabas na ng ospital, kahapon.

Sa ngayon, dalawang Filipino COVID-19 positive patients na lang ang nananatili sa ospital.

Dahil dito, nasa anim na anila ang kabuuang bilang ng mga Filipino sa Hong Kong na isinailalim sa quarantine.

Lahat naman ng binabantayang Filipino ay nananatiling asymptomatic.