Natakot maipit sa ‘lockdown’, nagmadali.. Van nahulog sa kanal, titser patay, 13 sugatan

Photo: Abs-cbn News (right)

Patay ang isang guro habang 13 iba pa ang sugatan nang mahulog ang sinasakyan nilang van sa kanal sa Star Tollway sa Ibaan, Batangas.

Kabilang sa mga nasugatan ang drayber, 5 estudyante at 7 guro, na galing sa National Schools Press Conference sa Tuguegarao, Cagayan. Patay naman ang kasamahan nilang guro na si Joy Maming.

Pauwi na ng Occidental Mindoro ang mga sakay ng van nang mahulog ang sasakyan. Ayon kay Adelardo Malalauan, nagdesisyon umano silang umuwi agad kahit hindi pa tapos ang programa dahil sa takot na maipit sa pagpapatupad ng community quarantine.

“We decided na umuwi na kahapon kasi nga dahil nga balita namin na nagla-lockdown na ang Manila at Batangas,” ani Malalauan. Ayon naman sa drayber ng van na si Mark Herwhin Tugade, bago pa lamang niyang pinalitan ang karelyebong drayber pero, hindi na nito kinaya ang pagod sa haba ng biyahe kaya siya umano ay nakatulog.

“Hindi na kinaya, antok. Maaga lang kami baka mag-lockdown hindi kami makauwi ng Mindoro,” ani Tugade.

Mga bata, bawal sa computer shop

Sinuyod ng mga tauhan ng Manila Police District-Special Mayor’s Reaction Team (SMaRT), ang iba’t ibang computer shop at mga kalsada at pinauwi ang mga kabataan na nakitang naglalaro at nasa mga kalsada sa ilang lugar sa Maynila.

Nabatid na daan-daang kabataan ang napauwi sa kani-kanilang bahay at maging ang may-ari ng computer shop ay pinagsabihan din ng SMaRT.

Nabatid na nagbigay ng direktiba si SMaRT Chief Police Major Rosalino Ibay, Jr., sa kanyang mga tauhan na suyurin ang kahabaan ng Bilibid Viejo, Loyola, Quiapo at San Marcelino upang sitahin ang mga estudyante na patuloy na pumupunta sa mga pampublikong lugar at bigyan sila ng babala bago pauwiin.

Ito umano ay alinsunod sa deklarasyon ni Pangulong Rodrigo Duterte na suspendihin ang mga klase sa buong Metro Manila dahil sa banta ng COVID-19.

Nanawagan din si Manila City Mayor Francisco ‘Isko Moreno’ Domagoso sa mga estudyante na seryosohin ang banta ng COVID-19 sa lungsod at iwasang lumabas kung hindi naman kinakailangan.

P3 bawas-presyo sa gas

Muling nagpatupad ng malakihang bawas-presyo sa produktong petrolyo, kahapon ng tanghali.

Sa kanilang advisory, nagbawas ng P3 kada litro ng diesel at gasolina ang Phoenix Petroleum, epektibo kahapon ng alas-12:00 ng tanghali (Marso13).

Ang nasabing rollback ay kaugnay ng paggalaw ng presyo sa world market.

Samantala, Martes ng umaga madalas na ipinatutupad ang price adjustment ng mga kumpanya ng langis.