Mister, depressed... Misis at anak na edad 8 at 12 pinagsasaksak

Sugatan ang tatlong mag-iina habang arestado naman at dinala sa National Center for Mental Health (NCMH) ng mga tauhan ng barangay ang kanilang padre de pamilya matapos pagsasaksakin ang kanyang misis at dalawang anak kahapon mg madaling-araw sa Tondo, Manila.

Ginagamot sa Jose Reyes Memorial Medical Center ang mag-iinang sina Rachel Guevarra, 35, at mga anak nitong babae na nasa edad 12 at 8, sanhi ng mga tama ng saksak sa iba't ibang bahagi ng katawan.

Habang arestado naman ang suspek na si Paulo Guevarra, 41.

Batay sa imbestigasyon ng MPD-Police Station 1, ala-1:55 ng madaling-araw nang mangyari ang insidente sa bahay ng mag-anak.

Sa kabila na may tama ng saksak, nagawa ni Rachel na makasigaw at makahingi ng tulong kaya nakapagresponde agad ang barangay.

Habang alas-6:45 ng umaga nang makarating sa himpilan ng pulisya ang insidente.

Una umanong isinugod ang mag-iina sa Tondo Medical Center pero, kalaunan ay inilipat sa JRMMC.

Nabatid kay Loretta Guevarra, kapatid ng suspek na dumaranas umano ng depresyon ang kanyang kapatid at dahil sa umiiral na enhanced community quarantine (ECQ) ay hindi na nila ito napasuri sa doktor dahilan para mas lalong lumala ang sakit nito sa pag-iisip.

Posibleng ang dinaranas na depresyon ang nagtulak sa suspek para pagsasaksakin ang kanyang mag-iina.

Sa 8,064 COVID-19 cases, 25 lamang ang kritikal — DOH

Maliit na bilang lamang ng mga nagpopositibo sa covid-19 ang nasa kritikal na sitwasyon. Batay sa datos ng DOH, sa 8,064 active cases ng covid 19 ay nasa 25 lamang ang kritikal.

Ito ang mga pasyente na kinakailangang intubated.

Habang nasa 53 pasyente naman ang nasa severe condition. Ang mga ito ay karaniwang may pneumonia at hirap sa paghinga.

Aabot naman sa 7,081 ang nasa mild condition at mild lamang ang sintomas ng virus.

Habang ang 11.2% o ang 905 sa mga kasong ito ay asymptomatic o walang sintomas ng virus. Ayon sa DOH, 117 sa mga ito ay sa bahay nagpapagaling at naka-isolate lamang.

25-day-old na sanggol, patay sa COVID-19

Isang 25-day-old na sanggol ang pumanaw sa Coronavirus Disease 2019 sa Davao City.

Ayon sa Department of Health (DOH) Davao Region, ang lalaking sanggol ay mula sa Barangay 23-C. Iniimbestigahan na ng DOH Region 9 ang history ng exposure ng sanggol.

Gayunman, ang ospital kung saan ipinanganak ang bata ay mayroong mga positibong kaso ng COVID-19.

Napag-alaman na Mayo 7 nang dalhin sa Southern Philippines Medical Center ang bata dahil sa LBM at lagnat. Makalipas ang dalawang araw ay pumanaw ito.