1,261 pares, lumahok sa kasalang bayan

ni Lolet Abania | March 20, 2022

Mahigit sa 1,000 magsing-irog ang sumali sa kasalang bayan na ginanap sa bayan Lala sa Lanao del Norte, ngayong Linggo.

Ayon kay Mayor Angel Yap, umabot sa 1,261 pares ang nagpakasal, kung saan isang mangingisdang may disability at babaeng kanyang minamahal na naghintay pa ng 12-taon na sa wakas ay magagamit na rin ang apelyido nito.

Isa ring lalaking senior citizen ang nakipag-isang-dibdib sa live-in partner nito na 14-taong nagsasama. Inamin nilang hindi sila agad nagpakasal dahilan sa kulang umano ang kanilang budget.

Sinabi naman ng iba pang ikinasal na napakahalaga ng mga papel na kanilang panghahawakan dahil madalas anila ay hinahanapan sila ng mag papeles kapag nasa ospital o kaya sa iskuwelahan ng mga bata at wala silang maipakita.

Ayon naman kay Vice Mayor Cesar Poloy Yap Jr., mahalagang maging legal ang pagsasama ng mag-asawa.

“Bukod sa may basbas na ang kanilang pagsasama, kikilalanin na lehitimo ang kanilang mga anak.

Irerekognisa na ng pamahalaan ang kanilang karapatan sa kita, social security benefits, health at life insurance, pensyon, at iba pang mga benepisyo bilang asawa. Ang legal na pagsasama ay nagbibigay ng kasiguruhan sa pamilya,” paliwanag ni Yap.

Ang mga ikinasal ay nagmula sa 27 barangay sa naturang bayan. At bilang pagdiriwang ng Araw ng Lala, kaya isinagawa ang kasalang bayan.

Gayundin, pinayagan na ang kasalang bayan na ginanap sa open space dahil na rin sa isinailalim na ang lugar sa Alert Level 1. Ipinatupad din ng lokal na pamahalaan ang mga health protocols para maiwasan ang hawahan ng COVID-19 sa mga ikinasal.

Radio news anchor sa Lanao del Norte, kinatay

ni Lolet Abania | March 18, 2022

Isang radio news anchor na nakabase sa Lanao del Norte ang natagpuang patay sa loob ng kanyang tirahan na tadtad ng saksak sa katawan nitong Huwebes ng umaga.

Kinilala ng mga awtoridad ang biktima na si Audrey Gaid Estrada, 59-anyos, biyuda at radio news anchor ng 101.3 Grace Covenant FM sa Bacolod.

Ayon kay Police Lieutenant Colonel Salman Saad ng Lanao del Norte Police, natagpuan ng isang motorcycle shop owner ang wala nang buhay na si Estrada nang pumunta ito sa bahay ng biktima.

Agad na nagtungo ang shop owner sa kapatid nitong babae para ipaalam ang nakita. Habang ini-report naman ng kapatid ng shop owner ang insidente sa pulisya. Dinala pa ng mga pulis si Estrada sa pinakamalapit na ospital subalit, idineklarang dead-on-arrival ang biktima matapos na magtamo ng 15 tama ng saksak sa iba’t ibang bahagi ng katawan.

Nagsasagawa na ang mga awtoridad ng imbestigasyon sa pagkakakilanlan ng suspek at ang motibo nito sa pagpatay. Ayon sa Presidential Task Force on Media Security (PTFoMS) na “mariing kinokondena” nila ang nangyaring pagpatay sa radio news anchor, habang hiniling na rin sa mga concerned law enforcement agencies na magsagawa ng anila, “swift and thorough investigation”.

“We send our deepest condolences to the family, loved ones, and colleagues of Ms. Estrada,” sabi ni PTFoMS executive director Jose Joel Sy Egco sa isang statement ngayong Biyernes.

“Rest assured that this government will not rest until the perpetrator of this heinous crime is brought to justice,” ani pa ni Egco.

Sinabi pa ng task force na ang lokal na gobyerno ng Bacolod ay nag-alok na rin ng pabuya sa sinuman na makapagbibigay ng impormasyon na magreresulta para sa ikadarakip ng suspek.

Binanggit naman ni Egco na base sa mga ebidensiyang nakalap, naniniwala si Police Lieutenant Colonel Michelle Olaivar ng Police Regional Office (PRO) 10 public information office (PIO) na ang pagpatay sa biktima ay walang kaugnayan sa trabaho nito na isang radio announcer.

5 anak patay sa landslide, mag-asawa, nadale rin

ni Lolet Abania | November 14, 2021

Patay ang limang bata habang dalawa pa sa isang pamilya ang nasugatan matapos ang naganap na landslide sa Illigan City, Lanao del Norte ngayong Linggo.

Sa inisyal na imbestigasyon ng pulisya, naganap ang pagguho bandang alas-6:00 ng umaga sa Purok 2, Sitio Sawsaw, Taparak, Barangay Mandulog, kung saan walong bahay malapit sa ilog ang naapektuhan.

Kinilala ni Mandulog Barangay Captain Abungal Pagsidan Cauntongan ang mga biktima, lahat sila ay pamilya Barulan na sina Shemabel, 7-buwan-gulang; Trishamae, 3; John Kent, 6; Sean, 4 at CJ Barulan, 8-anyos.

Sugatan naman ang mag-asawang sina Sheila Mae Barulan, 26 at Jessie Barulan 24 dahil sa landslide.

Sinabi ni Cauntongan, walong kabahayan ang nawasak habang ang tirahan ng mga Barulan ang natabunan nang husto ng lupa.

Ayon kay Iligan City Police Office spokesperson Police Major Zandrex Panolong, naganap ang landslide matapos ang walang humpay na malalakas na buhos ng ulan sa Iligan City, kung saan labis na naapektuhan ang mga bahay na malapit sa ilog.

Sinabi rin ni Panolong na maaga pa nang mangyari ang insidente, kaya nasa loob ng bahay at natutulog pa ang lahat ng miyembro ng pamilya Barulan.

Agad na humingi si Cauntongan ng assistance mula sa lokal na pamahalaan para sa clearing operation at para na rin sa pagbabalik ng power supply sa naturang lugar.