NCR, MECQ simula sa Agosto 21 hanggang 31

ni Ronalyn Seminiano Reonico | August 20, 2021

Inaprubahan ni Pangulong Rodrigo Duterte at ng Inter-Agency Task Force (IATF) na isailalim ang National Capital Region (NCR) at ang Laguna sa modified enhanced community quarantine (MECQ) simula sa Agosto 21 hanggang August 31, ayon kay Presidential Spokesperson Harry Roque.

Isasailalim din ang Bataan sa MECQ simula sa Agosto 23 hanggang sa August 31.

Saad pa ni Roque, "These latest classifications are without prejudice to the strict implementation of granular lockdowns.”

Samantala, ayon din kay Roque, bawal pa rin ang mga al fresco dine-in services at personal care services katulad ng mga beauty salons, beauty parlors, barbershops at nail spas sa NCR, Laguna at Bataan.

Mananatili rin umanong virtual ang pagsasagawa ng mga religious gatherings sa mga nabanggit na lugar.

P3.693 B dagdag-ayuda sa Metro Manila, Bataan at Laguna, aprub kay P-Duterte

ni Lolet Abania | August 12, 2021

Inaprubahan na ni Pangulong Rodrigo Duterte ang kabuuang P3.693 bilyon karagdagang pondo para sa cash assistance program sa Metro Manila, Bataan at Laguna.

Ayon kay Department of the Interior and Local Government (DILG) spokesperson Undersecretary Jonathan Malaya, ang P2.715 bilyon ay ibibigay sa Laguna, P700 milyon para sa Bataan, at P278 milyon sa Metro Manila.

“The President has approved ECQ Ayuda as follows: P700M - Bataan, P2.715B - Laguna,” ani Malaya sa isang text message ngayong Huwebes.

“Yes, the President also approved an additional P278M for [Metro] Manila as requested by the DILG and NCR LGUs,” dagdag ni Malaya.

Pinayuhan naman ang ahensiya ng Department of Budget and Management (DBM) na ayon kay Malaya, ang budget ay ida-download na lamang sa kani-kanyang local governments ng Huwebes o Biyernes.

Isinailalim ang Metro Manila, Laguna, at Bataan sa enhanced community quarantine (ECQ) para maiwasan ang hawaan at pagkalat pa ng Delta COVID-19 variant sa bansa.

Una nang naglabas ang DBM ng P10.894 bilyon upang makapagbigay ng financial assistance sa mga apektadong indibidwal at pamilya sa National Capital Region.

Ang naturang ayuda ay nasa halagang P1,000 kada indibidwal o P4,000 kada pamilya.

18 kaso ng Delta variant, naitala sa Laguna

ni Lolet Abania | July 27, 2021

Kinumpirma ng pamahalaang panlalawigan ng Laguna ngayong Martes ang 18 kaso ng Delta variant ng COVID-19 na nai-record sa probinsiya.

Sa isang Facebook post, ayon kay Laguna Governor Ramil Hernandez, ang mga pasyente ay posibleng nakarekober na o gumaling na sa sakit dahil sa umaabot sa dalawa o tatlong linggo bago matukoy ang COVID-19 variant.

“Subalit hindi pa rin nawawala ang posibilidad na sila ay maaaring nakahawa bago na-test at na-clear, lalo kung nagkaroon ng exposure at close contact,” ani Hernandez.

Gayunman, pinaalalahanan ni Hernandez ang kanyang mga nasasakupan na mas maging maingat, kabilang na rito ang mga fully vaccinated, iwasan ang mga matataong lugar at laging isagawa ang minimum health protocols.

Ang Laguna ay isa sa mga lugar na isinailalim sa GCQ with heightened restrictions hanggang Hulyo 31. Sa ngayon, nakapagtala ang bansa ng 119 Delta variant cases, habang 12 dito ay nananatiling active cases.