Nangangailangan ngayon ng nurses… 25 staff ng Laguna Medical Center, nagpositibo sa COVID-19

ni Jasmin Joy Evangelista | September 17, 2021

Dalawampu’t limang kawani ng Laguna Medical Center ang tinamaan ng COVID-19 habang 25 na iba pa ang naka-quarantine naman ngayon.

“Humihingi kami ng tulong po kung pwede makapag-augment ang ating Department of Health kasi bukod sa kulang sa nurse dahil sa naka quarantine, madami pa rin po kaming nurses na umalis at nag-resign na din po, may mga offer sa ibang bansa. Hindi pa po napapalitan. Ang daming opening pero wala pong kapalit,” pahayag ni Dr. Christina Marquez, infectious disease unit head ng ospital.

“Yan po ay mga personnel na hindi lang po mga nurses, kasama po ang ating nasa admin staff. Mostly po nakukuha nila ito sa community hindi po dito sa ospital,” sabi niya.

Samantala, puno pa rin daw ang kanilang ospital dahil sa mga pasyente ng COVID-19.

“Full capacity pa rin tayo ngayon kasi po ang ating mga waiting na pasyente ay madami po sa ating pasilidad so kung meron pong madi-discharge, sumakabilang-buhay na pasyente o magne-negative ay agad na meron itong kapalit na naghihintay dito sa ating pasilidad dahil napakadami ngang kaso na nahihirapan huminga o yung iba kahit po yung positive natatanggap na po namin kahit hindi po kami COVID referral center,” saad ni Marquez.

Ang dating 200-bed capacity ay nasa 125 na lamang daw ngayon para masunod ang tamang distansiya.

Laguna Gov. Hernandez, positive sa COVID

ni Lolet Abania | August 23, 2021

Inianunsiyo ni Laguna Governor Ramil Hernandez kagabi, Linggo, na nagpositibo siya sa test sa COVID-19.

“Bahagi na ng ating trabaho bilang public servant ang pakikisalamuha sa maraming iba’t ibang tao sa araw-araw. Kaya nga po siguro kahit lubos ang aking pag-iingat ay hindi na rin naiwasan na ako ay magpositibo sa COVID-19,” post ni Hernandez sa kanyang Facebook page.

Sinabi ni Hernandez na natanggap niya ang resulta ng kanyang test nitong Sabado.

Kasalukuyang naka-home quarantine si Hernandez at nakakaramdam lamang ng mild symptoms.

Gayunman, tiniyak ng gobernador sa kanyang mga kababayan na sa kabila ng kanyang sakit, mananatili ang provincial government na operational, habang siya ay nagtatrabaho sa bahay.

“Sa kabila po nito ay sinisigurado ko po na hindi matitigil ang operasyon ng Pamahalaang Panlalawigan ng Laguna at tuloy-tuloy pa rin ang ating Serbisyong Tama kahit ako po ay naka-work from home,” post pa ni Hernandez.

Ayon pa kay Hernandez, patuloy siyang nakikipag-ugnayan sa kanilang police provincial director, provincial administrator, at mga department heads ng provincial government para matiyak na nagagawa nang maayos ang kanilang trabaho.

Hiniling naman ng gobernador sa kanyang mga constituents na ipagdasal ang agaran niyang paggaling, habang patuloy silang sumusunod sa mga health protocols at kung maaari ay magpabakuna.

Putol-kuryente, suspendido sa MECQ areas

ni Ronalyn Seminiano Reonico | August 21, 2021

Sinuspinde ng Manila Electric Co. (Meralco) ang disconnection activities sa mga lugar na nasa ilalim ng modified enhanced community quarantine (MECQ) hanggang sa katapusan ng Agosto.

Ayon sa Meralco, wala munang disconnection activites sa National Capital Region (NCR) at Laguna simula ngayong araw, August 21 hanggang sa Agosto 31.

Saad pa ng Meralco, “With the government’s announcement of MECQ in NCR, Bulacan, Cavite, Laguna, Lucena City, and Rizal until August 31, 2021, we are suspending disconnection activities in these areas as we prioritize your safety.”

Samantala, ayon sa Meralco, naka-skeleton workforce ang kanilang mga business centers (BCs) ayon na rin sa IATF guidelines.