18-anyos na estudyante, patay sa umano’y hazing sa Laguna

ni Lolet Abania | March 21, 2022

Patay na nang dumating sa ospital ang isang 18-anyos na estudyante dahil umano sa hazing sa Kalayaan, Laguna, nitong Linggo.

Kinilala ng mga awtoridad ang biktima na si Reymarc Rabutazo, residente ng Barangay Longos, Kalayaan, Laguna.

Batay sa report ng Kalayaan Municipal Police Station (MPS), nakatanggap sila ng impormasyon kahapon, na isang binata umano ang nasawi matapos na malunod nito sa ilog. Agad na rumesponde ang pulisya sa lugar subalit nabatid na sumailalim ito sa umano’y hazing o initiation rites ng Tau Gamma Phi Fraternity.

Sinabi naman ng lola ng biktima sa pulisya na isinugod na ang kanyang apo sa General Cailles Hospital sa Pakil, Laguna, subalit idineklara ring dead-on-arrival ng mga doktor.

Ayon sa mga awtoridad, nakakita umano ng mga pasa sa mga hita ng biktima.

Gayunman, humiling na ang Kalayaan MPS upang ma-autopsy ang bangkay ng estudyanteng biktima.

Sinabi rin ng pulisya na nakikipagtulungan na umano sa kanila ang ilang miyembro at opisyal ng Tau Gamma Phi ng nasabing lalawigan.

Live-in partners tiklo sa pagbebenta ng umano’y pekeng gamot

ni Jasmin Joy Evangelista | February 3, 2022

Arestado ang isang tricycle driver at live-in partner nito matapos umanong magbenta ng pekeng paracetamol sa Bay, Laguna. 

Ayon sa report, hinuli ang 2 suspek matapos nilang bentahan ang mga pulis na nagpanggap na buyer. 

Tatlong kahon ng paracetamol ang kanilang inorder at pinagdududahang peke ang mga ito dahil hindi sila nakapagpakita ng kaukulang dokumento at permit na nagpapatunay na mayroon silang pahintulot na makapagbenta ng mga ito.

Nakuha rin sa mga suspek ang anim pang kahon na may 900 capsules at tablets ng ibuprofen, paracetamol, mga gamot para sa sipon, higit 100 banig ng Loperamide, antacid, Mefenamic acid, at pain relievers.

Dadalhin ang mga ito sa Food and Drug Administration sa Muntinlupa City para sumailalim sa pagsusuri.

Trak, nahulog sa ilog, 4 nadale sa bumagsak na tulay

ni Lolet Abania | January 29, 2022

Apat na katao ang nasugatan na lulan ng 12-wheeler truck, matapos na ang kanilang sinasakyan ay bumulusok sa ilog kasunod ng pagbagsak ng tulay sa Majayjay, Laguna ngayong Sabado.

Ayon kay Laguna Provincial Police Office director Police Colonel Rogart Campo, naganap ang aksidente sa Barangay San Isidro, kung saan sakay ang apat na biktima ng 12-wheeler truck na galing sa Bacolor, Pampanga at nagta-transport ng buhangin patungong town proper via Provincial Road nang mag-collapse ang tulay na bakal.

Nahulog ang truck sa ilog na nasa 80 talampakang lalim.

Sinabi ng mga awtoridad na maaaring bumagsak ang tulay dahil sa mabigat na cargo na dala ng 12-wheeler truck.

“Itong tulay ay one-way lamang at 5 tons lamang ang capacity... May mga truck na dumadaan na lagpas 5 tons... Itong truck na naaksidente ay 12 tons na po at may dala pa itong buhangin,” paliwanag ni Majayjay, Laguna Police chief Police Captain Ruffy Taduyo sa isang interview ngayong Sabado.

“Maaaring masampahan ng kasong reckless imprudence resulting to damage to property ang driver dahil dumaan siya sa tulay kahit sobrang bigat ng dala ng truck,” sabi pa ni Taduyo.

Ayon kay Taduyo, agad na dinala ang apat na nasugatan sa ospital para gamutin, kung saan nagtamo ang mga ito ng minor injuries.

Sa ngayon, ang bahagi ng apektadong kalsada ay isinara habang ang mga motorista ay pinayuhang maghanap muna ng alternatibong ruta.

“Dahil sa pagbigay ng tulay, maaaring dumaan sa bayan ng Liliw... madaragdagan ang travel time,” saad ni Taduyo.