Labor secretary may kapangyarihang ipatigil ang kontraktuwalisasyon sa bansa — Ka Leody

ni Jasmin Joy Evangelista | February 24, 2022

May kapangyarihan umanong ipatigil ng labor secretary ng bansa ang kontraktuwalisasyon, ayon kay presidential aspirant at labor leader na si Leody de Guzman nitong Miyerkules.

Ayon kay De Guzman, sa nakalipas na 30 taon ay hindi nagawa ng mga naging labor secretaries ng bansa na ipatigil ang kontraktuwalisasyon dahil sa impluwensiya ng mga kapitalista o dahil sa paniniwala na makikinabang ang mga mamamayan kapag binuhay ang mga negosyante.

“Simple lang ‘yan. May kapangyarihan ang Department of Labor, ‘yung secretary of labor to restrict or prohibit ‘yang sistemang ‘yan,” ani De Guzman sa forum na inorganisa ng University of Santo Tomas.

“Isang order lang ng secretary of labor na i-prohibit ‘yang contractualization ay mawawala na. Hindi nga lang ginagawa dahil ‘yung mga nakaupong gobyerno, mula noon hanggang sa ngayon, ay nasa bulsa ng kapitalista or naniniwala sa idea na pagka binuhay mo ‘yung mga negosyante, ‘pag napuno ‘yung bulsa nila, aawas, at makikinabang ang bayan, makikinabang ang mamamayan,” giit niya.

Gayunman, sinabi ni De Guzman na hindi naman nababawasan ang yaman ng mga kapitalista.

“Hindi naman umaawas dahil lumolobo ‘yung mga bulsa nila. Habang nilalagyan mo ng tubo nila, lumolobo nang lumolobo. Kaya walang tumagas. Hindi nag-trickle. Kaya walang nakinabang—napakinabangan ng mamamayan,” paliwanag niya.

Sakali raw na manalo siya sa pagka-pangulo, ipag-uutos niya na pabilisin ang pagtatapos ng kontraktuwalisasyon sa bansa.

“Kaya simple lang ‘yan. Order lang ng secretary of labor o kung hindi, kung nagmamadali ako — dahil sa ilalim ko ‘yan, kung ako ay presidente — maglalabas lang ako ng executive order,” aniya.

Bukod sa planong tapusin ang kontraktuwalisasyon, nais din umano ni De Guzman na magpatupad ng 20-percent wealth tax sa top 500 na pinakamayaman sa bansa upang mapigilan ang inequality gap sa pagitan ng mayaman at mahirap.

Si De Guzman ay tumatakbo sa ilalim ng Partido Lakas ng Masa kasama si Walden Bello bilang kanyang vice president.

P5 B budget sa quarantine ng mga OFWS, aprub

ni Lolet Abania | May 27, 2021

Inaprubahan na ni Pangulong Rodrigo Duterte ang karagdagang P5 bilyong badyet para sa mga gastusin sa isinasagawang quarantine ng mga returning Overseas Filipino Workers (OFWs), ayon kay Presidential Spokesperson Harry Roque.

“The President approved an additional P5 billion budget and this was confirmed by Labor Secretary Silvestre Bello III,” ani Roque sa briefing ngayong Huwebes.

“This budget will pay for the quarantine hotel expenses because of the longer quarantine period that we require for our returning OFWs,” dagdag ng kalihim.

Ipinatutupad ng pamahalaan para sa mga returning OFWs ang pagsasailalim sa quarantine sa isang pasilidad ng gobyerno nang 10 araw habang sasailalim sa RT-PCR test sa ika-7 araw ng quarantine.

Sakaling ang kanilang test ay negative, kailangan na lamang tapusin ng mga naturang OFWs ang 14-day quarantine sa kanilang tahanan.

Matatandaang binanggit ni Overseas Workers Welfare Administration (OWWA) Chief Hans Leo Cacdac na ang ahensiya ay mangangailangan ng P9 bilyong karagdagang badyet upang tugunan ang mahabang quarantine period na kailangan ng mga returning OFWs sa gitna ng pagkakaroon pa ng bagong variants ng COVID-19. Mahigit sa 500,000 OFWs ang na-repatriate simula pa ng COVID-19 pandemic kung saan labis na naapektuhan ang mga negosyo at iba pang industriya sa buong mundo.

Employer na hihirit ng 'No vaccine, no work', kakasuhan

ni Ronalyn Seminiano Reonico | March 6, 2021

Pinalagan ng Department of Labor and Employment ang diumano'y “no vaccine, no work” policy ng ilang establisimyento. Pahayag ni Labor Secretary Silvestre Bello III, "‘Yung no vaccine, no work, illegal 'yan, bawal ‘yan."

Hindi umano maaaring pilitin ang mga manggagawa na magpabakuna laban sa COVID-19 kung ayaw nila. Saad ni Bello, "Kaya wala pong ganyang patakaran. Kung sino man 'yung employer na gumagawa niyan, alam niya na mali ang ginagawa niya."

Ipinagbigay-alam ng Associated Labor Union (ALU) sa DOLE ang natanggap nilang hinaing ng mga manggagawa lalo na ang mga hotel, restaurant at BPO workers na diumano'y inoobliga silang magpabakuna.

Pahayag ni Alan Tanjusay, spokesperson ng ALU-Trade Union Congress of the Philippines, "Meron tayong tinatawag na Anti-Discrimination Law.

‘Yung discrimination ay iba-ibang klase na porma at uri ngunit sa aming paningin, isa itong uri ng discrimination. "So, kung mayroong magrereklamong manggagawa, tutulungan naming magsampa ng kaso."