Total deployment ban ng OFW sa Kuwait, tablado kay P-BBM

ni Mylene Alfonso | May 27, 2023

Kinontra ni Pangulong Ferdinand Marcos, Jr., na magpatupad ng total deployment ban ng overseas Filipino worker (OFW) sa Kuwait.

Ginawa ni Marcos ang pahayag kasunod ng panawagan ni Pangasinan 3rd District Rep. Rachel Arenas na itigil na ang pagpapadala sa mga bansa sa Middle East dahil sa pang-aabuso ng mga employer.

"I’m never very comfortable ‘yung nagba-ban na ganun dahil parang ang pag-ban sinasabi mo forever na 'yan, hindi na puwede," wika ni Marcos sa isang panayam matapos pangunahan ang ika-125 anibersaryo ng Philippine Navy sa Maynila.

"I don't know, 'yung sometimes overreaction 'yun na, basta't ban lang tayo ng ban, hindi naman tama," aniya pa.

Ayon sa Pangulo, magpapatuloy ang gobyerno ng Pilipinas sa pakikipagnegosasyon sa gobyerno ng Kuwait kaugnay sa pansamantalang suspensiyon nila sa pagbibigay ng visa sa mga Pilipino.

"Ang naging problema natin, tayo ang binan ng Kuwait, at ayaw na magpa-issue ng mga bagong visa. Hindi kami nagkakasundo dahil sinasabi nila may paglabag daw tayo sa kanilang mga rules, wala naman kaming nakikita, kaya’t 'yan ang naging situation,”

paliwanag ni Marcos.

"But you know I don’t want to burn any bridges… We have to react to the situation as it is and I think the proper reaction is to take the decision of the Kuwaiti government to no longer issue new visas," hirit ni Marcos.

'Pinas, lumabag sa kasunduan.. Pinoy, bawal sa Kuwait

ni Madel Moratillo | May 12, 2023

Ititigil muna umano pansamantala ng gobyerno ng Kuwait ang pagbibigay ng visa sa mga Pinoy.

Ginawa ng Kuwaiti Interior Ministry ang anunsyo kasunod ng umano'y paglabag ng gobyerno ng Pilipinas sa bilateral agreement ng dalawang bansa.

Hindi naman binanggit ang sinasabing nilabag na probisyon ng kasunduan.

Matatandaang noong Pebrero, nagpatupad ng deployment ban ang Department of Migrant Workers sa mga first time domestic workers sa Kuwait.

Kasunod ito ng pagkamatay ng Pinay overseas worker na si Julleebee Ranara.

Bukod dito, marami na umanong ulat ng pagmamaltrato sa mga overseas Filipino

worker sa nasabing bansa.

Ayon naman sa DMW, wala pa silang pormal na komunikasyon na natanggap mula sa Kuwait patungkol sa pagpapatigil umano ng pagbibigay ng visa sa mga Filipino.

336 OFWs dumating sa ‘Pinas mula sa Kuwait

ni Lolet Abania | December 19, 2021

Nasa kabuuang 336 overseas Filipino workers (OFWs) ang dumating sa Pilipinas mula sa Kuwait ngayong Linggo, ayon sa Department of Labor and Employment.

Sa isang post sa Facebook, sinabi ng DOLE na alas-10:30 ng umaga dumating sa Ninoy Aquino International Airport (NAIA) Terminal 1 ang mga nasabing OFWs.

“Ngayon po ang unang araw ng ating Pamasko at Bagong Taong salubong sa mga nanunumbalik na mga OFW. Kayo po ang kauna-unahan nating sasalubungin,” ani Overseas Workers Welfare administration (OWWA) Administrator Hans Leo Cacdac.

Nakatanggap naman ang mga OFWs ng mga pasalubong (souvenir items) at cash gifts na mula sa DOLE at OWWA.

Ang mass repatriation flight na ito ng mga OFWs mula sa Kuwait ay bahagi ng “Pamaskong Handog sa OFW” program ng DOLE at ng OWWA.