Kim Ji Soo, gustong mag-ala-John Wick

ni Eli San Miguel @Entertainment News | July 3, 2024

Pursigido ang Korean actor na si Kim Ji Soo na magpatuloy sa pagganap ng mga mas challenging na karakter. Ibinahagi niya na gusto niyang gampanan ang mga papel tulad ng kanyang karakter bilang ‘Adrian Park’ sa ‘Black Rider.’

“Actually, I aspire to have a role similar to John Wick,” pahayag pa niya. Kilala ang karakter na si John Wick bilang legendary assassin na ginampanan ni Keanu Reeves sa film series na may pamagat ding 'John Wick.'

Si Kim Ji Soo ay kasalukuyang bahagi ng "Black Rider," na pinagbibidahan ni Ruru Madrid. Naging matunog sa mga netizens ang teaser kung saan ipinapakita na tinuturuan niya si Yassi Pressman kung paano magpaputok ng baril.

Sa kasamaang palad, hindi sila nagkaroon ng pagkakataon na magkasama ni Ruru sa serye. Kilala si Kim Ji Soo sa kanyang mga papel sa mga K-drama tulad ng "Strong Girl Bong Soon" at "Moon Lovers: Scarlet Heart Ryeo."

North Korea, nagpaputok ng ballistic missiles

ni Eli San Miguel @World News | July 1, 2024

Inihayag ng militar ng South Korea na nagpaputok ang North Korea ng isang short-range ballistic missile at isa pang ballistic missile ngayong Lunes.

Pinaputok ang unang short-range ballistic missile patungong hilagang silangan, bandang 5:05 ng madaling-araw (2005 Sunday GMT) mula sa malapit na bahagi sa Changyon, South Hwanghae Province sa North Korea.

Sinabi ng Joint Chiefs of Staff ng South Korea na natuklasan ang isa pang 'di natukoy na ballistic missile, bandang 5:15 ng madaling-araw mula sa parehong lugar. Pumutok ang unang missile ng mga 600 kilometro (373 milya).

Pumutok naman ang pangalawang missile ng mga 120 kilometro. Ayon pa sa pahayag, pinag-aaralan ng South Korea at ng United States ang launching ng mga ito.

Noong Linggo, kinundena ng North Korea ang isang joint military exercise ng South Korea, Japan, at United States na ginanap noong nakaraang buwan at nagbabala ng nakababahalang tugon laban sa gayong mga pagsasanay.

Chen, Baekhyun, at Xiumin ng EXO, kinasuhan ang SM Ent

ni Angela Fernando @Entertainment News | June 27, 2024

Naghain ng kaso sina Chen, Baekhyun, at Xiumin ng kilalang K-pop boy group na EXO laban sa mga executives ng SM Entertainment dahil sa fraud.

Ibinahagi ng isang opisyal nu'ng Hunyo 26 mula sa ahensya nina Chen, Baekhyun, at Xiumin na INB100 ang isang pahayag patungkol sa kanilang pagsasampa ng kaso.

“Yesterday, the members and INB100 filed a complaint with the Seongdong Police Station in Seoul against SM Entertainment’s CAO (chief A&R officer) Lee Sung Soo and co-CEO Tak Young Jun for fraud in violation of the Act on the Aggravated Punishment etc. of Specific Economic Crimes,” saad sa pahayag.

Matatandaang nagdaos ng press conference nu'ng Hunyo 10 ang mga kinatawan nina Chen, Baekhyun, at Xiumin upang bigyang-diin na binalewala ng SM Entertainment ang mga napagkasunduang termino. Pinabulaanan naman ng SM Entertainment ang mga alegasyong inilabas sa press conference.