Kahit mababa ang bili ng palay… Presyo ng bigas sa ilang pamilihan, mataas pa rin

ni Jasmin Joy Evangelista | October 15, 2021

Mababa na ang bili ng palay sa mga magsasaka ngunit nananatiliing mataas ang presyo ng bigas sa ilang pamilihan.

Ayon sa rice watchdog group na Bantay Bigas, ang pinakamababang presyo ng kada kilo ng bigas sa pamilihan ay nasa P38.

"Nananatiling mataas 'yung presyo ng bigas sa merkado given na anihan na ngayon at the same time napakababa ng presyo ng palay na pamimili ng mga traders at millers sa mga magsasaka," ani Bantay Bigas spokesperson Cathy Estavillo sa isang panayam.

Matatandaang nangako ang gobyerno na posibleng bumaba ang kada kilo ng commercial rice dahil sa pagdagsa ng inangkat na bigas dahil sa rice tariffication law.

Ayon kay Estavillo, nasa P9 hanggang P10 umano ang pamimili ng palay sa isang magsasaka sa Iloilo.

"Gamit ang rule of thumb, kung nabili ng P14 'yung palay ng mga magsasaka ay dapat merong P28 na bigas sa merkado. Kung P16, dapat P32. Wala tayong nakikita," aniya.

Dahil dito, hinamon ng grupo si Agriculture Secretary William Dar na magpunta sa bukid para makita ang kalagayan ng mga magsasaka.

Financial aid para makapagbigay ng 13th month pay ang mga negosyo, hirit ng KMU

ni Jasmin Joy Evangelista | October 15, 2021

Iginiit ng isang labor group na dapat tulungan ng gobyerno ang mga small at medium enterprises na maharap ang kanilang obligasyon sa mga manggagawa.

Ayon sa labor group na Kilusang Mayo Uno, kailangang maglaan ng pamahalaan ng pondo para matulungan ang mga negosyante na maibigay pa rin ang 13th month pay ng mga manggagawa sa kabila ng pandemya.

“Hindi puwedeng excluded sa pagbabayad ang mga employers sa 13th month pay sa kabila ng epekto ng pandemya dahil sa ngayon pa lang matinding kagutuman at kakulangan na ang nadarama ng mga manggagawa," ani KMU chairperson Elmer Labog sa isang panayam.

Ayon pa sa grupo, dapat hindi loan kundi grant ang ibigay ng gobyerno sa mga negosyong nabangkarote dahil sa COVID-19 pandemic.

Kamakailan ay sinabi na ng Employers Confederation of the Philippines na mahihirapang magbayad ng 13th month pay ang mga maliliit na negosyo sa mga empleyado nito.

Gustong magbigay ng mga employer ng benepisyo para sa kanilang mga tauhan kaya't sana ay bigyan sila ng pautang na walang interes o kondisyon, dagdag ng ECOP.

Samantala, nagpaalala naman ng Department of Labor and Employment na mandatory ang 13th month pay maliban na lang kung papayag ang mga empleyado na hindi muna ito makuha dahil apektado ang negosyo sa pandemya.

Pinatay na pari sa Cebu na pinagbintangang terorista, iimbestigahan

ni Mary Gutierrez Almirañez | May 30, 2021

Iimbestigahan ng Philippine National Police (PNP) Cebu head na si Police Colonel Englebert Soriano ang pagpatay sa 80-anyos na dating pari at peace consultant ng National Democratic Front of the Philippines (NDFP) na si Fr. Rustico Tan sa Pilar, Barangay Poblacion Camotes Island, Cebu nitong Biyernes nang gabi.

Ayon kay Soriano, “It was really dark that time. As of now, we have yet to get eyewitnesses for the crime. But the Scene of the Crime Operatives (SOCO) processed the crime scene."

Batay sa ulat, nakahiga si Fr. Tan sa duyan na nasa gawing terrace ng bahay nito pasado alas-8 nang gabi nang pagbabarilin ng suspek sa katawan na naging sanhi ng pagkamatay nito.

Samantala, tumanggi naman ang mga kamag-anak ng biktima na ipa-autopsy ang labi nito upang kaagad mai-cremate.

"The family already asked the body to be buried. They are not interested anymore with whatever future findings of the police with respect to the possible outcome of the autopsy," sabi pa ni Soriano.

Gayunman, nilinaw ni Soriano na ipagpapatuloy pa rin nila ang imbestigasyon kahit walang autopsy.

"We will pursue this. We will get to the bottom of the investigation until we identify and file charges against the suspects," deklara niya.

Samantala, iniugnay naman ng Kilusang Mayo Uno (KMU) ang pagpatay kay Fr. Tan sa sinapit ng 74-anyos na NDFP peace consultant na si Reynaldo Bocala.

Ayon pa sa KMU, “Ang magkasunod na insidente ng pagpatay ay naganap dalawang linggo matapos isapubliko ng Anti-Terrorism Council ang listahan ng mga NDFP consultant na pinagbibintangan nitong mga terorista… Ang dalawang NDFP consultant na pinaslang ay parte ng negosasyon sa pagitan ng gobyerno ng Republika ng Pilipinas at ng rebolusyunaryong kilusan upang bigyang solusyon ang ugat ng armadong tunggalian.”