'Di raw swak sa isa't isa... ALDEN AT KATHRYN, PANG-CAMERA LANG, NEVER MAGIGING MAGDYOWA

ni Erlinda Rapadas @Teka Nga | September 5, 2024

Tiyak na ikalulungkot ng mga tagahanga nina Kathryn Bernardo at Alden Richards ang hula ng psychic na tinaguriang Asia's Nostradamus na si Jay Costura tungkol sa tambalang KathDen. 

Bagama’t maganda ang kanilang tambalan sa pelikula at hinuhulaang kikita sa takilya ang Hello, Love, Again (HLA), hindi raw mauuwi sa totohanan ang kanilang relasyon dahil hindi sila swak sa isa’t isa.

Ayon kay Jay Costura, sa isang bruskong tulad ni Daniel Padilla nababagay ang personalidad ni Kathryn. 

At hanggang ngayon, nag-e-effort pa rin daw si Daniel upang muli silang magkita o magkaayos ni Kathryn. 

Tiyak na madi-disappoint ang mga KathDen fans dahil umaasa silang mauuwi sa seryosong relasyon ang closeness nina Kathryn at Alden. Perfect na sanang boyfriend si Alden para sa aktres dahil mabait, marespeto at very gentleman, pero hindi puwedeng ipilit kung hindi sila talaga nakalaan para sa isa’t isa.

---

SA interbyu ni Ogie Diaz sa psychic na si Jay Costura, nabanggit ang showbiz couple na sina Julia Barretto at Gerald Anderson. 

May vibes daw si Jay na magpapakasal na ang dalawa sa taong ito (2024). Pero magiging secret wedding daw muna dahil sa mga kondisyon ng mga endorsements ni Julia. 

Sa kanyang edad, handang-handa na si Gerald na magpakasal at bumuo ng sariling pamilya dahil tapos na ang kanyang pagiging chickboy. 

Sinusuportahan ni Gerald ang career ni Julia, at sa wakas ay natagpuan na niya ang babae para sa kanya.

---

SIKAT na sikat at in demand ang girl group na BINI na may malalaking endorsements. Sila ang pinaka-Pinoy version ng Korean girl group na Blackpink, at malakas ang kanilang karisma sa mga kabataang GenZ, kaya naman mabenta ang kanilang concert. 

Phenomenal ang kanilang pagsikat kaya’t mahirap kunin sa TV guestings. Heavily guarded din sila kapag may mga events. 

Pero ayon kay Jay Costura, hindi na magtatagal ang kasikatan ng BINI. Malapit na silang malaos at madi-disband dahil sa pagkakainggitan at intrigahan sa kanilang grupo. 

May mga miyembro ring nagkokompetisyon at gustong magkaroon ng malaking exposure sa kanilang concert. 

Well, marami na rin ang hindi nagkakagusto sa grupong BINI dahil sa OA nilang pag-asta, na para bang mga big stars na sila kapag nasa public place. Kaya hindi na magtatagal ang kanilang kasikatan.

---

SA status ng career ni Coco Martin ngayon, masasabi na nasa peak na ang tagumpay niya bilang aktor. Tumatak sa mga viewers ang dalawa niyang shows na remake ng mga pelikula ni FPJ, ang Ang Probinsyano (AP) at Batang Quiapo (BQ).

Kaya naman, may mga grupo na lumalapit at kumukumbinse sa kanya na tumakbo sa anumang posisyon sa 2025 elections at ang posibleng target ni Coco ay pagka-congressman. 

Well, malakas ang kanyang karisma sa tao at tiyak na lulusot siya. Pero kung sasabak na sa pulitika si Coco, tiyak na iiwanan niya ang kanyang showbiz career. 

Marami na siyang naipundar na properties mula sa kanyang kinita sa showbiz at financially stable na siya ngayon. Lalawak na ang mga taong kanyang matutulungan.

ALDEN AT KATHRYN, BUKING SA HIGPIT NG YAKAPAN NA MAG-ON NA

ni Nitz Miralles @Bida  | August 28, 2024

Photo: Alden Richards, Kathryn Bernardo at Director Cathy Garcia-Sampana / Joross Gamboa

Patanong na biniro ni Joross Gamboa si Alden Richards kung bakit umiiyak sa photo na magkakasama sila nina Kathryn Bernardo at Director Cathy Garcia-Sampana. 

Inisip tuloy ng mga fans na kaya umiyak ang aktor dahil that time, tapos na ang shooting nila ng Hello, Love, Again (HLA) at mami-miss ni Alden si Kathryn.

Actually, totoong galing sa pag-iyak si Alden nang kunan ang litrato nilang apat dahil katatapos lang ng iyakan scene nila ni Kathryn. Hindi raw dahil mami-miss ni Alden si Kathryn dahil magkikita pa rin naman sila kahit nasa bansa na.

Remember, madalas bumisita si Alden kay Kathryn sa bahay nito at kapag may mga events ang glam team ni Kath, invited lagi si Alden, kaya nagkikita sila. 

Saka, malapit na ang promo for their movie, magiging madalas ang kanilang pagsasama.

Nakakaaliw lang ang KathDen fans dahil sila na ang nagbigay ng meaning sa mga kilos nina Alden at Kathryn habang nasa NAIA airport na. Nagyakapan ang dalawa bago maghiwalay at sabi ng mga fans, hindi ganu’n kahigpit ang yakapan ng dalawa kung friends lang sila. Patunay pa raw na sina Alden at Kathryn na dahil halos ayaw na nilang maghiwalay.

Anyway, may pumuri sa sobrang sipag ni Alden dahil nag-taping agad ng Pulang Araw (PA) pagkabalik from Canada. Hindi raw uso sa aktor ang jetlag dahil nakita lang siya sa airport nang dumating, the next day, nasa taping na. ‘Yun ang professional at pinahahalagahan ang trabaho.

---

Welcome na welcome na raw, Dominic…

BEA, PROUD NA PINIPILAHAN NG MGA LALAKI

SINGLE ang status ni Widows’ War (WW) actress Bea Alonzo at may kasunod na “at happy” ang kanyang status. Ibig sabihin, hindi pa siya taken at inaming may mga nagpaparamdam sa kanya, pero wala pang idine-date exclusively. 

Nagbiro nga ang aktres na feeling mahaba ang hair niya dahil sa sinabing may "mga nagpaparamdam" sa kanya. Ibig sabihin, hindi lang isa ang nanliligaw kay Bea.

Nang kumustahin ang lagay ng kanyang puso, “Okey naman ang lagay ng puso ko ngayon.

I’m enjoying being single. I mean there are people, siyempre naman, may mga nagpaparamdam. Sometimes you reply, sometimes you see people,” sagot nito sa interview sa kanya sa 24-Oras.

Mukhang masikreto si Bea sa kanyang love life sa ngayon dahil hindi pa nagli-leak sa press kung sino ang mga suitors niya. Wala rin tayong nababalitaang spotted siya sa mga restaurant na nakikipag-dinner.

Naikuwento rin ni Bea na kahit busy siya sa taping ng WW, itina-try niyang ibalanse ang oras niya sa trabaho at personal life niya.

“I strive for a work-life balance and that’s what makes me happy right now,” dagdag pa ni Bea. Nabanggit nito na pumupunta siya sa derma at sa salon at hindi man binanggit, sa Aivee Clinic siya nagpapa-derma. Dito rin pumupunta si Dominic Roque para sa kanyang skin care at bilib ang mga netizens sa kanilang schedule dahil hindi pa sila nagkakasabay ever.

Samantala, nagpapasalamat si Bea sa positive feedback ng viewers sa WW. 

“Very overwhelming. Kasi I knew na before it even aired people would love it, but I didn’t know na ganito sila magiging kasobrang involved in the story. Kinikilig ako everytime mayroon silang theories about the show,” ayon pa kay Bea Alonzo.

---

Akala raw ng netizens, sosyal… 

KOBE AT KYLINE, NAKIPAG-INUMAN

SA TABI-TABI LANG 

IN fairness, marami ang dumepensa kay Kyline Alcantara sa pag-viral ng TikTok video na nakaupo siya sa lap o mga hita ni Kobe Paras. 

May tumawag sa kanyang "cheap", "hindi magandang tingnan", "‘wag pamarisan" at "hindi magandang ehemplo ng isang babae" ang mga nega comments na ibinato sa Kapuso actress.

Pero, mas marami ang kumampi sa girlfriend ni Kobe. Natural lang daw sa mga in love ang mga ganyang eksena. Wala raw masama sa kumandong, lalo na kung mahal mo. Siguro raw, hindi naka-experience na kumandong sa mga nobyo nila ang mga nag-react.

Ang lagay na ‘yun, ang pagkandong pa lang ng isa sa mga bida ng Shining Inheritance (SI) ang nakita. Paano na ‘yung pag-aayos ni Kyline sa buhok ni Kobe at ang paghalik ni Kobe sa balikat ni Kyline?

‘Katuwa ang comment na akala niya, sosyal si Kobe, pero makikitang inuman lang sa tabi ng bahay ang pinuntahan nila ni Kyline. May nakita pang plastic na pitsel at may paper plate pa.

Ang isang netizen naman, ang tattoo ni Kobe ang pinansin. Sana raw, hindi gumaya sa kanya si Kyline na actually, posible dahil may tattoo shop si Kobe Paras. Libreng magpa-tattoo si Kyline sa shop niyang NOWN na nasa White Plains.

‘Di raw bagay magpa-sexy… KATHRYN, DEDMA LANG KAHIT TINATAWAG NA SAKANG

ni Nitz Miralles @Bida  | July 15, 2024

Walang epekto ang pamba-body shame ng mga haters at bashers ni Kathryn Bernardo na kesyo hindi siya bagay magpa-sexy dahil sa bow-legged (sakang) siya. 

Hindi rin daw bagay ang dance number niya sa Century Tuna Superbods Finals at kung anu-ano pang kanegahang ipinukol sa kanya.

Kaya namin nasabing walang epekto ang pamba-body shame sa kanya dahil ‘yung post ni Kathryn na suot ang costume sa dance number na nilait ng kanyang mga bashers ay may more than 1 million likes na and counting.

Saka, iilan lang naman ang hindi nagustuhan ang dance number ni Kathryn, mas marami pa rin ang nagkagusto dahil kakaiba raw at nakakapanibago. Para kay Kathryn, it was a memorable night at bahala kayong mga bashers.

Also, matagal nang in-acknowledge ni Kathryn ang kanyang imperfection at naging tema pa nga sa kanyang vlog. Comment nga ng mgs fans nito, ‘yun lang ang kayang ipintas ng basher kay Kathryn, wala na silang iba pang masabi.

Hindi rin maikakailang marami talaga siyang fans at kabilang siya sa mga celebrities na umaabot sa 1 million ang likes sa kanyang mga post.

---

NAGKITA-KITA ulit sina Heart Evangelista, John Lloyd Cruz (JLC), Jericho Rosales, Sam Milby at Bea Alonzo sa joint birthday celebration nina JLC at Mariole Alberto. 

Sa photos na ipinost ni Heart, makikitang at ease na talaga sila ni Jericho dahil magkatabi pa sa ibang picture.

Nakakatuwa at nagko-comment na rin si Jericho sa Instagram (IG) ni Heart nang mag-post ang aktres ng kanyang beauty regimen gamit ang beauty line niya. 

Nag-comment si Jericho ng “Hmmm... skincare +investment.” Sayang lang at hindi sumagot si Heart sa comment ni Jericho.

Well, nakakatuwa ang businesswoman side ni Heart dahil sa nag-comment na mahal ang beauty products niya, sagot nito, “Quality ito, bigyan kita ng discount.” 

Hindi siguro ine-expect ni Heart na marami ang manghihingi ng discount sa kanya.

Sa pumuna na pumayat siya, sagot ni Heart, “Yes, I was recovering from a bad episode (sad emoji). I’m much better now. I had pancit canton.”

Marami ang natuwa sa pagsagot ni Heart sa mga followers niya at na-promote pa ang product niyang Luxelle Pureliving. 

Samantala, pinuna ang suot ni Bea Alonzo dahil nag-effort daw nang husto, samantalang si Heart na isang fashion influencer ay casual lang ang suot. Mabuti at ipinagtanggol si Bea ng fan ni Heart na kaya ganu’n ang suot nito ay dahil sa guesting niya sa Fast Talk with Boy Abunda at hindi para i-upstage si Heart.

Napansin lang ng ibang fans na wala sina Kathryn Bernardo at iba pang A-lister na kasama sa grupo nina Heart at Bea kapag nakikipagkita sila kina Mr. Johnny Manahan at Mariole.

---

IT is refreshing na ma-interview si Ruru Madrid na hindi natatanong tungkol sa kanyang love life at sa girlfriend niyang si Bianca Umali. Focused sa kanya at sa kanyang trabaho ang mga tanong na nakakatuwa.

Ang tinukoy namin ay ang Zoom interview kay Ruru para sa finale ng Black Rider (BR) na magtatapos na sa July 26. Proud si Ruru na nagustuhan ng mga viewers ang series at may mga nagre-request ng Book 2. 

Sa BR din nakita ang husay niya sa action at dito rin siya natawag na “Primetime Action Hero.”

“Ito ang longest series na ginawa ko at ang daming nangyari in between. Naaksidente ako, nagkasakit at naospital, pero nagawa pa rin namin at heto, matatapos na kami.

Ang saya lang na dahil sa BR, ang dami kong nakatrabahong action stars na ang iba ay active pa rin ngayon,” sey ni Ruru.

Ang sey naman ng aktor sa tanong na “Ano naman ang dating sa ‘yo ng title mong Primetime Action Hero?” ay “Salamat sa title, pero kahit walang title, masaya na ‘ko.

Nakakatuwa naging hero ako sa mga bata dahil dati, ako ang umiidolo. Ang sayang malaman na may mga bata na ginagaya ang ginagawa ko sa BR at pati pananamit ko, ginagaya rin nila.”

Nai-share ni Ruru ang dream na makagawa ng action film, “Sana after ng TV series, sa film naman ako gumawa ng action project. And yes, dream ko rin maging director ng sariling action series. Gusto ko ring mag-produce at ako na ang magdidirek, pero matagal pa ‘yun at hindi ko pa iniisip.”

Well, may pasilip sa mga eksena sa last two weeks ng BR at ang dami pang malalaking action scenes na aabangan. Plus, magbabalik si Phillip Salvador at sa kanya manggagaling ang linyahan na descendant ni Lapu-Lapu si Ruru.