Crush na kapwa fire sign, ka-compatible kaya sure na magiging boylet

ni Maestro Honorio Ong @Kapalaran Ayon Sa Numero | Sep. 26, 2024

Dear Maestro, 

May crush akong lalaki. Sa katunayan, hindi ko naman inaasahan na mapapansin niya ako.  

Ang nangyari kasi ay kung saan-saan ako nakarating at namasukan, pero pagbalik ko sa province namin, nakakapagtakang naging malapit kami sa isa’t isa. Nagsimula itong mangyari nang mag-break sila ng first girlfriend niya na best friend ko rin. 

Nagkakuwentuhan kami at ibinahagi niya sa akin na hiwalay na nga raw sila dahil ang best friend ko ay nagkaroon ng boyfriend na foreigner.  

Akala ko noon, ang crush ay isa lang paghanga na nawawala rin. Pero iba ang naging feeling ko sa kanya, lalo na ng maging close kami, at tuluyan na akong napamahal sa kanya. Kaya lang, hindi ko alam kung may nararamdaman din ba siya sa akin o baka naman kaya lang siya naging malapit at palakuwento ay dahil nga broken hearted siya. Pero kahit na ano pa ang mangyari, ang mahalaga ay magkasama at okey kami ngayon. 

Maestro, gusto ko lang sanang malaman kung mag-compatible ba kami at magiging kami rin kaya balang araw? Ang birthday ko ay April 16, 2000, habang December 13, 1998 naman crush ko. 

Umaasa,

Clarice ng Salvacion. Rizal, Occidental Mindoro

---

Dear  Clarice 

Ayon sa zodiac sign mong Aries at Sagittarius naman ang lalaking espesyal sa puso mo, tunay ngang tugma kayo sa isa’t isa, dahil ang Aries at Sagittarius ay kapwa pinangingibabawan ng elementong fire o apoy.

Habang sa Numerology naman, ang birth date mong 16 o 7 (ang 16 ay 1+6=7) ay sadyang tugma ring isama sa birth date na 13 o 4  (ang 13 ay 1+3=4) ng sinasabi mong lalaki. Kung saan sa pang-istatistikang basehan, tunay ngang marami sa isinilang sa petsang 7, 16 at 25, ang nakakatuluyan silang mga isinilang sa petsang 4, 13, 22 at 31. Ibig sabihin sa pag-aanalisang Astro-Numerology, sadyang tugma at compatible talaga kayong dalawa.  

Kaya nga sobrang laki ng posibilidad na mauuwi ang kasalukuyan n’yong espesyal na pagkakaibigan sa isang matimyas at masayang relasyon. Kung saan, habang tumatagal ang inyong friendship at kakaibang ugnayan, lalo naman kayong masasarapan sa pang-emosyonal hanggang sa tuluyang mauwi ito sa isang wagas at matimyas na pag-iibigan.

Sa paglipas pa ng ilang mga taon, matapos na tuluyang maging kayo, tiyak na ang magaganap, darating ang eksaktong  panahong mauuwi rin sa isang maligaya at panghabambuhay na pagpapamilya ang inyong relasyon na nakatakdang mangyari at maganap sa susunod na taong 2025, sa edad mong 25 pataas. 

Damit na kulay pula, magsasalba sa lalaking takot tumandang mag-isa

ni Maestro Honorio Ong @Kapalaran Ayon Sa Numero | Sep. 23, 2024

Dear Maestro,

Tawagin n’yo na lang ako sa pangalang Rhen. May magandang trabaho naman ako ngayon. Sa katunayan, isa akong bookkeeper sa isang lending company at matagal na rin ako rito. Maganda rin ang pagpapasuweldo nila sa akin, kaya naman malapit ko ba nang mabayaran ‘yung house and lot at second hand na sasakyan na kinuha ko.

Mabait ang amo ko at ako lang ang nakakaalam ng mga transaksiyon namin. Ang problema lang, nakakahiya man aminin, pero wala pa rin akong nagiging nobya hanggang ngayon. 33-anyos na ako, pero heto pa rin ako at nag-iisa. Hindi naman ako bakla o silahis dahil may mga nililigawan naman ako, pero hindi ko alam kung malas ba ako kaya hindi nila ako nagugustuhan.

Kaya ngayon, parang nararamdaman kong malapit na akong tumandang binata at ayokong mangyari sa akin ‘yun. Pinag-aasawa na rin ako sa amin dahil marami na rin akong naitulong sa pamilya ko. 

Ang birthday ko ay April 29, 1991. Maestro, makakapag-asawa pa ba ako? Gayundin, sinu-sino ang mga babaeng ka-compatible ko? At kung makapag-aasawa ako, kailan ito magaganap?

Umaasa,

Rhen ng Sta. Clara, Santa Maria, Bulacan

---

Dear Rhen, 

Talagang matatagalan kang makapag-asawa o baka nga hindi ka na makapag-asawa. Ito ay dahil weak o mahina ang numerong 29 (ang 29 ay 2+9=11/ 1+1=2) na iyong birth date. 

Pero mabuti na lang, bukod sa weak number na 29 o 2, ikaw ay nagtagtaglay ng destiny number na 3 (4+29+1986=2019/ 20+15=38/ 3+8=11/ 1+1=2) kung saan, bihira sa mga taong may destiny number na 3 ang hindi nakakapag-asawa dahil ang numerong 3 ay may ruling planet na Jupiter, kaya sa kabila ng kalungkutan at kabiguan sa pag-ibig, sa bandang huli ay habambuhay pa rin silang lumiligaya. 

Ito ay nagsasabi ring kung hindi ka kikilos at gagawa ng paraan para makapag-asawa, tulad ng nasabi na, habang nanatiling mahina ang iyong loob at takot sa mga babae, palaki pa nang palaki ang tendency o porsiyento na baka nga hindi ka makapag-asawa.

Ngunit sa kabila naman nito, sa sandaling pinairal mo ang strong number mong 8 na kumakatawan sa will power, basta’t ginusto mo ay tiyak na mananaig, matutupad at magkakatotoo, wala na ring ibang dahilan upang hindi ka makapag-asawa at magkaroon ng isang maligaya at panghabambuhay na pamilya.  

Gayunman, upang mawala ang pagiging torpe, mahiyain mo at nang makapag-asawa ka na rin, dapat palagi kang magsuot ng strong color, tulad ng pula para sa zodiac sign mong Taurus at destiny number mong 3, at puwede rin sa iyo ang itim at dilaw. 

Pagkatapos nito, ligawan mo rin ang mga ka-compatible mo o makipagkaibigan ka sa mga babaeng isinilang sa zodiac sign na Scorpio, Virgo, Capricorn, Libra at kapwa mo Taurus, higit lalo silang may mga birth date na 6, 15, 24, 7, 16, 25, 2, 11, 20, 29, 8, 17, 26, 9, 18 at 27.

Sa ganyang paraan, sa susunod na taong 2025, sa edad mong 34 pataas, makakapag-asawa ka na at habambuhay na magiging maligaya, hatid ng babaeng isinilang sa zodiac sign na Capricorn.

Kahit pa paulit-ulit lokohin… Bebot, habambuhay nang makukulong sa kalokohan ng mister

ni Maestro Honorio Ong @Kapalaran Ayon Sa Numero | Sep. 21, 2024

Dear Maestro,

May asawa akong babaero. Sa katunayan, tatlong beses ko na siyang nahuhuli kasama ang kanyang kerida. Kinompronta ko siya nu’ng nahuli ko siya sa pangalawang pagkakataon, umamin at nangako siya na hindi na muli niya iyon uulitin. Pero wala pang dalawang buwan ang nakalipas, nahuli ko na naman sila ng babae niya. 

Sa ngayon, balak ko na siyang hiwalayan. Kung makikipaghiwalay ako sa kanya, may ikalawang pag-aasawa pa kayang mangyayari sa aking kapalaran? Kung oo ang sagot, sa ikalawang pag-asawa ba ako mas magiging maligaya? 

Ang birthday ko ay April 29, 1987.

Umaasa,

Florabelle ng Malanday, Valenzuela City

---

Dear Florabelle,   

Kung ang mister mo ay hindi naman isinilang sa zodiac sign na Virgo, Capricorn, Scorpio at Taurus, tama ka maaari nga kayong magkahiwalay, dahil hindi mo siya katugma o ka-compatible.

Subalit kung Virgo, Capricorn, Scorpio at Taurus ang kanyang zodiac sign, kahit sabihin pang babaero siya, tiyak ang magaganap – hinding-hindi kayo magkakahiwalay kailanman.Gayunman, kung sakaling mag-aasawa kang muli, isaalang-alang mo ang nasabing mga zodiac sign sa itaas, upang sa habambuhay ka nang lumigaya, higit lalo kung ang birth date ng lalaking mapapangasawa mo ay 5, 14, 23, 7, 16, at 25 – sa piling ng nasabing mga lalaki, tulad ng nasabi na, may pangako ng isang maligaya at panghabambuhay ng pagpapamilya.

Habang ang iyong Love Calendar, kahit na nambabae at paulit-ulit ka pang lokohin ng iyong asawa, as long as tugma at compatible kayo sa Astrology at Numerology, na sinabayan pa ng nag-iisa mong malinaw, makapal at magandang Marriage Line sa kaliwa at kanan mong palad, na pang-araw-araw nating tinatalakay sa ating mga artikulo tungkol sa guhit ng palad,  tiyak ang magaganap – mananatiling buo ang inyong pamilya, upang minsan pa, kahit pa na gumagawa ng kalokohan ang iyong asawa, hindi pa rin mahahadlangan ang nakatakda, dahil sa bandang huli, habambuhay pa rin kayong magsasama.