Kahit pa may anak na… Single mom, nakatakda uling lumigaya sa taong 2026

ni Maestro Honorio Ong @Kapalaran Ayon Sa Numero | Oct. 15, 2024

Dear Maestro,

Isa akong Aquarius. Maraming beses na rin akong nabigo sa pag-ibig. Kaya naman naisipan ko nang sumangguni sa inyo, dahil ayoko nang mabigo pang muli. 

Twenty-six year old na ako, at may isang anak. Maestro, makakatagpo pa kaya ako ng lalaking pakakasalan ako? 

‘Yun bang bukod sa mamahalin ako ay mamahalin din ang aking anak, at ituturing na parang tunay niyang anak.

Sana magkaroon pa ako ng pag-asa, dahil minsan ‘di ko maiwasang mawalan ng pag-asa. 

Ang birthday ko ay February 4, 1998.

Umaasa,

Krishina ng Santo Cristo, San Antonio, Nueva Ecija

---

Dear Krishina,

Huwag kang mawalan ng pag-asa, dahil bukod sa may itsura at maganda ka naman, kapansin-pansing maganda rin ang iyong signature o pirma.

Ang lagda mong natapos sa paitaas na stroke, kesa na paibaba ang nagsasabing sa edad mong 26 pataas, kahit na single mom ka pa ngayon, muli kang makakatagpo ng isang lalaking tapat at magmamahal sa iyo habambuhay.

Oo, susuwertehin ka pa sa pag-ibig at pakikipagrelasyon, dahil ayon sa iyong Love Calendar, ang pagdating ng nasabing lalaki na magmamahal sa iyo ay nakatakda mong makilala sa isang paglalakbay.

Ang pagdating ng nasabing lalaki ay magaganap, sa susunod na taong 2025, sa edad mong 27 pataas, sa buwan ng Enero o Disyembre. Kung saan, sa unang pagtatagpo n’yo, ikaw ay nakausot ng dilaw na damit, habang puti naman ang suot ng lalaking aking nabanggit, na siyang magiging kaibigan mo, hanggang sa mauwi ang iyong pagkakaibigan sa pagmamahalan. Sa bandang huli, tuluyan ka rin niyang mamahalin at paninindigan, kahit pa sabihin isa kang single mom. 

Sa taong 2026, sa edad mong 28 pataas, tuluyan ka nang makakabuo ng isang maligaya at panghabambuhay na pagpapamilya.

Asawang cancer, ka-compatible kaya makakatuluyan pa rin

ni Maestro Honorio Ong @Kapalaran Ayon Sa Numero | Oct. 10, 2024

Dear Maestro,

Bakit sa tuwing tatalakayin n’yo ang mga ka-compatible ng zodiac sign kong Capricorn, palagi ninyong sinasabi na ka-compatible ko ang Virgo, Taurus at kapwa ko Capricorn? 

Ang aking asawa ay nagtataglay ng zodiac sign na Pisces, hindi ba, water type sign din siya? Ibig sabihin ba nu’n ay ka-compatible ko rin siya? Pero bakit hindi ko ito nababasa sa mga artikulo n’yo? 

Sana ay maipaliwanag n’yo ito. March 4, 1994 ang birthday ng asawa ko,  habang January 17, 1994 naman ako.

Umaasa,

Eya ng  Sauyo, Novaliches, Quezon City

---

Dear Eya,

Alam mo, kaya hindi ko isinasama ang Pisces at Scorpio sa mga ka-compatible ng isang Capricorn, gayung ang Pisces at Scorpio ay kapwa nagtataglay ng elementong water o tubig na angkop sa isang Capricorn na may elementong lupa, sosobra na ang dami ng magiging ka-compatible ng Capricorn. 

Isipin mo, 12 lang ang zodiac sign, lalabas na ang magiging ka-compatible ng Capricorn ay ang Virgo, Taurus, kapwa niyang Capricorn, Cancer, Pisces at Scorpio. Halos kalahati na ng 12 zodiac signs ang magiging ka-compatible niya, kaya napakarami na nito na parang malayo sa katotohanan. Pero kung malapit pa rin sa katotohanan, hindi naman praktikal na halos ka-compatible ng Capricorn ang kalahati ng lahat ng zodiac sign. 

Kaya ang sinasabi lang nating ka-compatible sa ating mga artikulo hinggil sa compatibility ay ‘yung talagang ka-compatible at teoryang pinagbabatayan. 

Una sa Western Astrology, kapag katulad mo ng elemento ang isang zodiac sign, halimbawa ay Capricorn, tiyak na ka-compatible mo ang Virgo, Taurus at kapwa mo Capricorn, dahil ang tatlong zodiac sign na ito ay pare-pareho ng elemento – ang elementong earth o lupa. Sa unang batas ng compatibility, ito ang tinatawag na “same feathers flock together”.

Magkakamukha ng pakpak, magkakamukha ng likaw ng bituka, kaya magkakatugma, magkakaibigan at magkaka-compatible sila. 

Ito namang isa pang teorya sa compatibility ay hango sa Oriental Astrology, kung saan tinatawag nga nating “opposite poles attract each other,” sino ba ang ka-opposite ng Capricorn? Hindi sina Pisces at Scorpio na kapwa may water type element, kundi si Cancer. 

Bilog kasi ang drawing o mapa ng zodiac signs, at ang bilog na ito ay hinati sa 12 bahagi. Parang paghahati ng pizza pie, kung titingnan mo ang eksaktong katapat na hati ng Capricorn, makikita mo sa kanyang ilalim ang Cancer. Kaya ang Cancer at Capricorn ay perfect match sa compatibility, na kung tawagin natin ay “opposite poles attract each other”. Kumbaga, sila ang “complimentary compatibility”, tulad ng gabi at araw, liwanag at dilim, babae at lalaki, negative at positive poles at iba pang magkakatumbalik na puwersa na hindi puwedeng mawala ang isa.

Siya rin ang nawawala mong sarili na noon mo pa hinahanap, habang ikaw naman ang nawawala niyang sarili na hindi niya pa rin matagpuan. Pero kapag nagtagpo ang dalawa, bagama’t hindi magkamukha, sila ay kusang nagsasama upang makabuo ng baby o bata at siyempre, upang makabuo rin ng masaya at panghabambuhay na pamilya.

Ngayon, bumalik tayo sa Pisces at Scorpio na may water element, na hindi naman ka-opposite ng isang Capricorn, ka-compatible mo rin ba sila? Oo, pero hindi kasing ka-compatible ng Cancer, Virgo, Taurus at kapwa mo Capricorn. 

Samakatuwid, kung lalagyan ng “secondary compatibility,” ‘ika nga ay “second choice”, roon papasok ang Scorpio at Pisces, pero sa first choice, roon naman papasok ang mga tunay mong ka-compatible, kapwa mo Capricorn, Virgo, Taurus at Cancer. 

Gayunman, bukod sa ka-compatible mo rin ang Pisces, sa salita nating “second degree of compatibility,” tunay namang ka-compatible mo sa Numerology ang iyong mister na may birth date na 4 habang 17 o 8 naman  ang birthday date mo, (ang 17 ay 1+7-8).

Sa matuling salita, hindi man kayo perpektong compatible sa Astrology, perpektonaman kayo sa Numerology na nakatakdang magsama habambuhay at nakatakda ring muling umangat at umunlad ang pamumuhay, na ayon sa Decadens ng Kapalaran ay inaasahang mararamdaman at magsisimulang mangyari sa taong 2025, sa edad mong 31 pataas.

Di man pinalad sa ex… Bebot, sa taong 2025 makilala ang lalaking itinadhana

ni Maestro Honorio Ong @Kapalaran Ayon Sa Numero | Oct. 8, 2024

Dear Maestro,

Dati akong nagtatrabaho sa Japan, at du’n ko rin nakilala ang noo’y naging nobyo ko, na isa ring OFW. 

Sa ngayon, isa na akong single mom. Nu’ng umuwi kasi siya sa ‘Pinas, nakakilala siya ru’n ng babaeng kanyang pakakasalan. 

Magta-tatlong taon na ang anak ko, at ayokong lumaki siya na walang kinikilalang ama. Gusto ko sanang mag-asawa, ang kaso wala namang seryosong nanliligaw sa akin.  

Maestro, sa edad ko bang 31, makakapag-asawa pa kaya ako, at magkakaroon ng isang masaya at matinong pamilya? 

Ang birthday ko ay November 1, 1992.

Umaasa,

Mara ng Caniogan, Calumpit, Bulacan

---

Dear Mara,

Bihira lang sa mga taong isinilang sa petsang 1, 10, 19 at 28 ang hindi nakakapag-asawa, tulad mo na isinilang sa petsang Nobyembre 1, 1992, kaya panigurado na makakapag-asawa ka pa, higit lalong napapangibabawan ka pa ng zodiac sign mong Scorpio. Ang Scorpio ay kilala sa pagkakaroon ng sumusulak na libido. 

Dagdag dito, 31-anyos ka pa lang naman ngayon, at batang-bata pa.  

Bukod sa numerong 1, nagtataglay ka rin ng destiny number na 6, nangyaring ganu’n dahil ang Nobyembre 1, 1992 na birthday mo ay kinokompyut ng ganito: 11+1+1992=2004/ 20+04=24/ 2+4=6. Ibig sabihin, basta’t palagi ka lang magsuot ng damit na kulay dilaw at pula, humigit kumulang sa taong 2025 hanggang 2026, sa edad mong 33 pataas, sa ayaw at sa gusto mo, bigla kang makakapag-asawa ng isang lalaking kayumanggi ang kulay ng balat.  

Upang mas madaling matupad ang nasabing pag-aasawa na magaganap sa edad mong 33 pataas, makipagkaibigan ka sa mga lalaki na katugma at ka-compatible ng zodiac sign mong Scorpio, tulad nilang isinilang sa zodiac sign na Cancer, Pisces at kapwa mo Scorpio. Kung saan, pare-pareho kayong under sa elementong water o tubig, kaya naman katugma at ka-compatible mo talaga sila. 

Bukod sa nasabing mga zodiac sign, ka-compatible mo rin silang isinilang sa zodiac sign na Taurus, higit lalo silang may birth date na 4, 13, 22, 31, 7, 16, 25, 2, 11, 20 at 29. 

Kung saan, ayon sa iyong Love Calendar, tulad ng nasabi na, sa taong 2025 o kaya’y 2026, sa edad mong 33 pataas, sa buwan ng Disyembre, habang tinatahak mo ang edad na 33, du’n mo rin mami-meet ang lalaking itinakda sa iyo ng kapalaran, na isinilang sa zodiac sign na Cancer, medyo kayumanggi ang kulay ng balat, at medyo chubby ang pangangatawan. Sa sandaling nagkita at nagkatagpo kayo, sunggaban mo na agad siya, dahil malinaw ang palatandaan na siya ang lalaking itinakda sa iyo ng kapalaran na siyang mapapangasawa at makakasama mo sa pagbuo ng isang maligaya pamilya.