ni Maestro Honorio Ong @Kapalaran Ayon sa Numero | March 3, 2023
Dear Maestro,
Gusto kong malaman kung kami na ba ng boyfriend ko ang magkakatuluyan at compatible ba kaming dalawa? Kung kami na ang magkakatuluyan, magkakaroon ba kami ng maligaya at maunlad na pamilya balang-araw? October 12, 1999 ang birthday ko, habang ang boyfriend ko ay February 9, 1998.
Umaasa,
Kat ng Anilao, Malolos, Bulacan
Dear Kat,
Ang zodiac sign mong Libra na pinaghaharian ng elementong hangin o air ay tunay na ka-compatible ng zodiac sign na Aquarius ng boyfriend mo. Ibig sabihin, sa Elemental Astrology, suweto kayo sa isa’t isa at napakalaki ng tsansa na kayo na ang magkatuluyan.
Ganundin ang inyong birth date, kung saan sadyang magkatugma kayo dahil ang birth date mong 12 o 3 (1+2=3) ay compatible rin sa birth date na 9 ng boyfriend mo. Ang numerong 3 at 9 ay kabilang sa tinatawag nating numerong series of 3-6-9.
Dahil sa nasabing mga pag-aanalisa, humigit-kumulang kayo na ang magkakatuluyan at nakatakdang magkaroon ng maligaya at maunlad na samahan habambuhay, lalo na kung ang kasalukuyan mong boyfriend ay medyo matigas ang hilatsa ng buhok at may kayumangging balat, habang ikaw naman ay medyo chubby o may pagka-sexy at eksakto lang ang pangangatawan.
Mapalad namang kulay ang pula, asul, violet, pink at lavender sa araw ng kasal, gayundin sa mga pangunahing gamit sa bahay. Isaalang-alang ang mga petsang 9, 18, 27, 6, 15, 24, 3, 12, 21, at 30, partikular sa buwan ng Mayo hanggang Hunyo at Setyembre hanggang Oktubre para sa panahon ng pagpapakasal.
Kapag kayo na ang nagkatuluyan, ayon sa Decadens ng inyong Kapalaran, sa taong 2029 hanggang 2030, magsisimula nang umangat at unti-unting lalago ang inyong kabuhayan hanggang sa tuloy-tuloy nang umunlad, lumigaya at yumaman ang itatayo n’yong pamilya habambuhay.