Bebot, sa edad na 28 magiging isang ganap na guro

ni Maestro Honorio Ong @Kapalaran ayon sa Numero | August 10, 2024

Dear Maestro,

Naisipan kong sumangguni sa inyo para itanong kung kailan kaya ako makakapasa sa LET exam? Dalawang beses na kasi akong nagte-take, at lahat iyon bagsak. 

Maestro, sa paanong paraan kaya ako susuwertehin? Sana matulungan n’yo ako, gustung-gusto ko na kasing makapasa para makapagturo na ako sa public school. 

Ang birthday ko ay August 14, 1998.

Umaasa,

Madelyn  ng Poblacion East, Alcala, Pangasinan 

---

Dear Madelyn,

Para makapasa ka sa LET exam, dapat kumuha ka ng exam sa tuwing positibo ang panahon. Ibig sabihin, mag-take ka sa panahong suwerte ka. 

Ang panahong ito ay mula sa ika-19 ng Hulyo hanggang sa ika-23 ng Agosto, mula sa ika-19 ng Nobyembre hanggang sa ika-23 ng Disyembre at mula sa ika-19 ng Marso hanggang ika-23 ng Abril.

Dagdag dito, dapat din kapag kumuha ka ng exam at iba pang mahahalagang pagsusulit, gumamit ka ng bagay na kulay gold o silver, halimbawa gumamit ka ng lapis o ballpen na kulay dilaw o gold ang case o lalagyan.

Kailangan ding mapunta sa iyo seat number na may sumatotal na 5 o 7, tulad ng 14, 23, 32, 41, 16, 25, 34, 43 at iba pang uri ng numerong may sumatotal na 7.

Dapat ding matuon ang petsa ng exam sa 4, 7, at 5, dahil ang mga numerong ito ang mapalad para sa iyo, bukod sa numerong may sumatotal na 4, 7 at 5, kung minsan significant din sa iyo ang numerong 8.

Dapat din maikli lang ang tabas ng iyong buhok tuwing ika’y kukuha ng exam at iba pang mahahalagang pagsusulit, upang masagap mo ang positibo at manining na aura na siyang hihigop ng suwerte at magandang kapalaran sa panahon ng pagkuha ng exam.

Panghuli, sa pagkuha ng exam dapat ka ring magsuot ng paborable mong alahas o talisman, at ang paborable mong alahas o talisman ay ang alahas na sardonyx o diamond na pinalamuti sa gold na singsing.

Samantala, ayon sa Decadens ng iyong Kapalaran ang masuwerteng taon mo ay hindi lang sa pagkuha ng exam kundi sa lahat ng aspeto ng iyong buhay ay sa susunod na taong 2025, ganundin sa taong 2026, sa nasabing panahon sa edad mong 28 pataas, walang duda makakapasa ka na sa LET exam at sa panahon iyon matutupad mo na rin sa wakas ang malaon mong pangarap na makapagturo sa public school, maging isang lisensyado at ganap na teacher.

Matapat na sumasaiyo,

Maestro Honorio Ong

Tuluyan nang na-fall… MAG-BFF, SWAK SA ASTRO-NUMEROLOGY KAYA SURE NA MAGKAKATULUYAN

ni Maestro Honorio Ong @Kapalaran ayon sa Numero | August 8, 2024

Dear Maestro, 

May crush akong lalaki na tawagin na lang natin sa pangalang James. Sa ngayon, magkaibigan lang kami, at hindi niya pa ako nililigawan. 

Gusto ko sanang malaman kung darating kaya ang araw o panahon na liligawan niya rin ako? Maestro, may chance rin kaya kaming magkatuluyan balang araw? 

Ang birthday ko ay June 9, 2001, habang October 15, 1999 naman si James.

Umaasa,

Eri Ka ng Karuhatan, Valenzuela City

---

Dear Eri Ka, 

Ang zodiac sign mong Gemini at Libra naman ang sinasabi mong lalaking lihim mong crush ay nagkataong tugma at compatible. Nangyaring ganu’n, dahil ayon sa Western Astrology kapwa kayo nagtataglay ng elementong air or hangin. Ibig sabihin, tugma at suwetung-suweto kayo sa isa’t isa, kaya anumang araw mula ngayon, posible na ang inyong pagkakaibigan tulad ng isang marikit na bulaklak na kalilitaw pa lamang sa sangay ay unti-unti na ring lumago at mamukadkad hanggang sa mauwi sa isang lehitimo at nakakakilig na suyuan.

Samantala sa aspetong pang-Numerology, ang birth date mong  9 at 15 o 6 (1+5=6) naman sa lalaking lihim mong crush ay nagpapatunay na kung ang impluwensiya ng mga numero ang tatanungin o pagbabatayan, kung paanong tugma kayo sa Astrology tulad ng nasabi na tugma at compatible rin kayo, dahil ang numerong 9 at 6 ay parehong under sa tinatawag na “series of 3-6-9”.

Lumilinaw na kung ganu’n, habang umuusad ang panahon, hindi na nga maiiwasang mahulog ang loob n’yo sa isa’t isa. Hanggang ang nasabing matamis at matimyas na ugnayan ay tuluyan na ring mabuo bilang isang wagas at masarap na pagmamahalan na tinatayang mangyayari at magaganap sa taon ding ito ng 2024. 

Ibig sabihin, kung wala namang girlfriend ang lalaking lihim mong crush at wala ka rin namang boyfriend sa ngayon, tiyak ang magaganap, darating at darating ang saktong panahon na kayo na nga ang magiging magkasintahan, at ito ay tinatayang magaganap sa buwan ng Setyembre o Oktubre. Malaki rin ang tendency na magkatuluyan at magsalo kayo sa isang matimyas at wagas na pagmamahalan habambuhay.

Matapat na sumasaiyo,

Maestra Estrellia de Luna

Mga sikreto ng Taong Singko para yumaman at makapag-asawa

ni Maestro Honorio Ong @Kapalaran ayon sa Numero | August 6, 2024

Dear Maestro,

Nais kong malaman ang aking kapalaran. Kaya naman naisipan kong sumangguni sa inyo para itanong kung may pag-asa pa kaya akong umasenso sa buhay at makapag-asawa? 28-ayos na ako ngayon, at ang birthday ko ay April 14, 1996.

Umaasa,

Mayette ng Culis, Hermosa, Bataan

---

Dear Mayette,  

Bakit naman naisipan mong ‘di ka aasenso sa buhay? Alam mo bang nabibilang ka sa tinatawag na Taong Singko? Ibig sabihin, 5 ang birth date mo, (dahil ang 14 ay 1+4=5), kaya naman ikaw ay tinatawag na Taong Singko na may destiny number na 7 (4+14+1996=2014/ 20+14=34/ 3+4=7) sa zodiac sign na Aries.

Sa ngayon, nananaig lamang sa iyong buhay ang destiny number mong 7, kaya ka pinanghihinaan ng loob na baka hindi ka umasenso at hindi ka makapag-asawa.

Ang sikreto para umasenso at makapag-asawa ka ay kumilos ka nang kumilos, at panaigin mo sa buhay mo ang birth date mong 14 o 5 at ang zodiac sign mong Aries. Ibig sabihin, hindi pupuwedeng wala kang ginagawa. Sapagkat kapag marami kang ginagawa,  tiyak ang magaganap, kusa kang magtatagumpay, uunlad, at makakapag-asawa hanggang tuluyan kang lumigaya. 

Huwag ka ring mag-alala, dahil may sikreto ang pagyaman na kapag natuklasan mo ang paraan, tulad nga sa birth date mong 5, doon ka magiging maligaya at habambuhay na magtatagumpay.

Sa kagaya mo na may birth date na 5, huwag kang pumirmi sa bahay, bagkus kumilos ka lang nang kumilos. Puwede ka namang maglalakad-lakad, o pumunta sa iba’t ibang lugar. Pero, kung nasa bahay ka lang, dapat may kinakalikot at ginagawa ka.

Kapag nasunod mo ang simpleng rekomendasyong nabanggit, ‘yun bang palagi kang busy, at palagi kang on the go! Makikita mo, kahit hindi ka magtrabaho, kusang lalapit sa iyo ang suwerte, dahil ibinigay mo o ginagawa mo ang pinapagawa sa iyo ng iyong unconscious self mo.

Tulad ng nasabi na at sasabihin ko na naman uli, dahil makulit talaga si Maestro Honorio Ong ay ‘yun nga, dapat palagi kang may pinagkakaabalakusanghan.

Kaya kahit na nasa bahay ka lang, kumilos ka nang kumilos, gumawa nang gumawa, maglakad nang maglakad, magkalikot ng kung anu-ano’ng bagay, maghugas ng pinggan, magwalis, mag-ayos ng bahay, magluto, at magtanim.

Kapag ganito ang ginawa mo, ‘yun bang walang kapagurang pagkilos, tiyak na kusang darating sa iyo ang maraming suwerte hatid ng iyong kapalaran, hindi lang sa career kundi maging sa pag-ibig at pakikipagrelasyon.

Ayon sa Decadens ng Kapalaran, magsisimulang mangyari at  matutupad ito sa susunod na taong 2025, hanggang 2026 sa edad mong 29 pataas, – magkaka-boyfriend ka na, gaganda na ang iyong career, at makakapag-asawa ka pa. 

Matapat na sumasaiyo,

Maestra Estrellia de Luna