ni Maestro Honorio Ong @Kapalaran Ayon Sa Numero | Nov. 25, 2024
Dear Maestro,
Maraming beses na akong nag-abroad. Kaya lang, naubos na ang ipon ko at ngayon ay balak ko na naman sanang bumalik sa dati kong amo. Wala naman din umanong problema sa kanila kung gusto kong bumalik.
Maestro, matutuloy ba ako ngayong taon sa binabalak kong pagbalik sa dati kong amo? Ayon sa mga amo ko, mag-ayos na raw ako ng mga papeles at sila na raw ang bahala sa visa ko.
Pagdating naman sa pag-ibig, wala pa akong boyfriend. Kailan kaya ako magkaka-boyfriend at makakapag-asawa?
Ang birthday ko ay October 9, 1989.
Umaasa,
Baby Lyn ng Bagumbayan, Pililla, Rizal
Dear Baby Lyn,
Ayon sa birth date mong 9 at destiny number na 1, (10+9+1989=2008/ 20+08=28/ 2+8=10/ 1+0=1), kailangan mong magpakumbaba at ‘wag masyadong mag-angas para mas madali mong makamit ang ligaya at tagumpay, hindi lang sa pag-a-abroad at career, kundi pati na rin sa pag-ibig.
Muli ka namang makakabalik sa ibang bansa, lalo na kung gugustuhin mo talaga dahil nagtataglay ka ng destiny number 1, ‘yun nga lang, ‘wag mo agad ipagsasabi o ipapamalita ang iyong mga plano at ginagawa ngayon, dahil habang secret lang ang iyong pag-a-apply, mas mabilis kang makakalipad patungong ibang bansa.
Kaya mas maganda kung ilihim mo lang ang ginagawa mong pag-a-apply sa abroad na ang maaaring senaryo ay ‘yun bang sa sandaling nalaman ng mga taong malalapit sa iyo o nakapaligid sa iyo ay magugulat na lang sila dahil papaalis ka na.
Sa aktuwal na buhay, minsan kasi mentras ikinukuwento natin ang ating mga balak at plano sa buhay, akala nila nagpapainggit o nagyayabang lang tayo, kaya ang tendency, lihim o sa mas saktong salita, sa likod ng kanilang iniisip, wini-wish tuloy nila na sana mabigo ka, dahil ang yabang mo kasi!
Madalas mangyari ang ganitong kaganapan, lalo na sa mga taong kontrabida na akala mong nagyayabang nang nagyayabang na ubod ng galing na tila minamaliit lagi ang kaharap o ang kausap. Kaya pag-alis nitong kontrabidang tao na ito, sa isip-isip ng kausap niya, “Madapa at mabigo ka sana!”
Ganu’n ‘yun! Kaya minsan, mas mainam pang ilihim na lang natin ang ating mga plano at binabalak sa buhay, kapag nand’yan na, aabutin mo na lang ang tagumpay, du’n mo na lang sa kanila ibida.
Sa ganu’ng paaran, hindi na sila makakakontra at hindi na sila makakapag-wish ng masama laban sa iyo, dahil hawak mo na ang tagumpay at papaalis ka na talaga patungong ibayong dagat.
Upang mas madali kang makapag-abroad, tulad nang nasabi na, ilihim mo lang ang iyong mga binabalak at pinaplano, lalo na sa mga inggitera, dalahirang kapitbahay at sa mga kaibigang magaling gumawa ng kuwento upang hindi nila makontra ang iyong layunin na muling makapag-abroad.
Pangalawa, palagi kang magsuot ng kulay na pula, dahil ang birth date mong 9 ay nagtataglay ng ruling planet na Mars. Ibig sabihin, sa anumang pagkakataon, sitwasyon at pangyayari, mas mananaig sa iyong puso at isipan ang katapangan. ‘Yun nga lang, kung minsan ito ay sumosobra na kaya hindi mo nakakalkulang mabuti ang susunod na mangyayari.
At dahil Mars ang ruling planet ng numero mong 9, may mga sitwasyon din na may mga nakakaaway ka. Iwasan mo rin ang mga bagay na ito, kailangan marunong kang magpasensiya, magmahal at magtiis, lalo na sa mga negatibong ugali ng iyong mga kakilala at kasama.
Kung mapagkumbaba, mapagmahal at umiiwas ka sa mga intriga, mas madali mong mapipitas ang isang maunlad, masaya at panghabambuhay na tagumpay at kaligayahan.
Sa sandaling nasunod mo ang mga simpleng rekomendasyon sa itaas, makikita mo, sa taon ding kasalukuyan, sa huling linggo ng Disyembre, pinakamatagal na sa susunod na taon, sa buwan ng Enero, may isang mabunga at mabiyayang pangingibang-bansa ang itatala sa iyong kapalaran.
Habang ayon naman sa iyong Love Calendar, kapag nasa ibang bansa ka na, sa taong 2026, sa edad mong 37 pataas, isang lalaking isinilang sa zodiac sign na Aquarius ang darating at manliligaw sa iyo, na sa bandang huli ay siya mo na ring mapapangasawa at makakasama sa pagbuo ng isang maligaya at panghabambuhay na pamilya.