Nagawa ng U.S. military bases sa ‘Pinas — Coseteng.. Prostitusyon, krimen at droga, talamak!

ni Jeff Tumbado | February 16, 2023

Pinag-iingat ni dating Senador Nikki Coseteng ang gobyerno ng Pilipinas sa binabalak na pagbuhay ng mga base-militar sa ilalim ng Enhance Defense Cooperating Agreement (EDCA).

Sa Pandesal Forum sa Kamuning Bakery Cafe sa Quezon City, ipinahayag ni Coseteng ang pagkabahala sa aniya’y unti-unting pagpapagamit ng Pilipinas sa Amerika kaugnay sa plano nito na makidigma laban sa China.

May duda ang dating senador na ginagamit lamang ng U.S. ang Pilipinas upang itulak nito na labanan ang China dahil sa isyu ng agawan ng teritoryo sa West Philippine Sea (WPS).

Wala umanong naidulot ang U.S. Military Bases sa bansa noong 1990s bagkus ay nagresulta lamang ng paglaganap ng prostitusyon, krimen at ilegal na droga.

Tinukoy pa ni Coseteng na bagsak din ang ekonomiya sa Olongapo City noong naroon ang military base ng U.S. dahil wala naman itong nalikhang malaking trabaho para sa mga Pilipino.

Idinagdag ng dating mambabatas na gagamitin lamang ng mga Amerikano ang bansa para isulong ng U.S. government ang sarili nitong interes na negosyo ng armas tulad ng ginagawa ngayon sa Ukraine.

Matutulad lamang aniya ang Pilipinas sa ibang mga bansa gaya ng Ukraine, Egypt, Vietnam at Iraq na nalugmok sa kahirapan bunsod ng giyera na ginawa ng United States.

9 na US bases, pasok sa ‘Pinas.. Sasot kay P-BBM: Tuta ka ng Kano!

ni Mars Santos | Pebrero 7, 2023

Nagbabala ang Foreign Policy Analyst na si Sass Rogando Sasot na posibleng maging target ng China ang Pilipinas kung matutuloy ang pagbibigay ng karagdagan pang access sa militar ng Amerika sa teritoryo ng Pilipinas.

Ayon kay Sasot, kung itutok ng China ang missile arsenal nito sa mga lokasyon kung nasaan ang puwersa ng Estados Unidos, tiyak damay ang Pilipinas.

“So crudely speaking, we are another target for China in order to exhaust its missile arsenal. So, can President Marcos, Jr. tell us how many of us will die? How our economy would look like after the dust settled? How are we going to rebuild this republic?” ani Sasot sa Pandesal Forum sa Kamuning Bakery Cafe sa Quezon City.

Giit pa ni Sasot kay Marcos, hindi lang sa ekonomiya ito puwedeng magdulot ng matinding epekto kundi maging sa maraming buhay na maaaring mawala.

Ani Sasot, hindi Amerika o China ang pagpipilian dito kundi ang pagiging tau-tauhan o panindigan ang soberenya.

“Aren’t we supposed to be having a public debate whether this is the future we want to have for our country? Does President Marcos, Jr. have the guts to stand up to the United States of America and say ‘no’, I will not allow the Philippines to be used in your war? Shouldn’t Congress be intervening about this? The choice is not between China or the United States, but between being a pawn and being a sovereign,” dagdag pa ni Sasot.

Apela niya kay P-BBM, maging bayani at panindigan ang para sa kabutihan ng mamamayang Pilipino.

“Heroes are often those who emerged triumphant after a tragedy. But the greater hero is the one who prevented a tragedy from happening in the first place. Mr. President Ferdinand Marcos, Jr. be that hero for our country. Huwag ka nang magpaka-tuta,” pagtatapos ni Sasot.

Matatandaan na upang lalong mapaigting ang pagpapatupad ng Enhanced Defense Cooperation Agreement (EDCA) ay nagkasundo ang Pilipinas at Estados Unidos na magtatag ng apat na military base ng sundalong Kano sa bansa.

Kasalukuyang may limang Philippine military bases sa ilalim ng EDCA, kabilang na rito ang Benito Ebuen Air Base sa Cebu, Lumbia Airport sa Cagayan de Oro, Fort Magsaysay sa Nueva Ecijia, Antonio Bautista Air Base sa Palawan at Basa Air Base sa Pampanga.

WPS at COVID-19, 'di kayang tapusin ni P-Du-30

ni Mary Gutierrez Almirañez | May 26, 2021

Pinag-usapan ng mga kritiko ang nangyaring dayalogo sa pagitan nina Pangulong Rodrigo Duterte at dating Senate President Juan Ponce Enrile hinggil sa West Philippine Sea at ang impact nito sa 2022 national election, batay sa ginanap na Pandesal forum sa Kamuning Bakery kaninang umaga, May 26.

Matatandaang naging guest speaker ni Pangulong Duterte si Enrile sa kanyang Talk to the People address nu’ng ika-17 ng Mayo, kung saan sinabi ni Enrile sa Pangulo na,

"If I were in your place, I would've done the same thing. What else can a president of this country do under our present national circumstance? You can shout, you can beat your breast, you can raise your fist. Without any back-up, that is just noise."

Dagdag ni Enrile, "Hindi natin maaasahan ang America sa mga ganitong usapin.”

Sinunod lamang ng pangulo ang payo ni Enrile, sapagkat aniya, “He was there right at the beginning. So, sa kanya ako makinig kasi sa kanya ako bilib sa utak at pag-intindi nitong problema sa ating West Philippine Sea.”

Opinyon naman ni Executive Director Ramon Casiple ng Institute for Political and Electoral Reform (IPER) sa Pandesal forum kanina, “They need to negotiate diplomatically because we can’t afford war… Last year, Australia, US, Europe, now this India, Japan, other countries, has been side already in our position.”

Matatandaan ding sinabi ng Pangulo na huwag nang pag-usapan ang tungkol sa West Philippine Sea (WPS) at ‘wag gamitin ang COVID-19 sa pangangampanya sa 2022 national election.

Ikinabahala rin nina Research fellow of Asia Pacific Pathways Foundation Lucio Blanco III Pitlo at University of Asia & the Pacific Professor Dr. Robin Michael Garcia ang posibilidad na umabot pa hanggang sa susunod na administrasyon ang usapin sa WPS at ang lumalaganap na COVID-19.

Sa ngayon ay ipinapayo sa mga botante na maging mapanuri pagdating sa botohan. Kabilang naman sa mga umiingay na pangalan sa parating na eleksiyon ay sina Senator Bong Go, Senator Manny Pacquiao at Davao Mayor Sara Duterte na puro taga-Mindanao.

Tinalakay din ni Pitlo ang posibilidad ng pagtakbo bilang pangulo ng baguhang Manila mayor na si Isko Moreno, kung saan mga taga-Luzon lamang daw ang nakakakilala rito at posibleng bumoto sa kanya pagdating ng eleksiyon.

Samantala, nakatakda namang maglabas ng survey sa Hunyo sina Dr. Garcia tungkol sa possible national candidates sa pagka-presidente, bise-presidente at mga senador.