Mahihinang bansa tulad ng ‘Pinas, mahihirapang ipreserba ang soberanya

ni Ka Ambo @Bistado | Mar. 29, 2025

Dumating na si US Defense Secretary Pete Hegseth upang makipagmiting kay Defense Secretary Gibo Teodoro.

Walang duda, “giyera” ang pag-uusapan.

----$$$--

MAUGONG ang ulat na magdadala pa uli ng isa pang Typhon missile system ang US sa teritoryo ng Pilipinas.

Tiyak na papalag ang China.

----$$$--

AKTUWAL na soberanya ng bansa ang agenda.

Soberanya ng ‘Pinas na sinasakop ng China o soberanya ng ‘Pinas na sinasawsawan ng US.

Mas mainam sana kung soberanya ng ‘Pinas na malaya sa panghihimasok ng China at US.

----$$$--

Sa praktikalidad, ang mahihinang bansa gaya ng Pilipinas ay mahihirapang ipreserba ang soberanya nang hindi madidiktahan o pakikialaman ng malalaking bansa.

Isang halimbawa dito ang Ukraine, puwede bang sabihin ng Ukraine sa US na lumayas kayo at huwag ninyo kaming pakialamanan.

Hindi puwede.

----$$$--

SA totoo lang, ang isyu ngayon ay ang rare mineral deposit ng Ukraine na hindi malayong maisanla sa US — kapalit ng suporta kontra Russia.

Sa aktuwal, ang bundok-bundok na natural resources ng Pilipinas ay matagal nang ‘nasamsam’ ng mga dayuhan.

----$$$--

MASELANG isyu ang soberanya at dahil ang nag-uusap ay dalawang defense chief ng bansa --walang duda, iyan ang agenda.

Kung makikinabang ang Pilipinas o ang US — o parehong mabibiyayaan ang dalawang bansa?

Iyan ang dapat masagot.

----$$$--

KAPAG soberanya ang agenda at detalye ng usapan ay karaniwang “state secret”.

Nakataya dito ang seguridad ng bansa.

Mag-aantay lang tayo kung ano ang ipahayag ng Malacañang at ng Pentagon sa agenda ng mga kumperensiya.

----$$$--

SIYEMPRE, umaasa tayo na mas makikinabang ang Pilipinas sa alinmang usapan sa mga dayuhan.

Iyan ang ipagdasal natin nang walang patid.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

80th b-day ni ex-P-Duterte, buong mundo nagse-celebrate!

ni Ka Ambo @Bistado | Mar. 28, 2025

80th birthday ngayon ni Digong.

Extreme celebration si Tatay.

----$$$--

WALA sa hinagap ni Digong at ng kanyang pamilya na sa The Netherlands siya mag-ootsenta-anyos. 

At huwag ka, ipagdiriwang ang kanyang birthday sa malalawak na parke sa Pilipinas — at buong mundo — nang sabay-sabay.

Higit sa pangarap niya ang natupad.

-----$$$--

NAALALA natin ang isang dating presidential candidate na naging mayor pa at kongresista ay namatay nang mahulog habang nagkukumpuni ng bubong.

Ganyan din ang naging kamatayan ng isang lider ng militanteng grupo, nahulog mula sa bubong na kanyang inaatipan.

-----$$$--

ANG dalawang lider-mamamayan na ito ay nabingit ang buhay sa panganib ng serbisyo-publiko, at ang militanteng lider kung sakaling namatay sa gitna ng kilos-protesta o napatay ng pulis o military — ay tiyak na magiging martir.

Pero, nakakahinayang ang kanilang “pagkamatay” — sa isang walang kuwentang aktibidad o sitwasyon.

----$$$--

NAPAKASUWERTE ni Digong kapag binawian siya ng buhay sa loob ng karsel o kahit sa pag-uwi niya ay binawian siya ng buhay sa gitna ng kaliwa’t kanang demonstrasyon.

Mas makulay at makabuluhan ang kamatayan habang may ipinakikipaglabang adhikain kaysa sa tahimik na nagbabakasyon sa Davao at namatay sanhi ng ordinaryong sakit gaya ng diarrhea o dengue o trangkaso o pagkabangga ng motorsiklo.

-----$$$--

ANG kuwentong “Pagong at Matsing” ni Dr. Jose Rizal ay puwedeng magamit dito dahil dinampot si Digong upang ihagis ng karagatan kung saan lihim niyang nais malublob — ang isyu ng giyera kontra droga.

Tama, ang ilang komento na nagsasabi na “hindi dapat bawian ng buhay si Digong ngayon habang nasa loob ng karsel”.

----$$$--

Mas mainam umano ay magtagal pa si Digong sa karsel at magdusa.

Pero, ang pagong ay lihim na nagsasaya habang lumalangoy sa ilog matapos ihagis ng matsing.

-----$$$---

SA totoo lang, hindi si Digong ang tunay na isyu sa sitwasyon, bagkus ay ang posibilidad na maupo sa Malacañang ang kanyang anak na si Vice President Sara Duterte.

Sa 1.3 milyong Pinoy, sa ngayon — tanging si VP Sara — ang may pinakamalapit na tsansa na maging pangulo sapagkat siya ay No. 2 leader ng bansa — wala nang iba pa.

-----$$$---

SA ayaw at sa gusto natin, ang sitwasyon ni VP Sara ay kainggit-inggit dahil oras-oras ay siya ang pinag-uusapan.

Wala nang ganitong klase ng personalidad sa pulitika sa bansa ang may ganyang biyaya ng publisidad.

----$$$---

HARINAWA ay maging mapayapa ang ating bansa sa gitna ng maselang sitwasyong ito.

Hindi sinasadya ay napag-uusapan ang soberanya.

Kapag soberanya, kakambal niyan ang seguridad ng bansa.

----$$$--

AMINADO ang lahat na hindi inilalantad sa publiko ang ilang detalye kaugnay sa pag-aresto kay Digong.

Hindi na tayo dapat pang magtanong.

Mag-abang na lang tayo ng opisyal na pahayag ng Malacañang.

Minsan may nagsabi, mas mainam na manahimik kaysa sumawsaw sa masasalimuot na diskusyon.

‘Yan lang muna tayo, tipi-tipi-tipitin!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Sa pagguho ng tulay sa Isabela, kontraktor, padrino at korupsiyon, ‘magkakapatid’

ni Ka Ambo @Bistado | Mar. 26, 2025

Natabunan na ang isyu hinggil sa pagguho ng tulay sa Cabagan, Isabela.

Nagtuturuan ang mga kumag.

Kumbaga sa postings sa social media, ang keywords dito ay kontraktor, subasta, padrino at korupsiyon.

----$$$--

KAPAG may imprastruktura, hindi kailangan ng debate — idinidikit ‘yan sa korupsiyon.

Kakambal ‘yan ng kasaysayan ng Republika ng Pilipinas.

‘Pag may gumuho, dambuhalang kurakot!

----$$$--

MAY nagma-marites ngayon na isang mambabatas, ang pinalagan na mismo ng mga taga-DPWH.

Isang kontraktor kasi ito na naging partylist.

Kitam, napasok pa niya ang modernong “modus”.

-----$$$---

WALA siyang sariling distrito, pero siya na mismo ang nagma-marites upang mai-black propaganda ang mga lehitimong kontraktor.

Siyempre, ito ay para masulot niya — maliit man o malaking “ticket projects”.

Tsk, tsk, tsk.

----$$$--

EPEKTIBO ang kanyang diskarte, kasi may naine-namedrop siya kakambal ang kanyang padrino.

Presto, ayos na ang buto-buto.

He-he-he.

----$$$--

SIMPLE lang ang boladas: “Napag-usapan na namin iyan ni boss, sa akin ang project na ‘yan”.

Marami siyang padrino at maboladas.

Ere ang angas: Solidarity sa corruption.

Ha! Ha! Ha!

----$$$--

ISANG malaking problema ngayon ay ang mental health at marami ang umiiwas na pag-usapan ito.

Paano mareresolba kung walang kikilos?

-----$$$--

NATUTUWA tayo sa pagsuporta sa mga single parent at pamilya na may anak na may mental health conditions sa Pasig City.

Karaniwang idinadaing ay “ADHD” at “Autism”.

-----$$$--

SA totoo lang, isang civic leader na may apat na anak na dumaranas ng ganitong problema ay nagpapasimuno na tulungan ang mga batang may mental health conditions.

Nagkusang tumulong dahil nararamdaman kasi ni Sarah Discaya ng Pasig City kung paano at gaano ang hirap ng mga magulang na may mga anak na may Autism at ADHD.

----$$$--

“NAUUNAWAAN   ko ang hirap na nararanasan ng mga magulang ng mga batang may ADHD. Alam ko ang kanilang pangangailangan at kung gaano kamahal ang mga therapy at ibang medikal,” wika ni Discaya na kandidatong mayor sa Pasig.

Mahaba ang gamutan at halos habang buhay ang pag-aalaga sa mga batang may ganitong karamdaman kaya’t ito ang pinagtutuunan ni Discaya.

----$$$--

TINIYAK  niya sa mga Pasigueño na hindi rin siya titigil sa pagkakawanggawa at pagtulong sa mga magulang na kapos sa pantustos at panggastos upang maalalayan ang kanilang mga anak.

“Ang sipag, pananampalataya sa Diyos, at tiwala sa sarili  ang pundasyon nating lahat upang maibsan ang mabibigat na suliraning ito,” ani Discaya.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.