Realtalk lang, besh! Iba’t ibang dahilan kaya ‘di ka yumayaman

ni Justine Daguno - @Life and Style | November 6, 2021

“Bakit hindi ako yumayaman?” Isa ka ba sa mga nakapagtanong na niyan sa iyong sarili? Tipong kahit ano’ng sikap at tiyaga, tila mailap ang pag-asenso? Naku, maraming dahilan ‘yan. Posibleng ito’y dahil madalas magkaroon ng maling desisyon, hindi balanse ang lifestyle, masyadong pressured sa mga tao sa paligid at iba pa. Well, para mabawasan ang mga iniisip mo sa buhay, narito ang ilan sa mga dahilan kung bakit hanggang ngayon ay hindi ka pa rin yumayaman:

1. WA’ PAKI SA UTANG. Ikaw ba ‘yung tipong utang here, utang there? Naku, maling desisyon ‘yan sa buhay. Ang pagkakaroon ng utang ay isa sa mga dahilan kung bakit hindi umuunlad ang tao. Hangga’t makakapagtiis o makakapagsakripisyo ay ‘wag humiram na pera, lalo na kung para lang naman sa luho o hindi importanteng bagay.

Domino-effect kasi ‘yan, ‘pag nangungutang ang tao ay hindi rin ito nakakapag-ipon. At kapag walang ipon, malabong umasenso.

2. HINDI INIISIP ANG BUKAS. Sa ayaw o sa gusto natin, magkakaiba ng pribilehiyo sa buhay ang bawat tao, kaya kung ikaw ‘yung tipo na “isang kahig, isang tuka”, mali naman yata na puro YOLO ka. ‘Ika nga, mabuhay nang naaayon sa financial status. Walang masama sa pag-e-enjoy, pero dapat ‘wag kalilimutang may bukas pa na kailangan din ma-survive. ‘Wag buhus-buhos biyaya, tapos bukas tunganga.

3. WALANG ‘MONEY PLAN’. Ang pagkakaroon ng plano sa pera ay malaking hamon na dapat nating napapagtagumpayan. Sobrang mali ‘yung once na matanggap ang suweldo ay iwi-withdraw lahat, tapos saka pa lang pag-iisipan kung saan mapupunta ang bawat sentimo. Mas oks siguro kung bago pumunta sa ATM machine, gumawa muna ng listahan, para man ito sa bayarin, pambayad-utang o pang-savings. Goods ito dahil naiiwasan ang pagkalito at pagkakaroon ng mga hindi inaasahang gastusin.

4. HINDI MARUNONG IHIWALAY ANG KAILANGAN SA GUSTO LANG. Isa pa sa mga pagkakamaling nagagawa ng marami sa atin ay ang kawalan ng kaalaman sa paghihiwalay sa mga gastusin para sa mga bagay na kailangan at kagustuhan lamang.

Ito’y simple lamang, palaging unahin ang mga bagay na kailangan at kapag may sumobra sa budget, puwede na bigyang-pansin ang mga bagay na gusto lang.

5. WALANG PAGSUNOD SA BUDGET. May mga tao na may listahan nga at alam ang kailangan sa gusto lamang, pero hindi naman kayang panindigan. Hindi kayang kontrolin ang sarili laban sa tukso, kaya ang ending ay nawawala na sa budget. Kapag gumagawa ng budget, dapat committed at disiplinado, ‘wag ito hayaang masira nang sa gayun ay mapunta sa bagay na kapaki-pakinabang ang perang pinaghirapan natin.

Marami sa atin ang hirap sa paghawak sa pera, hindi dahil sa hindi madaling kumita o walang oportunidad, kundi dahil mahirap kalaban ang sarili at ang mga bagay-bagay sa paligid.

Maraming maaaring makaapekto sa diskarte natin sa paghawak sa pera. Sa totoo lang, wala naman yata talagang sikreto sa pagyaman, pero kung magkakaroon ng disiplina, matututong magsakripisyo at higit sa lahat ay magiging wais, hindi malayong makamit ang pag-asenso at tagumpay.

Gets mo?

Epektibong home remedy sa kabag, alamin!

ni Justine Daguno - @Life and Style | November 4, 2021

Knows n’yo ba na ang average adult ay naglalabas ng hangin o umuutot nang 13 hanggang 21 beses sa isang araw? Well, ayon sa pag-aaral, ang pagkakaroon ng hangin sa tiyan ay natural lamang, sapagkat ito ay bahagi ng proseso ng digestion, kaya ‘wag mahiyang umutot — dahil kapag ito’y pinigil, malamang ay “See you, doc” ‘yan dahil maaaring makaramdam ng pananakit o discomfort sa tiyan o ‘yung tinatawag na “kabag”, na ang masaklap, maaari pang magdulot ng mas malalang sakit tulad ng constipation o diarrhea.

Pero worry no more dahil narito ang ilan sa mga epektibong home remedy sa kabag o hangin sa tiyan:

1. ‘WAG MASYADONG MAG-CHEWING GUM. Mataas ang chance na magkaroon ng kabag ‘pag masyadong nagtsu-chewing gum. Sa bawat pagnguya, tuluy-tuloy na nakapapasok ang hangin sa bibig kaya ito’y naiipon sa sikmura na nagdudulot ng gas pain. Kung hindi naman maiiwasan, piliin na lang ang menthol o ‘yung hindi gaanong matamis kaysa sa sweetened gums dahil mas nakababawas ng pag-trigger sa gas pain ang unsweetened gums.

2. GUMAMIT NG HOT COMPRESS. Kapag inaatake ng kabag, lapatan agad ng hot compress ang tiyan nang sa gayun ay kumalma ito. Ang init mula rito ang makatutulong upang ma-relax ang muscles at madaling maitulak palabas ang hangin.

3. ‘WAG MAGING YOSI-KADIRI. “Classic yosi”, vape o e-cigarette man ‘yan, ang madalas na pagyo-yosi ay nakapagdudulot ng kabag, sapagkat sa bawat hitit nito ay malaking porsiyento rin ng hangin ang nahihigop, na siyang naiipon sa digestive tract.

Makabubuti ang pag-iwas sa paninigarilyo, hindi lamang para maiwasan ang kabag, hindi upang magkaroon ng mas malusog na pangangatawan.

4. KUMAIN NG MABUTI. Ibig sabihin, ‘wag magmadali o nguyain nang maayos ang pagkain. Isa sa mga dahilan kung bakit nagkakaroon ng kabag ay dahil hindi nada-digest nang maayos ang pagkain sapagkat hindi ito maayos na nanguya. Kaya naman, siguraduhing mangunguya nang at least 30-times ang pagkain bago ito tuluyang lunukin.

5. ‘WAG MAHIYANG UMUTOT. Muli, walang dapat ikahiya sa ganitong bagay dahil ito ay normal na bahagi ng ating sistema. Kung ayaw nating lumala ang kabag, ‘wag pigilin ang paglabas ng hangin sa ating katawan, pero siyempre, gawin ito nang hindi nakakaperhuwisyo ng ibang tao. Kumbaga, dapat natural, pero disenteng gawain pa rin.

Bagama’t simpleng bagay lamang ito, kapag paulit-ulit na nangyayari ay hindi na dapat ipinagsasawalambahala. Sa panahon ngayon, dapat prayoridad ang kalusugan dahil mas maganda pa ring harapin ang bukas nang walang kahit anong iniinda sa katawan.

Ganern!

Todo-kayod, pero keri na bang mag-level up? Alamin: 7 signs na Financially Stable ka na

ni Justine Daguno - @Life and Style | October 30, 2021

Karamihan sa atin, goal ang magkaroon ng stable na career, sariling saksakyan, sariling bahay at lupa, mag-asawa at bumuo ng sariling pamilya pagdating ng adulthood stage. Pero sa totoo lang, hindi ‘yun ganu’n kadali dahil upang makuha ang mga life goals na ‘yan, marami pa tayong dapat unahin at number one r’yan ang pagiging financially stable. Bago pumasok sa panibagong stage ng buhay, paano nga ba malalaman kung ready o financially stable na tayo?

Nairto ang ilang signs para masabing achieved na ang financial stability:

1.HINDI NA PANG-SURVIVE ANG SAHOD. Marami sa atin ang kapit sa suweldo para maka-survive sa buhay. Hirap kumilos o magplano dahil palaging naghihintay na makasahod muna. Pero kapag financially stable na, hindi na ito pang-‘survival mode’.

Meaning, 3-days mula ngayon o next week man ang payday ay wa’ paki o tipong nakaalis na sa ‘gapang stage’ dahil kaya nang kumain ng masarap kahit wala pang suweldo.

2. MAY SAVINGS ACCOUNT NA. Importanteng magkaroon ng ipon dahil mahirap tumanda o mag-level-up sa buhay kung tuwing suweldo lamang may pera. ‘Wag pumayag na nasa adulting stage na ay “isang kahig, isang tuka” pa rin dahil sobrang mali ‘yun. Kaya naman, kung nagkakalaman at stable na ang savings account natin, congrats dahil isang check na financially stable na tayo!

3. MERONG EMERGENCY FUND. Bukod sa ipon ay may emergency fund na rin. Ito ay hiwalay na ipon na siyang pinagkukunan ‘pag may nangyaring hindi inaasahan.

Kumbaga, may magkasakit man o mawalan ng trabaho, anytime ay may mahuhugot at hindi na kailangang mamrublema sa pera o umutang nang umutang.

4. MERONG PAMBAYAD SA BILLS. Isa sa mga bagay na dapat ika-proud bilang financially stable ay ‘pag updated palagi sa mga bayarin. Wala nang kaba ‘pag may kumatok para sa reading ng tubig, kuryente, internet at iba pa dahil naka-ready na agad ang mga pambayad o meron na talagang monthly budget para sa bills.

5. MERONG LIFE/HEALTH INSURANCE. Kung ‘yung iba ay dedma sa mga insurance dahil sa kaisipang, “Mas oks mag-YOLO dahil bagets pa,” ibahin natin ang mga taong financially stable, meron silang life at health insurance kahit young adults sila. Tandaan, mas mura ang insurance habang bata pa at mas malaki naman ang amount na makukuha sa pagtanda.

6. WALA NANG UTANG. Financially stable na ‘pag wala na tayong utang o hindi na kailangang mangutang pa. Nalagpasan na ang mga panahong walang-wala o hirap na hirap humanap ng ipambabayad sa mga utang. ‘Yun nga lang, madalas ay tayo na ang gustong utangan ng iba. Chos!

7. NAKATULONG NA SA PAMILYA. Pamilyado man o hindi, kapag kaya na nating tumulong financially sa mga magulang o kapatid na nangangailangan nang hindi masyadong nako-compromise ang mga personal expenses, good sign ‘yan na na-reach na natin ang financial adulthood.

Tandaan na ang pagiging financial stable ay hindi lamang basta goal na pagkatapos makamit ay tapos na. Dapat itong maging parte ng lifestyle na mine-maintain dahil ayaw nating bumalik sa panahong gipit na gipit o tipong hingi lang nang hingi. Oks magkaroon ng sariling pera, lalo na kung nagagamit ito ng tama.

Gets mo?