3 nag-Darna, sama-sama… MARIAN, JOIN NA RIN KINA ANGEL AT SHARON SA PAGIGING KAKAMPINK

ni Julie Bonifacio - @Winner | May 2, 2022

Nag-trending si Marian Rivera sa Twitter kasabay ng grand rally ng team nina VP Leni Robredo at Sen. Francis “Kiko” Pangilinan sa Cavite kahapon.

May kumalat kasi na campaign promo picture sa socmed para sa grand rally ng Angat Buhay Team nina VP Leni at Kiko sa Dasmariñas, Cavite kung saan larawan ng isang babae na walang mukha ang nakalagay, pero may suot sa ulo na gaya ng headdress na gamit ni Darna.

At heto ang nakalagay na caption: “Si Angel Locsin at si Sharon na parehong naging Darna ay sumama na. So hus diz? #CaviteIsPink”

Ang dami namang nanghula na si Marian ang naka-silhouette na hugis-babae na may headdress na gaya ng simbolo ni Darna.

“Marian Rivera is from Cavite. Waaaaaaa.”

“Opkors, ang original na "sabay-sabay tayo", Marian Rivera.”

“Sa DLSU Dasma graduate si Marian… baka si Marian ‘yan, hopefully.”

“Marian Rivera and Dingdong endorsed VP Leni back in 2015. I’m sure sila ‘yan, nag-Darna rin si Marian sa GMA dati, galing nga n’ya ru’n, eh.”

Kung si Marian nga ang tinutukoy sa kumalat na campaign material ng mga Kakampink, siya ang kauna-unahang major star ng GMA-7 na umapir sa rally ng Angat Buhay Team nina VP Leni at Kiko.

Ang tanong, samahan kaya si Marian ng mister niyang si Dingdong sa rally? May tsika kasi na hindi pinapayagan ng GMA-7 ang kanilang mga exclusive artists na sumama sa anumang political party.

Si Marian naman kasi ay may ibang nagma-manage sa kanyang career kaya siguro puwede siyang umapak sa stage ng political rallies.

Bukod kay Marian, meron ding nanghula na ang tinutukoy na Darna sa photo ay walang iba kundi ang pinakabagong Darna ng ABS-CBN, walang iba kundi si Jane de Leon.

Anyway, not two but three big stars nang gumanap bilang Darna sa screen ang sumuporta na kay VP Leni for president.

Nauna na si Megastar Sharon Cuneta, then si Angel Locsin at ang pinaka-latest ay walang iba kundi si Vilma Santos.

Ang bongga nga sana kung magsasama-sama on one stage ng Kakampink rally sina Ate Vi, Megastar, Angel and Marian, ganu’n din sina Kathryn Bernardo, Nadine Lustre, Kim Chiu at Anne Curtis.

Komedyana, feeling-sikat daw, niresbakan… DJ DURANO, NAGSORI NA KAY POKWANG

ni Julie Bonifacio - @Winner | May 1, 2022

Personal naming nakunan ng reaksiyon ang komedyanang si Pokwang tungkol sa pagtalak niya sa isang GMA-7 director at sa aktor na si DJ Durano na nag-viral sa social media this week.

Nag-umpisa ang isyu kay Pokwang at sa mga nabanggit nu’ng mag-tweet ang komedyana ng na-screengrab na news item ukol sa pagkakabili ng bilyonaryong negosyante na si Elon Musk ng Twitter sa halagang $44 billion. Nangako raw si Musk na pupuksain ang pagpapakalat ng mga unwanted promotional content sa Twitter.

Caption ni Pokwang sa kanyang tweet, “Katapusan n’yo na, mga trolls!! Next naman sana, TikTok at FB na nag-aalaga at nagpapalaki ng mga trolls na ‘yan!”

Ini-repost naman ng GMA-7 director na si Rado Peru sa socmed niya ang naturang Twitter post ni Pokie.

At sa tweet ng direktor ay nag-post ng ganitong comment si DJ, “Feeling sikat s’ya, 'di naman. Sa ABS-CBN lang napansin ‘yan, feeling niya, Ai Ai siya, ang layo, maryosep!”

Hindi ito pinalampas ni Pokie at sinita si DJ.

Post ni Pokwang, “At ikaw, DJ Durano!! Woohoo Dios mio!! Feeling sikat ako??? Nagpi-feeling Ai Ai ako??? Hahahahaha! Unang-una, oo, sikat ako kumpara sa 'yo, tah ka, plastik ka!!! Ikaw laging sabit lang sa movie ng namayapa kong mahal na direktor kasi nga nagagalit ka kapag hindi ka kasama sa mga proyekto n’ya! Kapal ng mukha mo! Kung sino man mga friend n’ya dito, pakipaabot sa kanya ito, plastik siya!!”

Sa launching ni Pokwang bilang celebrity endorser ng Klio plastic wares, food storage, dispensers at marami pang iba, tinanong namin ang komedyana sa isyu nila ni DJ.

“'Di ba, sinasabi ng marami, ang showbiz, puno ng kaplastikan. 'Yung kay DJ, medyo na-hurt lang ako kasi ‘di ba, ‘yun na nga ang sinasabi ko, dapat respect lang talaga.

“Kasi, unang-una, wala naman akong binanggit na pangalan… kung mababasa ninyo ('yung post). Ano, uh, opinyon ko ‘yun, eh. ‘Yun ang saloobin ko… wala naman akong inano. So, ‘yung reaksiyon lang siguro.

“And na-hurt ako doon sa isa, alam ninyo na kung sino. Kasi nakatrabaho ko siya. Nagulat ako na ganu'n ang naging ano niya.

“Although, nag-sorry naman na siya. Nag-sorry naman siya. Sincere naman ang paghingi ng sorry,” tuluy-tuloy na pahayag ni Pokie.

Nag-direct message raw si Pokie kay DJ.

“Sabi ko, masakit ‘yung ano niya… kasi nakatrabaho ko siya, ‘di ba? Eh, mahal namin pareho ‘yung tao, nasa itaas na siya,” sabay tingala ni Pokwang.

Ang tinutukoy niya ay ang yumaong direktor na si Wenn Deramas.

“'Yun ang dahilan kung bakit kami nagkakilala at nagkatrabaho kaya masakit. Of all people na makita ko na ganu'n ang reaksiyon niya. Pero in fairness naman to him, nag-apologize naman siya,” lahad ni Pokwang.

GF, ayaw tumigil… AJ, PINAGPASA-PASAHAN NG MGA LALAKI, OKS LANG KAY ALJUR

ni Julie Bonifacio - @Winner | April 30, 2022

Physically exhausting para kay AJ Raval ang mga eksenang ginawa niya sa kanyang latest film na ipapalabas sa Vivamax, ang Kaliwaan with the newest international award-winning actor na si Vince Rillon at si Denise Esteban.

So far, ang role ni AJ sa Kaliwaan ang masasabi niyang pinaka-challenging amongst her other sexy films on Vivamax.

To the point na kahit tapos na ang shooting ay nag-iiyak pa rin daw siya sa harap ng kanyang kaibigan and relating to her kung gaano siya nadala sa mga eksena at napagod physically.

Pinaghalong sex and violence kasi ang tema ng Kaliwaan na inspired sa totoong buhay. Ang kuwento ng Kaliwaan ay mula sa batikan at multi-awarded director na si Brillante Mendoza na ipinadirek niya sa isa sa kanyang mga estudyante on film directing na si Dante Palacio.

Si Direk Brillante rin kasi ang producer ng Kaliwaan under his film outfit, ang Centerstage Productions, at katuwang ang Vivamax.

“Well, matagal na ang kuwentong ‘to. 'Di ba, nabanggit ko naman in the past na kahit hindi ako gumagawa ng pelikula, naghahanap ako talaga ng kuwento. Kumbaga, sa ngayon, lifestyle ko na ‘yun,” sabay tawa ni Direk Brillante pagkatapos ng special screening ng Kaliwaan last Wednesday.

Dugtong niya, “So, isa ito sa mga na-gather ko nang mga kuwento sa mga ano kapag nagre-research ako. Tapos, si Daniel naman, marami na akong nai-produce sa mga pelikula niya. Ako ang nag-produce ng first film niya, ‘yung Pailalim na nag-compete sa San Sebastian, at ‘yung second film niya na nag-compete sa Tokyo. So, ito ‘yung third film niya sa Vivamax. Sa kanya ko ipinagkatiwala ang project na ‘to kasi bukod sa mga pelikula niyang nagawa, kaya niyang gawin.”

Parang musika naman sa pandinig ni Direk Daniel ang mga narinig at nakita nitong reaksiyon sa mga members ng media, cast and crew ng movie at pati ang iba pang special guests na nakapanood ng Kaliwaan during the special screening.

“Ano siya, eh, parang musika siya sa tenga ko. Kasi, it means effective siya. Kasi we did that to my first film when it was shown in Spain, ganyan din ‘yung naririnig ko. So, mas lumabas ‘yung emosyon nila dito (ng mga manonood). Mas effective ‘yung boses na ginawa ng buong grupo namin,” pahayag ni Direk Daniel.

Isa sa pinakalutang ang reaksiyon ng audience sa movie ay sa torture scene ni Vince. Kaya nahingan siya ng konting kuwento kung ano ang feeling niya doing that scene.

“Ano po, masakit. Nakakaiyak the first time na makita ko ‘yung hitsura ko na tino-torture. Uh, kawawa. Kawawa ako,” sabay iling ni Vince na na-overwhelmed sa kanyang napanood.

Going back to AJ, nilinaw niya na hindi niya last film ang Kaliwaan kahit plano niyang ipagpatuloy ang kanyang naantalang pag-aaral.

“Meron po akong naka-line-up na ibang pelikula. At ang pagpapaseksi naman po sa showbiz, never ko naman po sinabing mawawala ako. Gagawa pa rin po ako at ‘yung pagpapaseksi, gusto ko po siya, masaya po ako doon. Never ko rin pong bibitawan ‘yung pagpapaseksi. Siguro, parang bawas-bawas lang din po ako ngayon,” esplika ni AJ.

Kaya huwag magduda ang iba r’yan na magiging hadlang sa pagpapaseksi ni AJ ang kanyang boyfriend na si Aljur Abrenica. Malinaw na ‘di naman siya pinagbabawalan ni Aljur na itigil na ang pagpapaseksi kahit sabihin pang grabe ang mga eksena ni AJ sa pelikula kung saan dumaan at pinagpasa-pasahan siya ng iba't ibang lalaki.

So, huwag magpahuli sa panonood ng Kaliwaan sa Vivamax dahil maraming aral ang kuwento ng pelikula.