2.1 M Pinoy fully vaccinated na

ni Lolet Abania | June 21, 2021

Mahigit sa 2 milyong mga Pilipino na ang fully vaccinated kontra-COVID-19, base sa ulat ng Department of Health (DOH) ngayong Lunes.

Ayon sa DOH, may kabuuang 8,407,342 doses ang na-administer hanggang nitong June 20. Sa bilang na ito, 6,253,400 shots ang naibigay na first dose habang 2,153,942 para sa ikalawa at huling dose ng COVID-19 vaccines.

Sinabi rin ng ahensiya na ang kabuuang bilang ng doses na na-administer sa loob ng 16 na linggo, kasabay ng pagsasagawa ng national vaccination campaign ay umabot na sa record high na 1,461,666, habang ang average kada araw ng nabibigyan ng doses sa nakalipas na linggo ay 208,809.

“The government is urging eligible populations belonging to priority groups A1 to A5 to register with their local government units, get vaccinated, and complete the required number of doses as scheduled,” ani DOH.

“Regardless of vaccination status, everyone is urged to continue practicing the minimum public health standards as you may still get infected with COVID-19 and infect other people,” sabi pa ng DOH.

Binanggit naman ni Vaccine Czar Secretary Carlito Galvez, Jr. kahapon, nananatili sa ngayon ang mabilis na pagbabakuna dahil sa patuloy na inaasahang supply ng vaccines ng gobyerno sa mga susunod na linggo at buwan habang kasalukuyang may 3,991 vaccination sites sa bansa.

1 milyong Pinoy, natuturukan kada linggo — Galvez

ni Lolet Abania | June 15, 2021

Mahigit sa 7 milyong doses ng COVID-19 vaccines na ang na-administer sa mga mamamayan hanggang nitong Hunyo 14, ayon kay Vaccine Czar Secretary Carlito Galvez, Jr..

“As of yesterday, June 14, we have already breached 7 million jabs administered,” ani Galvez sa isang Senate hearing ngayong Martes.

Sa kanyang presentasyon, binanggit ni Galvez na may kabuuang 7,045,380 doses ang naibigay sa mga kababayan natin simula Marso 1 hanggang Hunyo 14.

Kabilang dito ang 980,471 medical frontliners, 486,945 senior citizens, 429,301 person with comorbidities, at 7,067 essential workers na fully vaccinated na may kabuuang 1,903,784 doses ng COVID-19 vaccines ang naibakuna.

Samantala, may 5,141,596 indibidwal naman ang na-administer ng first doses ng COVID-19 vaccine kabilang ang 1.452 milyong medical workers, 1.753 milyong senior citizens, 1.754 milyon sa persons with comorbidities, at 182,130 sa essential workers.

Sa kasalukuyan, mayroong 3,944 vaccination sites ang nailatag na ng pamahalaan.

Sa 12,705,870 COVID-19 vaccines, nasa 10,374,850 ang nai-deploy ng gobyerno sa mga vaccination sites.

Sa parehong presentation, sinabi ni Galvez na nakamit na ng gobyerno ang isang milyong jabs kada isang linggo na nangyari nitong magkasunod na linggo.

3 M Pinoy na nabakunahan kontra-COVID-19

ni Mary Gutierrez Almirañez | May 18, 2021

Tatlong milyong indibidwal na ang nabakunahan kontra COVID-19, ayon kay Vaccine Czar Carlito Galvez, Jr. sa ginanap na public briefing ngayong umaga, May 18.

Aniya, “Sa ngayon, maganda pa rin po ang mga balita natin dahil ang ating pagbabakuna, napakataas na po, nasa 3 million.”

Batay ito sa datos na 3,001,875 na kabuuang bilang ng mga nabakunahan, kabilang ang 719,602 na mga nakakumpleto ng dalawang dose, at ang 2,282,273 indibidwal na naturukan ng unang dose na nasa A1 hanggang A4 priority groups as of May 16.

Ibinida rin ni Galvez na sa loob lamang ng 17 araw ay nakayanan ng ‘Pinas na mabakunahan ang mahigit 1 million Pinoy dahil may sapat na suplay ng COVID-19 vaccines na ang bansa kaya mas bumilis ang alokasyon.

Sabi pa niya, “Kasi nu'ng unang rollout natin, para tayong nagbe-break-in na sasakyan. Nu’ng March, umabot tayo ng 40 days bago maka-isang million. Ganoon din po sa April na 1 million in 30 days. Ngayon, nakuha po natin ang 1 million in 17 days at nakita po natin na ‘yung ating volumes ng bakuna, dumating lang nu’ng May 7.”

Sa ngayon ay 7,149,020 doses ng COVID-19 vaccines na ang naipamahagi sa iba’t ibang vaccination sites, na nakalaan para sa mga medical frontliners, senior citizens, persons with comorbidities at mga empleyado na kinokonsidera bilang economic frontliners.