7 illegal websites ng e-sabong, isinara — DILG

ni Lolet Abania | May 25, 2022

Pitong ilegal na websites ng e-sabong operations ang ipinasara na habang iimbestigahan ang administrators ng mga ito, ayon sa Department of the Interior and Local Government (DILG) ngayong Miyerkules.

Sa isang statement, sinabi ni DILG spokesperson Undersecretary Jonathan Malaya, nagsasagawa na ang Philippine National Police Anti-Cybercrime Group (PNP-ACG) ng imbestigasyon para tukuyin ang mga administrators ng ilegal na mga websites.

“These criminals thrive on the anonymity of the internet and they are taking advantage of this, but the PNP together with our colleagues from the National Bureau of Investigation will not rest until they have been unmasked,” ani Malaya.

Sa ngayon, nakapag-monitor ang PNP ng 12 websites at walong social media platforms na patuloy na nag-o-operate ng e-sabong activities sa kabila ng pagba-ban nito na ipinag-utos ni Pangulong Rodrigo Duterte.

Ayon kay Malaya, nakipag-ugnayan na ang DILG sa Department of Information and Communication Technology (DICT) upang isara ang mga naturang websites. Gayundin aniya, hiniling na ng ahensiya sa Meta, ang parent company ng Facebook, na agad na i-delete o i-suspend ang mga pahina ng kanilang platform na nagsasagawa ng e-sabong activities.

Sinabi rin ni Malaya na humingi na ang DILG ng assistance sa Globe, kung saan ang mga bettors at operators ay gumagamit ng GCash at katulad na platforms bilang mode of payment, upang maiwasan ang naturang platform na magamit sa ilegal na gawain. Matatandaang nai-report ang pagkawala ng 34 sabungeros. Kasunod nito, inaprubahan ni Pangulong Duterte ang rekomendasyon ng DILG na itigil ang e-sabong.

P3.693 B dagdag-ayuda sa Metro Manila, Bataan at Laguna, aprub kay P-Duterte

ni Lolet Abania | August 12, 2021

Inaprubahan na ni Pangulong Rodrigo Duterte ang kabuuang P3.693 bilyon karagdagang pondo para sa cash assistance program sa Metro Manila, Bataan at Laguna.

Ayon kay Department of the Interior and Local Government (DILG) spokesperson Undersecretary Jonathan Malaya, ang P2.715 bilyon ay ibibigay sa Laguna, P700 milyon para sa Bataan, at P278 milyon sa Metro Manila.

“The President has approved ECQ Ayuda as follows: P700M - Bataan, P2.715B - Laguna,” ani Malaya sa isang text message ngayong Huwebes.

“Yes, the President also approved an additional P278M for [Metro] Manila as requested by the DILG and NCR LGUs,” dagdag ni Malaya.

Pinayuhan naman ang ahensiya ng Department of Budget and Management (DBM) na ayon kay Malaya, ang budget ay ida-download na lamang sa kani-kanyang local governments ng Huwebes o Biyernes.

Isinailalim ang Metro Manila, Laguna, at Bataan sa enhanced community quarantine (ECQ) para maiwasan ang hawaan at pagkalat pa ng Delta COVID-19 variant sa bansa.

Una nang naglabas ang DBM ng P10.894 bilyon upang makapagbigay ng financial assistance sa mga apektadong indibidwal at pamilya sa National Capital Region.

Ang naturang ayuda ay nasa halagang P1,000 kada indibidwal o P4,000 kada pamilya.

Pamamaril sa curfew violator sa Manila, pinaiimbestigahan ng DILG

ni Ronalyn Seminiano Reonico | August 9, 2021

Ipinag-utos ng Department of the Interior and Local Government (DILG) ang imbestigasyon sa insidente ng pamamaril sa isang curfew violator na hinihinalang may problema sa pag-iisip sa Tondo, Manila.

Pahayag ni DILG Spokesperson Undersecretary Jonathan Malaya, “Iniimbestigahan na po natin ang report na ito. Ang Philippine National Police (PNP) ay inatasan na po ni Secretary Eduardo Año upang alamin ang puno't dulo nito.”

Noong Sabado, naiulat na binaril ni Barangay Peace and Security Officer Cesar Panlaqui ang 59-ayos na curfew violator sa Tayuman. Dead on the spot ang biktima matapos tamaan ng bala ng baril sa dibdib.

Ayon sa ulat, may dalang laruang baril ang biktima nang mangyari ang insidente.

Noong Linggo naman nang umaga, inaresto si Panlaqui at narekober din ang revolver ng suspek.

Ayon sa awtoridad, hindi umano dokumentado at walang serial number ang baril ng suspek.