Erap, makakalabas na ng ospital

ni Ronalyn Seminiano Reonico | April 26, 2021

Makakalabas na ng ospital si dating Pangulong Joseph “Erap” Estrada, ayon sa kanyang anak na si ex-Senator Jinggoy ngayong Lunes.

Pahayag ni Jinggoy sa kanyang Facebook post, “Our family is overjoyed to announce that our father will finally be discharged from the hospital today.”

Nagpasalamat din ang dating senador sa mga doktor ni Erap at sa lahat ng mga nagdasal para sa paggaling nito.

Saad pa ni Jinggoy, “But most of all, we would like to thank our Lord Almighty for His love and guidance through all of this.”

Matatandaang isinugod sa ospital si Erap noong Marso 28 matapos siyang magpositibo sa COVID-19. April 13 naman nang magnegatibo na ang resulta ng COVID test nito.

Samantala, si Erap ay nagsilbing pangulo ng bansa simula noong 1998 hanggang 2001. Naging Manila mayor din siya noong 2013 hanggang 2019.

Ivermectin, ipinagbawal, Erap, gumaling na sa COVID

ni Mary Gutierrez Almirañez | April 19, 2021

Tumanggi ang doktor ni dating Pangulong Joseph ‘Erap’ Estrada na ipainom sa kanya ang Ivermectin, ayon sa panayam kay dating Sen. Jinggoy Estrada ngayong umaga, Abril 19.

Kuwento ni Jinggoy, "I have consulted the doctors of my father regarding Ivermectin because there was lots of report na nakakagaling nga raw. I consulted the doctor and the doctor said, 'I will not give Ivermectin to your dad because that's only for animals…' I really have to follow the doctor's advice."

Sa ngayon ay nakatakdang ilipat sa regular room ng ospital ang nagbi-birthday na si Erap, at mamaya rin ay bibisitahin ni Jinggoy ang ama upang dalhan ng birthday cake at batiin sa ika-84 na kaarawan.

Sabi pa ni Jinggoy, "All his vital signs are already normal, 'yung kanyang oxygen flow is already normal. His blood pressure has already been stabilized. Kaya sabi ng doktora, he can be transferred to a regular room today.”

Matatandaang 2 ospital na ang nagsumite ng compassionate special permit (CSP) sa Food and Drug Administration (FDA) upang gamitin kontra COVID-19 ang nasabing veterinary product. Bukod dito, ilang pulitiko na rin ang umaming uminom sila ng Ivermectin.

"Maraming gamot na ibinibigay sa aking ama so I cannot credit kung ano nagpagaling sa kanya," dagdag pa ni Jinggoy.

Nagbabala naman ang Department of Health (DOH) na kasong paglabag sa Republic Act 9711 o The FDA Act of 2009 ang isasampa sa mga mahuhuling gagamit ng Ivermectin nang walang CSP.

Erap, magaling na sa Covid

ni Mary Gutierrez Almirañez | April 13, 2021

Gumaling na mula sa COVID-19 si dating Pangulong Joseph ‘Erap’ Estrada, batay sa kumpirmasyon ni former Senator Jinggoy Estrada ngayong araw, Abril 13.

Ayon sa Facebook post ni Jinggoy, “We are happy to announce that my dad continues to improve and we expect that he can be transferred to a regular room soon. His repeat RT-PCR (swab test) is now NEGATIVE! He is still on high flow oxygen support but at a much reduced rate.”

Matatandaang ika-29 ng Marso noong nagpositibo sa virus ang dating Pangulo.

“Again, we thank everyone for their continuous support and love and ask that you continue to pray for him and others who are afflicted with this awful and dreaded disease,” pasasalamat pa ni Jinggoy.