Timing ba talaga o toxic ka? Alamin: mga dahilan kaya ‘di ka nagkaka-dyowa

ni Jersy L. Sanchez - @Life & Style| September 21, 2022

Isa ka ba sa mga nagtataka kung bakit sa tagal mo nang single ay wala ka pa ring dyowa o kaya naman, nababahala ka na dahil malapit nang lumagpas sa kalendaryo ang iyong edad, pero kahit ka-talking stage ay wala ka? Oh no!

Minsan, hindi natin alam kung ano ba talaga ang may mali — timing o tayo mismo. ‘Yun bang, isinisisi natin sa timing kung bakit zero ang love life natin, pero sa totoo lang, tayo naman pala ang dahilan kaya tayo nananatiling single.

Anu-ano ang mga bagay na nakakapigil para magka-love life ang isang tao?

1. YOU DATE UNAVAILABLE PEOPLE. Marahil, hooked ka sa mga taong ‘unavailable’ — ‘yung taong makakasakit lang sa ‘yo. Hindi lang ito isang beses nangyari kundi paulit-ulit na, kumbaga, naging pattern na at siguro, nagsisimula ka nang maniwala na wala talagang para sa iyo. Pero sa totoo lang, ang mga ganitong uri ng tao ang pinipili mo unconsciously dahil ayon sa mga eksperto, ang mga ‘unavailable people’ ay daan para makaiwas ka sa totoong intimacy. Dahil dito, hindi ka talaga makakabuo o makakahanap ng serious relationship.

2. YOU DON’T LET PEOPLE IN. Kung gusto mong pumasok sa isang relasyon, common sense na hindi puwedeng mag-isa ka lang. Sabi nga nila, hindi mo mapipili ang tao na iyong mamahalin, pero hindi ‘yan applicable sa lahat dahil may mga tao na kayang itago ang kanilang feelings at mag-isolate. Sey ng experts, isa itong defense mechanism para sa mga taong palaging nadi-disappoint ng kanilang pamilya, kaibigan, partner atbp. Gayunman, kung struggling ka sa aspetong ito, kailangan mong mag-heal muna sa past relationship na nagdulot sa iyo ng trauma.

3. ADDICTED TO ‘BUTTERFLIES’. For sure, may mga pagkakataong nadadala ka every time na may nakikilala kang bago. ‘Yun bang, lahat ng ginagawa niya ay ikinakakilig mo, pero take note, hindi ito senyales na siya na ang para sa iyo. Ayon sa mga eksperto, ang paghahanap ng “butterfly feeling” sa bagong connection ay maaaring makaapekto sa pagbuo ng genuine at pangmatagalang relationship sa iba.

4. YOU DON’T TRUST. Hindi kasalanan ng bago mong partner kung wala kang tiwala sa kanya dahil sa hindi mo magandang past. Dahil d’yan, kailangan mong maunawaan na unfair para sa partner mo kung hindi ka magtitiwala sa kanya dahil sa pagkakamali ng ibang tao.

5. LOW SELF-ESTEEM. Ayon sa mga eksperto, ang iyong self-esteem ay kritikal sa isang relasyon. Kapag mababa umano ang self-esteem, malaki ang posibilidad na ma-self sabotage ng happy relationship dahil pakiramdam nila ay wala silang “K” na magkaroon ng karelasyon. Paliwanag ng mga eksperto, kapag hindi mataas ang self-esteem ng isang tao, hindi siya nag-e-expect o nagde-demand ng klase ng treatment na deserve niya.

6. UNREALISTIC EXPECTATIONS. Minsan, ang mga expectation natin ang nagiging dahilan kaya hindi tayo nagkaka-love life. Halimbawa, in-assume mo agad na hindi magwo-work ang inyong relasyon o nag-e-expect ka ng grand gestures kahit hindi mo naman sinasabi kung ano talaga ang mga gusto mo. Sey ng experts, kung masyadong malayo sa katotohanan ang expectations mo, posibleng ma-miss out mo ang iyong potential partner.

7. YOU DON’T COMMUNICATE. Sabi nga, ang komunikasyon ay isa sa mga sangkap ng isang healthy relationship. Kung may gumugulo sa isip mo, ang the best na solusyon ay sabihin ito sa partner mo upang mapag-usapan n’yo ito. Pero kung hindi ganito ang nakasanayan mong paraan ng pagresolba ng mga problema, isa pang problema ‘yan, besh.

Bakit ka nga ba single — dahil ba wala pa sa timing o dahil mismo sa iyo?

Well, kung sapul ka sa mga nabanggit na dahilan sa itaas, galaw-galaw na, besh. Hindi naman sa minamadali kita, pero what if kailangan mong mag-adjust o kumilos at hindi maghintay lamang ng tamang tao para sa ‘yo?

Malay mo, nar’yan na pala siya sa harap mo, pero dahil sobrang taas ng expectations at ibang toxic traits mo ay nababalewala siya? Isip-isip ka na, besh!

Akala mo ay oks, pero red flag pala… Alamin: mga ugali ng partner na ‘di dapat i-tolerate

ni Jersy L. Sanchez - @Life & Style| September 12, 2022

Sabi nga, “Love is blind” — true ‘yan, at isa pa, minsan ay pagmamahal ang dahilan kaya nananatili ang isang tao sa ‘bad relationship’.

Well, wala namang perpektong relasyon, pero mahalaga na malaman natin ang mga behavior o ugali na “major red flag” para makatagpo tayo ng fulfilling relationship.

Siyempre, kailangan nating malaman ang mga bagay o ugali ng ating partner na hindi dapat kunsintihin, anu-ano nga ba ang mga ito?

1. CONTROLLING BEHAVIOR. Kapag kinokontrol ng iyong partner ang mga ginagawa mo o gusto niya na pareho kayo ng values kahit pa iba ang mga gusto mo. Gayunman, binigyang-linaw ng mga eksperto na maraming paraan para makontrol ka ng iyong partner at hindi okay ang mga ganitong behavior.

2. GASLIGHTING. Sey ng experts, ang gaslighting ay isang common trait para sa mga controlling partner. Halimbawa, ipinaparamdam niya sa iyo na ang mga bagay na inaalala mo ay katawa-tawa. Maaari niya ring iparamdam na may mali sa ‘yo kapag nagpapahayag ka ng iyong feelings tungkol sa isang bagay.

3. ABUSE. Knows n’yo ba na ang controlling behavior ay maaaring mauwi sa abusive relationship? Ayon sa mga eksperto, maaari itong maging emotional o verbal abuse. Halimbawa umano nito ang pangmamaliit niya sa iyo, ginagawa kang katatawanan sa harap ng ibang tao, gayundin ang panga-gaslight tuwing nag-e-express ka ng iyong feelings. Kabilang din ang physical abuse, kung saan madalas kang sinasaktan ng iyong partner tuwing may hindi kayo pagkakaunawaan. Kapag ganito ang sistema n’yo, inirerekomenda ng mga eksperto na humingi ng tulong sa mga propesyunal.

5. DOESN’T BRING OUT THE BEST IN YOU. ‘Yun bang, pakiramdam mo ay hindi nakakatulong ang partner mo para mailabas ang “best version of yourself”. Kapag ganyan ang nararamdaman mo, sign ‘yan na may mali. Kung ang partner mo ay may mga sinasabi o ginagawa na hindi nakakatulong para ma-boost ang iyong confidence, senyales din ‘yan na hindi ka niya nirerespeto. Ang sakit, ‘no?

6. HE/SHE ISOLATES YOU. Paano? Kapag umabot na sa puntong kinokontrol niya kung sino ang mga taong dapat o hindi mo dapat makasama, red flag ‘yan, besh. Alam nating mahalaga ang independence sa isang relasyon, pero kapag inilalayo ka niya sa iyong pamilya at mga kaibigan, sign ito na gusto niyang ipakita na siya ang dominante, kahit pa ang kapalit nito ay ang iyong happiness, personal relationships at self-care.

7. HE/SHE WANTS YOU TO CHANGE. Bukod sa inilalayo ka niya sa mga taong mahalaga sa iyo, red flag din ‘yung pinipilit ka niyang magbago. Halimbawa nito ay ang mga hobbies, personality traits at iba pang mahalaga para sa iyo. Paalala ng mga eksperto, kung gusto ng partner mo na baguhin ang mga nabanggit, mali ‘yun. Kapag totoong mahal ka ng isang tao, susuportahan niya ang mga gusto mo at hindi ka niya pipiliting magbago for his/her own convenience.

8. HE/SHE JUDGES YOU. Kapag ginagawa niya ito sa iyo, tiyak na hindi ka niya nirerespeto. Ang partner na palaging ipinupunto ang mga imperfection mo ay isang red flag. Halimbawa, palagi siyang may sinasabi sa iyong personality, gayundin, madalas ka niyang i-body shame — ang mga ito ay immature at manipulative ways para makontrol ang inyong relasyon.

9. IGNORES YOUR SEXUAL NEEDS & LIMITS. Na-experience mo na bang ma-pressure sa sexual activity dahil hindi ka willing o wala kang consent, o kaya naman, hindi na niya naibibigay ang sexual needs mo? Well, ayon sa mga eksperto, normal na magkaiba ang turn-ons at libido ng magkarelasyon, pero ang hindi normal ay ang pag-overstep sa sexual boundaries.

10. HE/SHE DOESN’T SUPPORT YOU. Sa totoo lang, hindi healthy ang isang relationship kung ang partner mo ay hindi naniniwalang magtatagumpay ka sa iyong mga pangarap. Kung iniinsulto niya ang iyong work ethic, minamaliit ang iyong mga achievements at kinukumbinsi ka niyang tanggihan ang mga bagong oportunidad para mapalago ang iyong career, isip-isip ka na, besh.

Ang red flag ay puwedeng lantaran o subtle lamang.

Bagama’t kailangang mag-compromise ng bawat isa para mag-work ang isang relasyon, may mga ugali na sobrang toxic at hindi dapat i-tolerate. Higit sa lahat, kailangan itong solusyunan, pero kung hindi na kaya, bitaw na.

Sa totoo lang, may mga isyu na hindi madaling mapansin, at minsan ay in-denial tayo dahil mahal natin ang tao, pero mga beshy, importanteng malaman ang mga ito upang maiwasang mabulag at hindi masyadong magbuhos ng atensyon at oras sa isang toxic na relasyon.

Oks lang din na humingi ng tulong sa mga propesyunal o sa mga taong malapit sa atin dahil ang mahalaga ay maisalba mo ang iyong sarili sa maling tao.

Gets mo?

Mga pagbabago sa katawan ‘pag itinigil ang pagkakape

ni Jersy L. Sanchez - @Life & Style| August 30, 2022

For sure, pamilyar tayo sa mga epekto ng kape, at kabilang na r’yan ang pag-stimulate ng ating heart at muscles. Dahil dito, naging caffeine dependent na ang marami sa atin o ‘yun bang, hindi sila makapagsimula ng araw o gawain hangga’t hindi nakakapagkape. Relate ka ba, beshy?

Pero alam n’yo na ba ang mga puwedeng mangyari sa iyong katawan ‘pag tumigil ka sa pagkakape?

1. BUMABABA ANG TIMBANG. Depende ito kung gaano katapang ang trip mong kape. Sa isang pag-aaral, ang 2/3 ng coffee drinkers ay naglalagay ng sugar, cream, at iba pang flavorings at additives. Gayunman, ang mga umiinom ng black coffee ay nakakakonsumo nang mas kaunting calories kumpara sa mga nagdadagdag ng sweeteners, cream at iba pang additives sa kanilang kape.

2. NADADAGDAGAN ANG TIMBANG. Naranasan mo na bang magkaroon ng cravings nang hindi ka nakapagkape? Sey ng experts, pansamantalang nababawasan ang appetite sa pag-inom ng kape, pero kung sisimulan mong tumigil sa pagkakape, posible kang mag-crave sa matatamis na pagkain at madalas umano itong nangyayari ‘pag nagsimula ang caffeine winthdrawal.

3. MAS MAGANDA ANG TULOG. Habang nag-a-adjust ang iyong katawan dahil wala nang “stimulant”, madalas ay feeling tired ka. Gayunman, pagkalipas ng ilang panahon ay mapapansin mong mas maganda ang quality ng iyong tulog, lalo na kung ikaw ay dating afternoon o evening coffee drinker.

4. MADALAS ANG PAGSAKIT NG ULO. Kapag itinigil ang pag-inom ng kape, ibig sabihin ay nade-deprive ang katawan sa adrenaline at dopamine, ang hormones na nagsisilbing stimulants para mapanatili tayong gising. Bagkus, kikilos ang adenosin — ang responsible hormone para sa rest at tiredness — at magdudulot ng pagbabago sa brain chemistry na magreresulta naman ng pagsakit ng ulo. Upang maiwasan ito, inirerekomenda ang paunti-unting pagbabawas ng caffeine intake hanggang sa tuluyan na itong maitigil.

5. HEALTHY SMILE. Alam nating acidic ang kape, ibig sabihin, nababawasan nito ang tooth enamel at nakaka-stain ng mga ngipin. Kapag binawasan ang caffeine intake, mas maaalagaan ang mga ngipin, gayundin, magandang hakbang ito upang pumuti ang mga ngipin.

6. HIRAP MAGPOKUS. Kapag hindi tayo nakapagkape, mas madali tayong nakakaramdam ng pagod at pagkairita, na posibleng makadagdag sa kawalan ng konsentrasyon. Upang makapagpokus, inirerekomenda ng mga eksperto na kumain ng minty gum para mapanatiling alerto ang utak.

7. MAS KALMADO. Kung nagiging sanhi ng pagiging aligaga ang sobra mong pagkakape, sorry, besh, pero oras na para tigilan ‘yan. Paliwanag ng mga eksperto, dahil ang kape ay isang stimulant, natural nitong napapataas ang level ng adrenaline at stress hormones sa iyong katawan. Kaya naman ang labis na pag-inom ng kape ay nagreresulta sa pagiging aligaga at irritable, lalo na kung ikaw ay sensitive sa caffeine.

Ngayong alam na natin ang mga epekto ng paghinto sa pag-inom ng kape, make sure na handa ka rito sa oras na mapagdesisyunan mong tumigil na sa pagkakape.

Tandaan lamang na unti-unting gawin ang paghinto sa pag-inom ng kape upang maiwasan ang withdrawal symptoms. Keri?