Tips para mapanatiling ligtas ang tahanan ngayong tag-ulan

ni Jersy Sanchez - @Life & Style| September 19, 2020

Ngayong tag-ulan, hindi lang trangkaso ang usong sakit dahil nar’yan din ang dengue, malaria, diarrhea, typhoid fever, cholera at leptospirosis. At kung ikokonsidera pa ang sitwasyon kung saan nahaharap tayo sa COVID-19 pandemic, talagang masakit sa ulo at bulsa na magkasakit o may maaksidente sa pamilya. Kaya para maiwasan ang mga hindi magagandang pangyayari sa tahanan, narito ang ilang paraan para protektahan ang sarili at pamilya laban sa mga sakit o sakuna:

1. INSPEKSIYUNIN ANG BUBONG AT ALULOD. Aminin na natin, ilan ito sa mga hindi gaanong nabibigyan ng atensiyon. Dahil tag-ulan na naman, simulan nang tanggalin ang mga tuyong dahon at iba pang dumi na naipon sa bubong dahil kailangang makadaloy nang maayos ang tubig-ulan sa mga alulod. Alamin kung kailangang i-repair ang bubong para makatiyak na hindi papatakan ng ulan ang loob ng bahay.

2. PESTE ALERT. Madalas na bahayan ng mga daga, ipis, lamok at iba pa ang maruruming lugar. Kaya kung maulan at marumi ang bahay n’yo, alam na! Para matiyak na walang peste sa inyong tahanan, regular na maglinis ng bahay. Takpan ang mga butas na maaaring pasukan ng daga at linisin ang mga sulok ng bahay na puwedeng pamahayan ng ipis o lamok.

3. ‘WAG IPASOK AGAD ANG SAPATOS AT PAYONG. Para iwas-aksidente sa bahay, ugaliing magpatuyo ng basang sapatos at payong sa labas. Tiyaking may basahan na puwedeng punasan ng mga paa para hindi madulas.

4. GENERAL CLEANING. Kahit busy tayo sa trabaho at paghahanda sa pasukan sina bagets, ugaliin pa ring magkaroon ng general cleaning kahit isang beses kada linggo. Kung tulung-tulong ang buong pamilya, mas mabilis itong matatapos, gayundin, maiiwasan ang pagtambak ng mga dumi na maaaring pagmulan ng germs at iba pang sakit. Isama na rin ang regular na pag-disinfect ng sahig at mga areas na laging nahahawakan tulad ng door knob, telepono, countertops at iba pa.

5. REGULAR NA PAGTAPON NG BASURA. Hassle talagang lumabas para magtapon ng basura ‘pag umuulan, pero mga bes, ‘wag tayong tamarin. Kapag natambak ang basura sa bahay, babaho ito at pamamahayan ng langaw at ipis. Once na napuno ang basurahan, magtapon na agad. Gayundin, tingnan kung may puwedeng i-recycle tulad ng plastic bottles.

6. CLEANING SUPPLIES. Para regular na makapaglinis, dapat may sapat kang cleaning supplies. Tuwing mamimili sa grocery, ‘wag kalimutan ang mga panlinis tulad ng sabon, bleach at disinfectant.

7. CLEANING SCHEDULE. Kung busy ang lahat ng tao sa bahay, mahalagang magkaroon ng schedule kung kailan maglilinis at ano’ng partikular na parte ng bahay ang lilinisin. Maganda ring isama rito kung sino ang gagawa ng task. Halimbawa, si ate para sa kusina, si kuya para sa garahe o si bunso bilang taga-assist. Sa paglilinis ng bahay, kailangan din ng dedication at pagsunod sa itinakdang iskedyul. Kung masusunod ito, tiyak na mapananatiling ligtas ang ating tahanan.

Sa totoo lang, nakakapagod at hassle ang paglilinis ng bahay gayung tag-ulan dahil sa malamig na panahon. Pero sa halip na matulog maghapon, mas maganda kung may magagawa tayong makabuluhan, lalo na kung para ito sa kaligtasan ng ating pamilya.

Sundin lamang ang tips na ito para sa mas malinis at ligtas na tahanan ngayong tag-ulan. Gets mo?

Para happy lang at walang ending… Mga dapat ikonsidera bago magpakasal

ni Jersy Sanchez - @Life & Style| September 15, 2020

Hanggang ngayon, marami pa rin ang natatakot magpakasal o mag-asawa dahil sa posibilidad na mauwi ang pagsasama sa “bad marriage”. May ilan namang naniniwala na mas oks na ang pagli-live-in para maging madali ang kanilang paghihiwalay kung sakaling hindi mag-work ang relasyon.

Well, totoo talaga na ang pag-aasawa ay hindi basta-bastang desisyong gagawin kaya para maging happy ang marriage, narito ang ilang tips para sa mga beshy natin d’yan na nagbabalak nang magpakasal:

1. PAREHAS NG CORE VALUES. Kahit magkasintahan pa lang ang couple, dapat ay napag-uusapan na kung tugma sila ng mga pinaniniwalaan at pangarap sa buhay. Sey ng experts, may core values na negotiable o napag-uusapan para baguhin habang meron ding non-negotiable o hindi puwedeng baguhin.

2. EMOTIONALLY MATURED. Ibig sabihin, kailangang marunong na tayong mag-adjust, makinig, magbigay at tumanggap. Ayon sa mga eksperto, mahalaga ang pagiging “flexible” o ang kakayahang umangkop sa pabagu-bagong sitwasyon dahil ang isang bagay na hindi mawawala sa marriage ay ang mga pagbabago.

3. ‘WAG MAGING NEGA. Maraming naniniwala na negative emotions ang numero-unong dahilan ng bad marriage. Ang pagiging nega ay maaaring mauwi sa disappointment, tensiyon at hindi pagkakaintindihan. Ang susi sa masayang pag-aasawa ay ang pagpopokus sa mga positibong bagay at emosyon kesa sa insecurities na nakasisira ng relasyon.

Lahat tayo ay may “breaking point” at walang sinumang may gusto na manatili sa nega na tao. Kapag hindi ka okay, gamitin mo ang pagkakataong ito para makaisip ng paraan upang harapin ang iyong emosyon. Okie?

4. KOMUNIKASYON. Ang pagsasalita at pagbabahagi ng iyong nararamdaman ay isa sa mga hakbang para manatiling masaya ang inyong marriage. ‘Ika nga, hindi natin kayang manghula ng mga naiisip ng ating partner at kapag feeling natin ay kailangan niyang malaman ang nasa isip o nararamdaman mo, mabuting pag-usapan ito agad. Mas mabuti nang vocal kayo sa inyong thoughts kesa magsisihan kapag may hindi pagkakaunawaan.

5. ALAMIN KUNG KAILAN HIHINGI NG TULONG. Kung feeling mo ay nakararanas ka ng depresyon, ‘wag kang matakot na pag-usapan ito kasama ang iyong partner at humingi ng propesyonal na tulong kung sa tingin mo ay kailangan. Gayundin, sa mga pagkakataong sa tingin mo ay kailangan mo ng iba pang makakausap bukod sa iyong asawa, puwede mong tawagan ang iyong mga kaibigan o kapamilya.

Kaya sa mga nagbabalak nang magpakasal d’yan, alam n’yo na, ha? Make sure na hindi n’yo kalilimutan ang tips na ito nang sa gayun ay happy ang inyong pagsasama at hindi mauwi sa hiwalayan. Copy?

‘Wag matakot, mommies!... tips para maunawaan ng mga anak na kailangang magtipid

ni Jersy Sanchez - @Life & Style| September 1, 2020

Sa dami ng nawalan ng hanapbuhay sa gitna ng pandemya, hindi naman natitigil ang mga gastusin. Ang masaklap, nagpapatung-patong pa. Hays!

Kaya naman, maraming mga magulang ang hirap mag-adjust gayung may mga tsikiting silang inaalagaan. Tipong bawas na ang budget, kailangan pa ring ipagluto o bilhin ang gusto nilang pagkain at kahit hirap tayong mag-adjust, hindi natin maipaliwanag sa kanila kung bakit dapat tayong magtipid.

Kaya para sa mga mommies d’yan, narito ang ilang tips para maunawaan ng ating mga anak na kailangan nilang magtipid ngayong may pandemya.

1. ACCEPTANCE. Una, kailangang tanggap ng mga magulang ang totoong sitwasyon. Kung kailangang magtipid at mag-adjust, dapat tanggapin ito dahil kung ikaw mismo ang hindi makakatanggap sa sitwasyon, magiging negatibo ang epekto nito sa bata.

2. MAGING TAPAT. Kung tapos ka na sa first step o acceptance, mahalaga na maging tapat ka kina bagets. Huwag nating itago ang sitwasyon para mas madaling maipaunawa sa kanila kung bakit natin kailangang magtipid. Isa-isang pag-usapan kung paano maaaring magtulungan ang buong pamilya. Halimbawa, hindi puwedeng mamili ng ulam ang mga bata, habang ang mga magulang naman ay bawal gumastos nang sobra sa budget ‘pag namimili sa grocery.

3. TURUANG ‘WAG MAGING MAPILI SA PAGKAIN. Nasanay silang fried chicken o mga karne ang ulam noong wala pang pandemya, pero ngayong na-adjust ang budget, kailangan nilang matuto kumain ng gulay pero ayaw nila nito. Ano na ang gagawin mo? Well, hindi naman natin kailangang ipangalandakan na dapat kumain sila ng gulay dahil nagtitipid tayo at mas healthy ito, pero may ibang paraan para mapakain sila nito. Puwede mong pag-aralan na ihalo ang mga tinadtad na gulay sa iyong homemade chicken nuggets at iba pang ulam.

Kung may kaunti namang budget, oks din namang mag-karne, pero mas maganda kung ngayon pa lang ay sasanayin n’yo na silang kumain ng gulay.

Maganda ring magsanay sa paggawa ng homemade meals. Sa halip na um-order sa labas, mas oks kung ikaw mismo ang maghahanda at magluluto ng kakainin ninyo.

4. ‘WAG MANGAKO. Iwasan nating mangako, lalo na kung hindi natin ito balak tuparin. Halimbawa na lang kapag may gustong ipabili si bagets, madalas nating sinasabi na wala tayong pera, kaya magpa-pramis tayo na sa susunod na lang bibilhin. Pero ayon sa mga eksperto, mas magandang sabihin na, “Anak, wala tayong budget,” dahil mas madali nilang mauunawaan na ang perang mayroon sila ay dapat ilaan sa mas mahahalagang bagay.

‘Ika nga, kapag maiksi ang kumot, matutong mamaluktot. Kung tutuusin, lumang-luma na ang kasabihang ito, pero applicable ito sa panahon ngayon. Agree?

Mga mommies, ‘wag kayong matakot na ipaliwanag at ipaunawa sa mga bata ang totoong sitwasyon natin. Marami sa kanila ang mature enough para makaintindi at makatulong sa atin. Okie?