Bukod sa walang palpitations at sakit ng ulo… Alamin: Mga benepisyo ng matcha

ni Jersy L. Sanchez @Life & Style | January 30, 2023

Knows n’yo ba na usong-uso ngayon ang matcha?

Kilala ang matcha dahil sa kulay nitong nakakarelaks tingnan at patok itong flavor ng ilang inumin at pagkain dahil sa kakaiba nitong lasa. Ilan sa mga nausong inumin ang matcha milktea, matcha latte, gayundin ang matcha-flavored pastries at kung anu-ano pa.

Para sa kaalaman ng lahat, ang matcha ay powdered o pinulbos na uri ng green tea mula sa Japan na iniinom sa loob nang 1,000 taon. Gayundin, ito ay pinalalaki at inihahanda sa ibang paraan, kaya naman ito ay kakaiba sa regular green tea, na may mataas na caffeine content.

Gayunman, hindi lang ito tinatangkilik dahil magandang tingnan kundi dahil sa napakarami nitong benepisyo sa ating kalusugan. Anu-ano ang mga ito?

1. PANLABAN SA PAMAMAGA. Nakakatulong ang matcha na mabawasan ang pamamaga. Gayunman hindi lamang ang mga antioxidants sa matcha ang may anti-inflammatory properties kundi maging ang iba pang compounds tulad ng phenolic acid at chlorophyll. Ayon sa mga eksperto, ang pag-inom ng matcha ay nakakabawas ng sintomas ng iba’t ibang sakit at kondisyon na may kaugnayan sa inflammation tulad ng diabetes at arthritis.

2. NAGPAPALAKAS NG IMMUNE SYSTEM. Yes, besh! ‘Yan ay dahil may dalawang compound ang matcha na nakakatulong upang mapalakas ang immune system, na nagiging daan naman upang malabanan ang mga karamdaman. Ang mga compound na ito ay may catechins, phenolic compounds na mataas ang antioxidants, at quercetin, isang bitter compound na natatagpuan sa maraming prutas at gulay. Gayundin, ang catechin at quercetin sa matcha ay mayroong antiviral properties, na nakakatulong upang labanan ang COVID-19 at flu.

3. INAAYOS ANG BLOOD SUGAR LEVEL. Kung ikaw ay may diabetes o may risk na magkaroon nito, makakatulong ang matcha sa pag-regulate ng iyong blood sugar level. Partikular umano ang polyphenols sa matcha na nakakapagpabagal ng absorption ng glucose, at nakakapagpababa ng tsansa na magkaroon ng blood sugar spike. Gayundin, dahil nakakapagpababa ng blood sugar level ang matcha, nakakatulong din ito sa pagpapababa ng timbang.

4. PANLABAN SA ALZHEIMER’S DISEASE. Ang rutin, isang flavonoid ay nakakatulong umano upang maprotektahan ang utak laban sa neurodegenerative condition tulad ng Alzheimer’s disease. Bukod pa rito, mabisa ang matcha pagdating sa pagpopokus at stress management. Sa isang pag-aaral, ang mga taong kumokonsumo ng matcha ay mas nakakapag-perform nang maayos habang isinailalim sa test na may kaugnayan sa attention, memory at writing kumpara sa mga kumonsumo ng pure caffeine.

5. GOOD SA PUSO. Base sa pag-aaral, ang caffeine at polyphenols sa green tea ay nakakapagpaganda ng kalagayan at nakakapagpababa ng inflammation sa puso. Gayundin, maaari umanong makatulong ang green tea na malabanan ang mga serious medical condition tulad ng heart failure at stroke.

6. PANLABAN SA KANSER. Ang catechins, polyphenols at Vitamin C sa matcha ay nakakatulong upang mapigilan ang paglaki ng cancerous cells, gayundin ang metastasis o pagkalat ng kanser sa katawan.

Kung may mga benepisyo ang matcha, mayroon din itong negatibong epekto. Paliwanag ng mga eksperto, dahil sa taglay na caffeine ng matcha, mayroon ding masamang dulot ang sobrang pagkonsumo nito tulad ng anxiety, migraine, insomnia at caffeine dependence.

Bagama’t batid nating may mabuting naidudulot sa katawan ang caffeine na taglay ng matcha, palagi nating paalala na ang lahat ng sobra ay nakakasama.

Kaya naman kung gusto n’yong masulit ang mga positibong epekto ng matcha, drink moderately.

Okie?

Tips para malaman kung sinungaling ang kausap

ni Jersy L. Sanchez @Life & Style | December 24, 2022

Paano mo masasabing nagsisinungaling ang isang tao?

Kapag ba hindi siya makatingin nang diretso sa iyo o paiba-iba ang version niya sa tuwing tinatanong mo siya tungkol sa isang bagay?

Knows n’yo ba na ang mga nabanggit ay kabaligtaran ng ilan sa ating mga pinaniniwalaan?

Upang bigyang-linaw, narito ang ilang paraan upang matukoy kung nagsisinungaling ang isang tao:

1. MAIKSING SAGOT. Ayon sa mga eksperto, kapag nagtanong tayo sa isang sinungaling, madalas siyang nagbibigay ng maiksing sagot kumpara sa nagsasabi ng totoo. Sa isang pag-aaral noong 2012, ang mga participants ay sinanay na tukuyin ang kasinungalingan gamit ang assessment criteria indicative of deception o ACID method, kung saan pinaniniwalaan na ang “truthful answers” ay mas mahaba at malinaw kumpara sa kasinungalingan.

Gayunman, binigyang-linaw na hindi sa lahat ng pagkakataon ay ito umano ang basehan para masabing nagsisinungaling ang isang tao. Mahalaga rin umano na kilala natin ang kausap.

2. WALANG DETALYE ANG SAGOT. Madalas umanong umiiwas ang mga sinungaling sa “verifiable details” o ‘yung mga importanteng detalye na maaaring magkumpirma kung nagsasabi siya ng totoo o hindi. Kabilang na rito ang eksaktong oras ng pangyayari, pangalan ng specific location, pangalan ng mga taong na-encounter at maging ang specific words na ginamit nila sa isang pag-uusap.

3. HINDI MALIKOT. Sey ng experts, madalas ay hindi aware ang isang tao kung gaano karaming movements ang kanyang nagagawa. Pero kung ang isang tao ay nagsisinungaling, mas conscious siya sa kanyang galaw at sinusubukang kontrolin ang pagkilos upang maiwasan ang fidgety movements. Gayundin, ‘pag nagsisinungaling, kailangan umano ng konsentrasyon para makaisip ng palusot, at sa ganitong paraan, naiiwasan ang pagiging malikot.

4. HINDI LUMALAYO ANG TINGIN HABANG NAG-IISIP. Naniniwala tayo na hindi kayang makipag-eye contact ng isang taong nagsisinungaling, pero ayon sa mga eksperto, hindi sa lahat ng pagkakataon ay ganito ang nangyayari. Anila, ang mga taong nagsasabi ng totoo ay madalas na malayo ang tingin habang nag-iisip ng sagot dahil paraan ito para makapag-concentrate. Gayunman, ‘pag nagsisinungaling ang isang tao, iniiwasan niyang lumayo ng tingin at nakikipag-eye contact para tingnan ang response ng kanyang kausap at malaman kung nakukumbinsi niya ito o hindi.

5. INUULIT ANG TANONG BAGO SUMAGOT. Marahil ay hindi pa niya alam kung paano sasagutin ang tanong o nag-iisip pa siya ng detalye na isasama sa kanyang palusot. Ayon sa mga eksperto, ang pag-uulit ng tanong ay nakakapagbigay ng oras sa kanila para gumawa ng kapani-paniwalang istorya.

6. SAME EXACT STORY. Kapag pinaulit ang kuwento, ang mga honest na tao ay mayroon umanong “memory enhancement effect” dahil sa additional recall attempt. Ibig sabihin, sa pagre-recall ng istorya, nagkakaroon sila ng dagdag na detalye na hindi nabanggit sa unang kuwento. Pero para sa isang taong nagsisinungaling, naniniwala ito na kailangan niyang maging consistent sa istorya na gusto niyang paniwalaan at ito lang ang palagi niyang ikinukuwento sa kahit kanino.

Sa totoo lang, hindi madaling ma-recognize kung nagsisinungaling ang isang tao, pero makakatulong ang mga espisipikong senyales tulad ng pag-uulit ng istorya upang matukoy kung nagsisinungaling siya o hindi.

Gayunman, tandaan na ang mga nabanggit na senyales ay hindi definitive proof na nagsisinungaling sa iyo ang isang tao.

Mahalaga pa ring mag-fact check upang hindi mag-assume at maiwasan ang misunderstanding.

Gets mo?

Mga dapat gastusan ng 13th month pay at Christmas bonus

ni Jersy L. Sanchez - @Life & Style| December 12, 2022

Nakatanggap na ba ng 13th month pay at Christmas bonus ang lahat? Kung oo, for sure ay nabawasan na ‘yan at naipambili mo ng mga bagong gamit at panregalo.

Ang iba r’yan, nakapag-upgrade na ng cellphone o gadget at kumpleto na ang pamaskong outfit. Pero bago masimot ang laman ng iyong ATM, hindi naman natin sinasabing bawal nang gastusin sa mga materyal na bagay ang natanggap mong 13th month pay at bonus, pero mahalaga ring ilaan ito sa mas makabuluhang bagay.

Kaya naman, anu-ano ang mga bagay na dapat pagkagastusan habang ay 13th month pay at bonus?

1. MAGBAYAD NG UTANG. Kung may existing kang utang, iprayoridad ang pagbabayad nito upang hindi na abutin ng 2023 ang mga natitirang bayarin. Inirerekomenda rin na kung hindi kayang bayaran nang isang bagsakan ang utang, oks din kung uunti-untiin ang pagbabayad nito. Ang importante, mahalagang bagay ang pupuntahan ng iyong 13th month pay at Christmas bonus. Ayaw mo naman sigurong salubungin ang Bagong Taon nang may utang, ‘di ba?

2. MAGNEGOSYO O MAG-INVEST. For sure, minsan ding pumasok sa isip mo na magsimula ng maliit na negosyo, kaya naman ngayong may puhunan ka na, why not gamitin mo ito para matupad ang plano mo? Sabi nga, hindi lamang dapat gastusin ang lahat ng iyong 13th month pay at Christmas bonus dahil puwede mo rin itong paramihin sa pamamagitan ng pagnenegosyo at pag-i-invest.

3. BUMILI NG INSURANCE. Kung may extra money ka pa at wala kang pinagkakautangan, oks ding bumili ng insurance, lalo na kung wala ka pa nito. Ayon sa mga eksperto, magandang paraan ito dahil may mapagkukunan ng pondo kung sakaling may magkasakit o mamatay sa pamilya.

4. EMERGENCY FUND. Dahil importante na may mabubunot kung may emergency, binigyang-diin ng mga eksperto na mahalagang magkaroon muna ng emergency fund bago mag-invest. Inihalimbawa nito ang senaryo na marami tayong kababayan na ipinaprayoridad ang investment kaysa sa emergency fund, kaya ang ending, napipilitang ibenta ang investment para may magastos sa oras ng emergency.

Batid nating hindi lamang tuwing may 13th month pay at Christmas bonus dapat mag-ipon at magpalago ng pera. Kumbaga, dagdag na oportunidad lamang ito para madagdagan ang ating income at savings, kaya kung may matatanggap ka naman ngayong Pasko, why not ilaan ito sa kapaki-pakinabang na bagay, ‘di ba?

Tulad ng nabanggit, hindi natin sinasabing bawal bumili ng mga bagong gamit o panregalo, gayundin ang pag-a-upgrade ng gadget, ipinapaalala lang natin na sa panahon ngayon, kailangan nating maging wais sa paggastos ng pera.

Gets mo?