4 na lugar sa Japan na nasa State of Emergency, extended

ni Ronalyn Seminiano Reonico | March 6, 2021

Extended ang state of emergency sa apat na lugar sa Japan — ang Tokyo, Chiba, Kanagawa at Saitama prefectures hanggang sa March 21 dahil sa COVID-19 pandemic, ayon kay Economy Minister Yasutoshi Nishimura.

Sa ilalim ng state of emergency, ipinag-uutos ng pamahalaan na isara ang mga restaurant at bars pagsapit ng alas-8 nang gabi. Kailangan ding manatili sa kani-kanyang tahanan ang mga residente pagkalipas ng alas-8 PM.

Nakatakdang alisin sa state of emergency ang mga naturang lugar sa March 7 ngunit in-extend ito dahil hindi pa rin bumababa sa target na bilang ang kaso ng COVID-19.

Samantala, sa kabuuan ay nakapagtala ang Japan ng 433,000 kaso ng COVID-19 at 8,050 ang bilang ng mga pumanaw.

Japan, niyanig ng magnitude 7.3 na lindol

ni Ronalyn Seminiano Reonico | February 14, 2021

Niyanig ng magnitude 7.3 na lindol ang eastern coast ng Japan kahapon, Sabado, ngunit wala namang itinaas na tsunami warning, ayon sa awtoridad.

Ayon sa Japan Meteorological Agency, ang epicenter ng lindol ay sa Fukushima prefecture, alas-11:08 PM at may lalim na 60 kilometers (36 miles).

Naiulat din ang power outages sa Tohoku region, eastern Japan.

Ayon naman sa tala ng US Geological Survey, ang naturang lindol ay magnitude 7.0 at may lalim na 54 kilometers.

Samantala, walang naiulat na matinding pinsala ngunit naramdaman din ang malakas na pagyanig sa Tokyo

Bangkay ng ina, itinago ng anak sa freezer

ni Ronalyn Seminiano Reonico | January 30, 2021

Isang bangkay ng babae ang natagpuan sa loob ng freezer ng isang apartment sa Tokyo, Japan ngayong Sabado.

Iniimbestigahan ngayon si Yumi Yoshino, 48-anyos dahil ayon sa pulisya, may duda silang itinago at inabandona ang bangkay sa freezer na nadiskubre ng isang cleaner.

Inamin ni Yoshino na itinago niya ang bangkay ng kanyang nanay sa freezer sa loob ng 10 taon dahil ayaw niyang umalis umano sa naturang apartment, kung saan nakapangalan ito sa ina sa isang municipal housing complex, ayon sa Kyodo News.

Puwersahan nang pinaaalis sa kanyang unit si Yoshino noong kalagitnaan ng Enero matapos siyang hindi makapagbayad ng upa nito.

Tinatayang nasa 60-anyos ang ina ni Yoshino nang ito ay mamatay.

Gayunman, hindi matukoy sa isinagawang autopsy ang eksaktong oras at sanhi ng pagkamatay ng kanyang nanay. Patuloy pa ring nagsasagawa ng imbestigasyon ang awtoridad sa naturang insidente.