Marami na raw bagong singers… MARTIN, TAKOT NANG 'DI MAPUNO ANG CONCERT

ni Janiz Navida @Showbiz Special | May 27, 2024

File photo: Janiz Navida

Well-attended ng mga kapwa singers-celebrities at mga advertisers ang ginanap na trade launch ng A-Team management company ni Ogie Alcasid last Thursday night (May 23) sa CWC Interiors sa BGC, Taguig.

Bukod sa mag-asawang Ogie at Regine Velasquez, dumating din at nag-perform-sumuporta sina Concert King Martin Nievera (kasama ang live-in partner na si Anj del Rosario), Jed Madela, Randy Santiago at T'yang Amy Perez (na nagsilbing hosts sa party), Jhong Hilario at Ryan Bang ng It's Showtime, Lara Maigue, Gian Magdangal, at ang mag-asawang Ara Mina at Dave Almarinez.

Nasa invitation na darating si Vhong Navarro pero hindi namin ito nakita sa dami ng tao sa event.

Masayang inanunsiyo ni Ogie na 21 concerts ang planong i-produce ng A-Team para sa mga kasamahang singers sa entertainment industry. 

Isa nga rito ang collaboration nila ni Martin Nievera para sa upcoming concert nitong The King 4Ever na gaganapin sa September 27 sa Araneta Coliseum.

Nang makapanayam namin si Concert King sa trade launch, aminado siyang excited pa rin siya sa kanyang pagbabalik-Araneta kahit pa sabihing ilang major concerts na ang nagawa niya rito.

Pero this time raw, nagpakatotoo si Martin na may takot siyang nararamdaman kung mapupuno pa rin kaya niya ang Big Dome, knowing na iba na raw ang henerasyon ngayon at mga mas batang singers na ang tinatangkilik tulad na lang ng Ben & Ben na hinahangaan din niya at maging si KZ Tandingan na para kay Martin ay napakagaling na singer-performer at gusto nga raw niyang matuto pa rito dahil sa kakaibang style ni KZ sa pagkanta.

Pero dahil dedicated nga si Martin sa kanyang profession, marami o konti man ang manood sa kanya, 101% performance pa rin ang handa niyang ibigay para mapasaya at ma-entertain ang kanyang audience.

Well, true naman na maraming baguhang mas bata at mas magagaling na singers ngayon, pero we can't deny the fact that Martin Nievera is Martin Nievera, the Concert King!

Ang basehan, sukatan at labanan naman d'yan ay ang longevity at staying power ng isang singer, hindi 'yung dami ng views at followers o kung nag-top ba sa chart ang isa o ilang kanta ng isang performer.

At sa taglay namang karisma ni Martin Nievera, for sure, maging ang young generation ay gusto pa rin siyang mapanood.

---

CARLO J. CAPARAS, PUMANAW SA EDAD NA 80

Photo: Carlo J. Caparas / FB

Nagluluksa na naman ang entertainment industry sa halos magkasunod na pagpanaw ng talent manager na si Leo Dominguez at ng tinaguriang Komiks King na si Direk Carlo J. Caparas.

Unang pumanaw nu'ng Biyernes ang LVD Management Corp. head na humahawak sa career nina Ogie Alcasid, Lovi Poe, Paulo Avelino at Janine Gutierrez, kung saan kahapon (Sunday) ay nagkaroon ng funeral wake sa St. Alphonsus Mary de Liguori, Magallanes, Makati City from 10 AM to 12 MN, with a Mass at 5 PM.

At kahapon din, May 26, 2024, sa Facebook post ng anak nina Direk Carlo at Donna Caparas (na unang pumanaw nu'ng January 17, 2017) na si Peach Caparas, kinumpirma nito ang pagkawala ng ama sa pamamagitan ng pag-aalay ng isang madamdaming tula na pinamagatan niyang Sa Bawat Tipa ng Makinilya.

Nakilala si Direk Carlo bilang Komiks King nang isulat niya ang mga sumikat na nobelang Panday, Pieta, Elias Paniki, Bakekang, Totoy Bato at marami pang iba.

Hindi binanggit ni Peach ang dahilan ng pagkamatay ni Direk Carlo na edad 80 na rin pala ngayon.

Bukod sa pagiging nobelista, naging direktor din ng maraming massacre films si Carlo J. Caparas tulad ng Lipa Massacre, Angela Markado, The Myrna Diones Story, The Maggie Dela Riva Story, The Cory Quirino Kidnap: NBI Files, Antipolo Massacre, The Vizconde Massacre Story, The Lilian Velez Story at marami pang iba.  

Kami po rito sa BULGAR ay taos-pusong nagpapahatid ng aming buong-pusong pakikiramay sa mga kapamilyang iniwan ni Direk Carlo J. Caparas.

Isang mapayapang paglalakbay sa ating Komiks King, Direk Carlo J.!

Pinay vlogger na may million views, Bea… JERALDINE BLACKMAN, UMAMING FINOLLOW NI DOMINIC SA IG, SUPER-KILIG

ni Janiz Navida @Showbiz Special | May 24, 2024

File photo: Dominic Roque / IG - Jeraldine Blackman / FB

Endorser na rin ng Beautederm beauty and skin care products ang sikat na internet sensation-Pinay vlogger na based in Australia na si Jeraldine Blackman.

Kilala ang Beautederm na pag-aari ng super-bait at very generous na CEO na si Ms. Rhea Anicoche-Tan sa pagkakaroon ng mga A-list endorsers tulad ng mag-asawang Marian Rivera at Dingdong Dantes, Piolo Pascual, Sam Milby, Bea Alonzo, Maja Salvador, Enchong Dee, Gabby Concepcion, Lorna Tolentino, Sylvia Sanchez at marami pang iba.

Kaya naman, kinantiyawan si Jeraldine o Ms. Je for short na level-up at artista level na rin siya ngayon dahil kahanay na nga niya ang mga sikat na celebs na endorsers ng Beautederm.

Hindi naman makapaniwala ang Ilokanang vlogger na tubong-Ifugao bago nakapag-asawa ng Australian named Josh Blackman na celebrity at endorser na siya ngayon dahil nag-e-enjoy lang daw siya sa pagba-vlog ng mga ganap sa kanilang pamilya, pero ngayon may nagtiwala na sa kanya para mag-endorse at skin care product pa.

Ayon naman kay Ms. Rei, bukod sa pagkakaroon ng maraming followers ng Blackman family sa social media, ang pagiging sincere at mapagmahal sa family ang nagustuhan niya kay Jeraldine kaya kinuha niyang endorser. 

Pareho raw silang family-oriented at naniniwala siyang malaking tulong si Ms. Je para maipakilala sa mas marami pang Pinoy sa Australia at sa iba't ibang dako ng mundo ang pagiging effective skin care product ng Beautederm.

Kahit kasi hindi tisay at morena lang si Jeraldine, ang lakas ng appeal niya at pang-beauty queen ang datingan. Super-daldal din nito at very convincing kaya tiyak na kapag nag-promote ito ng Beautederm products sa kanyang socmed accounts ay maraming maeengganyo.

In fact, pag-amin nga ni Ms. Rei, nadagdagan agad ng 15K ang mga followers niya nang kunin niya si Jeraldine Blackman as endorser.

Million views nga naman lagi ang mga videos ng Blackman family sa IG at iba pang socmed accounts dahil super-cute ng mga anak nina Jeraldine at Josh na sina Nimo at Jette. 

Four years old pa lang si Jette na kasama ni Ms. Jeraldine sa contract signing niya for Beautederm last Wednesday pero nagbabadya na itong maging future beauty queen, ha?!

Natanong nga namin si Ms. Je kung payag ba sila ng husband niyang mag-artista si Jette kung may kukuha rito ngayon at aniya, although nakakatuwa ang idea na 'yun, kailangan pa rin nilang pag-usapan ng mister dahil gusto nila, kung papasok man si Jette sa showbiz, 'yung sariling desisyon na nito at hindi galing sa kanila.

Pero kung si Jeraldine raw ang kukuning maging TV host, game naman ito lalo't very supportive rin ang kanyang Australian husband.

Samantala, kilig to the bones at abot-tenga ang ngiti ng Pinay vlogger nang amining talagang kinilig siya nang makitang nag-follow sa kanya sa Instagram ang ex-boyfriend (?) ni Bea Alonzo na si Dominic Roque.

Agad-agad, nag-follow back daw siya rito, although ani Jeraldine, alam naman niyang ang anak niyang si Jette ang talagang gustong i-follow ni Dominic.

Guwapung-guwapo si Jeraldine kay Dominic. Pero ang nakakatawa sa Pinay vlogger, nang makita si Ejay Falcon sa launching niya as endorser ng Beautederm — bilang support ng ngayon ay vice-governor na ng Oriental Mindoro kay Ms. Rei Tan — at nang papiliin si Je between Dominic at Ejay, ang mister ni Jana Roxas ang pinili niya, hahaha!

By the way, ang mga bagong produkto ng Beautederm na ine-endorse ni Jeraldine Blackman ay ang Cristaux Retinol Serum, Cristaux Zerum Hydra-Beauty, and Cristaux Vitamin C Serum na available at Shopee, TikTok, Lazada, and Beautéderm stores nationwide. 

Inanunsiyo nga rin pala ng Beautéderm CEO na si Ma'm Rhea Tan ang partnership niya sa Bb. Pilipinas organization.

Meaning, sila na ang official skin care partner ng mga finalists sa Bb. Pilipinas 2024.

Bongga!!!

LEANDRO, FEELING NAKARMA SA GINAWA SA TRANSGENDER NA MAY-ARI NG CLUB

ni Janiz Navida @Showbiz Special | May 5, 2024

File photo: Leandro Baldemor

ON the lighter side naman tayo, mga Ka-BULGAR. 

First time naming na-meet at nakapanayam ang dating Seiko sexy actor na si Leandro Baldemor (kasabayan noon nina Rosanna Roces at Abby Viduya) sa kanyang mismong balaysung sa Paete, Laguna.

Yeeesss, bumiyahe si Ateng Janiz kasama ang aking mga co-editors sa Society of Phil. Entertainment Editors (SPEEd) sa Paete, Laguna para dayuhin si Leandro Baldemor na napili ng aming grupo para gumawa ng aming trophy sa nalalapit na EDDYs Awards sa July 7. 

Impressed kami sa laki ng lupain ni Leandro, ha? Hindi naman super mansiyon ang kanilang balaysung ng misis na si Venus, pero four hectares pala ang lupang ipinamana kay Leandro ng kanyang ama para maging panimula niya noon sa kanyang bubuoing pamilya. Bongga!

Kasama nga sa 4-hectare land na 'yun ang kanyang bahay, malawak na garden na kino-convert niya na ngayon para maging events place, swimming pool, studio para sa kanyang mga obrang sculptures at bukid na tinataniman nila ng palay.

Inilibot kami ni Leandro at dinala sa kanyang studio kung saan ipinakita niya sa amin ang mga samples ng mga una niyang nililok na mostly ay religious items.

Tinanong namin siya kung for sale 'yun pero aniya, kahit gaano kataas na presyo, 'di niya ibebenta ang mga 'yun dahil 'yun ang mga unang masterpieces niya, na in fairness, ang gaganda at sobrang impressive na kaya pala niyang gumawa ng ganu'n.

Kuwento sa amin ni Leandro, nasa pamilya naman nila ang pag-uukit at kinalakihan na niya ang ganitong gawain, although nu'ng bata pa siya, wala sa isip niya na ito rin ang babagsakan niya.

Nag-aaral kasi siya noon ng Nursing at nasa 3rd year college nang ma-discover siya sa isang community service nila ng kanyang manager na si Bobby Yalung. Inalok siyang mag-artista at nu'ng nakita siya ni Robbie Tan ng Seiko Films, kinuha na agad siya at ikinontrata na ikinagulat pa at ayaw paniwalaan ng kanyang mga magulang nu'ng una.

Pero to cut the story short, ayun na nga, napasok na siya ng showbiz at personal na pinili ni Abby Viduya para maging leading man nito sa pelikulang Sariwa.

Nakasama naman niya si Rosanna Roces sa Patikim ng Pinya at 'di makalimutan ni Leandro ang 'kapilyahan' ni Osang nang may gawin sa kanya sa shooting, kaya tawanan na lang kami nang tawanan habang ikinukuwento niya ito.

Pero dumating sa point na medyo humina na ang offers sa showbiz kay Leandro kaya nag-try naman siyang maging hosto sa Japan. 

May nakilala raw siya ru'n na transgender na may-ari ng club na ibinigay ang lahat-lahat sa kanya tulad ng Rolex watch, gold necklace, damit at kung anu-ano pa at aminado siyang tinanggap naman niya ang lahat ng 'yun.

Kaya lang, feeling na-karma nga raw siya at nawala rin ang lahat ng ibinigay sa kanya ng transgender dahil aminado siyang nag-take advantage siya sa kabaitan nito pero hindi naman daw niya naibigay ang 'hinihingi' ng rich gay.

Kaya gusto raw sana niyang mag-sorry dito at hinahanap niya kaso nawalan na raw sila ng contact.

Fast forward uli, bumalik siya ng 'Pinas at dahil 'di na nga siya makabalik sa showbiz, kung anu-anong negosyo na lang ang pinasok niya hanggang sa dumating ang time na may nakilala siyang mga rich clients na nagtiwala sa kanya para magpaukit ng doll.

Malaking pera ang ibinigay sa kanyang downpayment at 'yun ang naging pang-umpisa niya sa kanyang negosyo.

Pero hindi naman daw laging malakas ang ganitong negosyo kaya one time, nag-pray siya kay Lord at agad namang dininig ang kanyang panalangin. 

May mga nakilala siyang pari at nagtiwala sa kanya na magpagawa ng mga images sa simbahan. 

May time pa nga raw na lahat ng imahen sa prusisyon ay ipinaukit sa kanya kasama ang mga karong sinasakyan kaya tuwang-tuwa siya at du'n niya talaga na-appreciate si Lord. 

Sa ngayon, may mga tawid-dagat na ring kliyente si Leandro at ipinagmalaki rin niya sa amin na bukod sa mga lamp post sa mga tulay sa Paete na kanyang ginawa, marami na rin siyang nagawang rebulto, imahen, mga logo sa mga government offices at iba't ibang designs sa mga simbahan.

Pero kahit bread and butter na ni Leandro ang ganitong negosyo, hindi pa rin daw niya maialis sa sistema niya ang pag-arte. Kaya kapag may mga offers na maganda, tinatanggap niya lalo't aminado naman siyang mas malaki ang kita sa showbiz at fulfilling lalo na kapag marami pa rin ang nakakakilala sa kanya bilang artista.

Well, para sa aming mas mahaba pang panayam kay Leandro Baldemor, panoorin n'yo na lang sa BULGAR TV sa YouTube channel ng BULGAR, okidok?!