BINI, NAGPLASTIKAN MUNA BAGO NAGING BFF

ni Janiz Navida @Showbiz Special | Sep. 25, 2024

Crylalu (read: todo-iyak) din kami sa first chapter ng docuseries ng BINI, ang Born To Win na mapapanood na nang libre sa iWantTFC simula sa Setyembre 26 (Huwebes) kung saan tampok ang pagbabalik-tanaw sa kanilang mga pinagdaanang sakripisyo bago matunton ang tinatamasang tagumpay bilang Nation's Girl Group. 

Year 2019 pa pala nagsimulang mabuo ang grupo na mula sa matalinong konsepto ng tatay ng Star Magic na si Direk Laurenti Dyogi. 

Napanood namin ang Born To Win advanced screening last Monday at du’n namin naintindihan kung bakit super-mahal na ng tiket sa BINI concert dahil grabe rin naman palang mga hirap ang pinagdaanan ng 8 girls na binubuo nina Aiah, Colet, Maloi, Gwen, Stacey, Mikha, Jhoanna at Sheena. 

Grabe, nakakabilib ang determinasyon at tatag ng katawan at loob ng mga batang ito para lang maabot ang kanilang pangarap na maging pambato ng ‘Pinas sa global market at makasabay sa kasikatan ng mga K-Pop groups tulad ng Blackpink. 

Sa physical training pa lang na pinagdaanan nila bukod pa sa voice lesson and dance lesson, nakakabilib na dahil maiiyak ka talaga sa hirap, thinking na malayo sila sa kanilang pamilya sa loob ng ilang taon habang nasa training. 

Pero ang nakakatuwa rin, ayon na rin sa BINI members, dahil sa araw-araw na magkakasama sila sa loob ng 5 taon, kung nu’ng nagsisimula pa lang sila ay meron pang plastikan, awayan at laglagan dahil nga magkakaiba sila ng ugali, ngayon ay para na silang pamilya o magkakapatid na nagdadamayan sa anumang laban at pinagdaraanang pagsubok ng bawat isa. 

Ang galing ng naisip ng team ni Direk Lauren na ilabas ang journey to success ng BINI dahil hindi lang ito magbibigay ng inspirasyon sa mga kabataang gustong mag-artista kundi may hatid ding mga aral ng buhay. 

Ipinrodyus katuwang ang ABS-CBN News at Star Magic, iikot ang dokyuserye sa pagsibol ng BINI sa music scene na may hatid ding exclusive footage sa kanilang kauna-unahang major concert na BINIverse.

Dito rin ipapakita ang kanilang mga pinagdaanang hirap para maabot ang kanilang pinapangarap na makagawa ng sarili nilang pangalan sa industriya bilang Nation's Girl Group na nagbigay-buhay sa kanilang hits na Born to Win, Na Na Na, Lagi-Lagi, Pantropiko, at iba pa.

Balikan ang kanilang pakikipagsapalaran bilang Nation's Girl Group sa BINI Chapter 1: Born to Win na mapapanood nang libre at on-demand sa iWantTFC.com at sa official app nito (available sa iOS at Android). Abangan din ang mga susunod nitong episode na malapit ding ipalabas sa iWantTFC.

---

Chloe, bad influence raw talaga… 

LIPS NI CARLOS, OA SA PINK

Burado na pala ang video ng interview ni Toni Gonzaga sa controversial couple na sina Carlos Yulo at Chloe San Jose sa kanyang Toni Talks vlog sa YouTube. 

Hinanap namin ang video para mapanood pero wala na ito. 

Ang nakalagay na lang kung bakit unavailable na ang video ay: “This video contains content from International Olympic Committee who has blocked it on copyright grounds.”

Akala namin, may mga nag-report na netizens na galit na galit sa GFni Carlos kaya ipinatanggal ang video, hindi naman pala. 

Nakakatawa lang ang ibang netizens, pati ang kulay ng lips ni Carlos sa interview ay pinansin, masyado raw pink, at sinisisi na naman ng ilan na impluwensiya raw ito ng dominanteng GF ni Caloy. 

Eh, kasi nga matchy-matchy ang magdyowa sa outfit nila, kaya pati kulay ng lips, dapat it’s a tie! Char! 

---

‘Di bumigay kay Kelvin noon… 

KIRA, UMAMING SI LA ANG NAKAUNA SA KANYA

SHOWING na today, Sept. 25, in Phil. theaters ang first movie team-up nina Kira Balinger at LA Santos, ang Maple Leaf Dreams na kinunan sa Canada mula sa direksiyon ni Direk Benedict Mique at produced ng 7K Entertainment, Lonewolf Films at ABS-CBN’s Star Magic. 

Napanood namin ang romance-drama film sa special screening nito last Friday and we’d say na malakas ang chemistry nina Kira at LA. Ayaw naman nilang amining dahil magdyowa sila in real life kaya gusto na lang naming isiping dahil pareho silang magaling umarte kaya nagampanan nila nang maayos ang kani-kanilang role. 

Ang daming crying scenes sa movie at maraming OFWs at pamilya nila ang tiyak na makaka-relate sa story ng Maple Leaf Dreams. 

Ang ganda rin ng ilang dialogues lalo na sa eksena nina Kira at LA na nagtatalo sila matapos mamatay ang ama ni Molly (Kira) at nagi-guilty siya sa pagpunta niya sa Canada at iniwan ang pamilya sa ‘Pinas, may suntok sa puso at maraming aral na matututunan lalo sa pagmamahal at pagpapahalaga sa pamilya. 

Hindi rin mabibigo ang mga fans na umaasa ng kilig moments kina LA at Kira dahil may kissing scene sila sa Maple Leaf Dreams. 

Tinanong namin si Kira kung bakit kay LA siya pumayag magpa-first kiss sa movie at hindi sa una niyang naging leading man sa Chances Are You and I na si Kelvin Miranda. 

Paliwanag niya, matagal na niyang kilala si LA at komportable siya rito at alam niyang hindi ito magte-take advantage sa kanya kaya why not naman daw. 

Hmmm… ganern ba talaga, Kira? Hehe! Sige na nga!!! 

Well, bukod sa ‘Pinas, ipapalabas din ang Maple Leaf Dreams sa major cities sa Canada sa Sept. 27 tulad sa Toronto, Winnipeg, Calgary, Edmonton at Vancouver. 

So, sa mga Pinoy nating kababayan d’yan, don’t miss the film dahil tiyak na relate much kayo sa buhay nina Molly and Macky played by Kira and LA. 

Kahit may asawa na… LOVI, GAME NA GAME PA RING MAKIPAGTIKIMAN SA IBA

ni Janiz Navida @Showbiz Special | Sep. 23, 2024

In honor of the late Regal Films producer na si Mother Lily Monteverde ang ginanap na Regal Legacy: A Majestic Journey 60 Years and Beyond last Saturday sa Valencia Events Place.

Kasabay nito ang pagbibigay ng P1M donation ng mga anak ni Mother Lily na sina Mr. Dondon Monteverde at Roselle Monteverde kasama ang apo ng Regal Matriarch na si Keith Monteverde (na Executive Producer na rin ngayon ng Regal Films) sa Mowelfund na noon pa man ay tinutulungan na ni Mother.

At ang highlight ng event ay ang announcement ng tatlong upcoming movies ng Regal Entertainment na naaprubahan pa ni Mother Lily bago ito pumanaw.

Ang una ay ang Guilty Pleasure ni Lovi Poe na sexy romance kung saan kasama niya sina JM de Guzman at Jameson Blake. 

Pangalawa ang My Future You ng young love team na sina Francine Diaz at Seth Fedelin na siyempre pa ay romance fantasy at bale launching movie ng FranSeth na sinasabi ngang bagong KathNiel.

At pangatlo ang horror film na pinagbibidahan ni Ms. Jodi Santamaria titled Untold kung saan first time niya itong gumawa sa Regal kaya sobrang happy daw niya dahil fan din siya ng SRR (Shake, Rattle and Roll) nu'ng bata pa siya.

Napanood namin ang trailer ng tatlong movies at masasabi naming tatak-Regal pa rin ito bagama't tila may bagong flavor na ring hatid sa manonood.

Mapapa-“Ohhh, my ghad!!!” ka na lang kay Lovi Poe sa mga sexy at super hot scenes niya with JM de Guzman sa Guilty Pleasure.

Parang walang restrictions ang aktres mula sa mister na filmmaker na si Monty Blencowe dahil sa pagiging game na game ni Lovi sa mga eksena nila ni JM.

Sayang at ‘di namin nahingi ang reaksiyon ni Lovi sa sizzling scenes nila ni JM.

Sabagay, siya rin kasi ang co-producer ng pelikula kaya baka itinodo na niya.

---

Kahit puwedeng-puwede pa…

JODI, ‘DI NA FEEL MAGKAANAK ULI

Ang cute naman ng chemistry nina Seth and Francine at mapi-feel mo nga ang galawang KathNiel sa kanila pero ayon sa dalawa, FranSeth sila at ‘di KathNiel. 

Oo nga naman, hayaan nating may mapatunayan sila sa sarili nilang paraan.

Nakaka-goosebumps din ‘yung Untold horror movie ni Jodi na sayang nga lang at ‘di namin naitanong kung mas takot ba siya sa sarili niya (tagline ng movie) o sa ex ng rumored BF niyang si Raymart Santiago na si Claudine Barretto, char!

Eh, kasi nga, parang ‘di feel pag-usapan ni Jodi ang personal life niya lalo na ang love life niya.

Nu'ng ipinatanong nga namin kay MJ Marfori ng TV5 kung hindi ba naghahanap ng kapatid si Thirdy, malakas na tawa at “Paano?” lang ang isinagot ni Jodi.

Naku, paano nga ba, Raymart? Char! Hahaha!

Sexual abuse sa showbiz… "MATAGAL KO NANG ALAM 'YAN" — JINGGOY

ni Janiz Navida @Showbiz Special | August 24, 2024

Photo: Sen. Jinggoy Estrada / FB

Nag-issue na ng statement si Sen. Jinggoy Estrada bilang paglilinaw sa naging pag-handle niya last time sa rape issue ni Sandro Muhlach na dinidinig sa Senado.

Kung matatandaan, nairita at nagbanta pang magwo-walkout si Sen. Jinggoy habang ginaganap ang hearing sa Senado nang tumangging idetalye ng panganay na anak ni Niño Muhlach na si Sandro ang naganap na panggagahasa diumano sa kanya ng dalawang GMA-7 independent contractors na sina Jojo Nones at Dode Cruz nu'ng July 21, 2024.

Ayon sa written statement na binasa ni Sen. Jinggoy, "I understand that my recent questionings in the Senate hearing gave the public impression of me being harsh, insensitive and apathetic.

"It was never, never my intention to victim blame or humiliate those who have come out to disclose the tragic realities happening in the movie industry or the entertainment industry, but rather to address a systemic issue that has been hurting our artists and workers."

Dagdag pa ng senador, "My passionate approach which did not sit well to the public monitoring the proceedings stems from a deep frustration that these problems have persisted for years.

"Parte po ako ng industriyang ito kaya alam ko na matagal na po itong nangyayari, at patuloy na nangyayari. Pero takot lumantad ang mga biktima, nahihiyang magsalita. Ang mga isyung ito ay pabulong lamang na pinag-uusapan."

Ipinagdiinan din ni Sen. Jinggoy na hindi raw niya binabalewala ang rape issue at iba pang related concerns.

"Wala po akong intensiyon na balewalain ang nararamdaman ng mga biktima ng pang-aabuso, sexual abuse, or sexual harassment. Walang-wala po.

"Ngunit bilang parte ng industriyang ito, hindi ko kukunsintihin ang ginawa ng sinasabing may otoridad o kapangyarihan sa industriya.

"In fact, I condemn all forms of violence regardless of gender, particularly in this industry where abuses — katulad ng sinasabi ko — have been ongoing for so long."

Ngunit taliwas sa inaasahan ng senador na maipaliwanag ang kanyang panig, lalong inulan ng pamba-bash si Sen. Jinggoy dahil sa tahasan niyang pag-amin na matagal na pala niyang alam na may nagaganap na pang-aabuso sa entertainment industry, pero bakit wala raw siyang ginawa at kung 'di pa nagsalita ang isang Sandro Muhlach, hindi pa pala mabubuksan ang malaking isyung ito sa Senado.

Ilan lang sa mga comments ng mga netizens…

“Matagal nang nangyayari…”"Sa tagal mo sa Senado, wala kang ginawa para matigil ang pang-aabuso sa mga kapwa mong nasa entertainment industry?!"

"Passionate your ahh lol! Matagal mo na pala alam, wala ka initiative to address it given the govt. position that you held."

Pang-aasar naman ng iba pang netizens kay Sen. Jinggoy, "Char char ka. Dapat talaga may totoong Law knowledge, eh."

"Really? Your are a huge joke sa Senate."

"Bakit ba nandiyan pa 'yan sa Senado? What a clown and waste of taxpayer's money."

Ang witty naman ng isang netizen sa comment nitong "Naku, Jinggoy, 'yung sinseridad mo, parang leeg mo… 'di ko makita!"

Mapapa-"Nyahahahaha!" ka na lang talaga!

---

HLA MOVIE NINA ALDEN AT KATHRYN SA CANADA, INUNAHAN NINA LA AT KIRA 

Photo: Circulations & 7k Sounds / FB

Natawa rin kami nang malakas kasama ng ilang press friends sa intimate interview namin sa isa sa most in demand directors ngayon na si Direk Benedict Mique nang magbiro ito ng "'Di ko naman pinapunta sa kuwarto ko!" bilang sagot nang biruin din namin siya ng tanong na mabuti at hindi siya ipinatawag sa Senado matapos ang controversial na 'dirty finger' scene ng batang si Euwenn Mikael Aleta sa Netflix movie na Lolo and the Kid.

Naging usap-usapan pala ang naturang eksena sa social media dahil ang feeling ng iba, hindi good influence sa manonood at hindi dapat ginawa 'yun ng isang bata.

Paliwanag naman ni Direk Benedict, parte 'yun ng istorya at kailangan talagang gawin ni Euwenn ang eksena kung saan kinorek naman siya agad ng gumanap na lolo niyang si Joel Torre dahil paano raw maitatama ang pagkakamali ng bata kung hindi nito ginawa.

So, may point naman.

Haping-happy ang direktor ng Lolo and the Kid dahil sa loob ng ilang linggo, hindi nawawala sa Top 10 ang pelikulang pinagbidahan nina Joel Torre, Euwenn Mikael Aleta at JK Labajo.

Maging sa ibang bansa ay trending ang Lolo and the Kid.

Kaya sabi nga ni Direk Benedict, tamang-tama naman ang pagdating sa kanya ng follow-up movie niya na kasali naman sa Sinag Maynila Festival, ang Maple Leaf Dreams, na pagbibidahan ng bagong tandem nina Kira Balinger at LA Santos.

Ipinapanood na rin sa amin ni Direk Benedict ang trailer ng movie na kinunan sa Canada kung saan gumaganap na OFWs sina Kira at LA, at sabi nga namin, may chemistry naman pala ang dalawa kaya hindi mahirap ibenta ang pelikula.

Tinanong namin si Direk Benedict kung ano'ng masasabi niya na parang ipe-preempt nito ang Hello, Love, Again nina Kathryn Bernardo at Alden Richards na kinunan din sa Canada, at ang sagot ng direktor, nauna talaga sila dahil last year pa ginawa ang movie na ipapalabas na sa Sept. 25 sa mga sinehan.

'Wag daw sanang isipin ng iba ang kompetisyon kundi suportahan ang parehong pelikula na magkaiba naman ang mga bida at ang istorya.

Hmmm… ganu'n din kaya ang maging thinking ng mga Kathryn at Alden fans? Tingnan natin, hehe!