'Di na raw takot ma-bash… PIOLO, JOIN NA RIN SA MGA KAKAMPINK

ni Janiz Navida - @Showbiz Special | May 6, 2022

Hindi lang si Jodi Santamaria ang lantaran na ngayon sa pagsuporta at pangangampanya sa mga kandidatong bet niya para sa 2022 elections. Maging ang Ultimate Crush ng Bayan na si Piolo Pascual na dating tahimik lang at hindi nakikigulo sa pulitika, nakakagulat na ngayon ay very vocal na rin sa kanyang pagiging Kakampink.

Aminado si Piolo na kapag nahaharap sa isyu o intriga, mas pinipili niyang manahimik kesa direkta itong sagutin.

“Bilang artista, sanay na akong pukpukin ng kung anu-anong issue. May mga pagkakataon na kailangang i-address ang isang bagay pero mas madalas, pinipili kong tumahimik,” wika ni Piolo sa isang video kung saan inulit niya ang suporta kay Vice-President Leni Robredo bilang susunod na pangulo ng bansa.

Ganito rin ang trato ni Piolo sa mga isyung pulitika, kung saan mas gusto pa niyang tahimik na magmatyag kaysa maglabas ng saloobin sa takot na baka mabatikos.

“Naisip ko, masyado nang magulo ang mundo para makidagdag pa sa samu't saring ingay. At hindi ko rin alam kung nararapat ba akong pakinggan. Hindi naman ako eksperto sa pulitika,” paliwanag niya.

Ngunit ngayong nakataya ang kinabukasan ng bansa sa Mayo 9, sinabi ni Piolo na hindi na siya dapat manahimik.

“Ang pananahimik sa ganitong panahon ay pagkampi sa mga puwersang nagpapahirap sa maraming Pilipino. Sa mga nakaraang araw, palakas nang palakas ang sigaw. Hindi na ito kayang isawalang-bahala ng bawat Pilipinong nagmamahal sa bayan,” ani Pascual.

“Bulong na ngayo'y isang malakas na ring sigaw, si Leni Robredo ang pangulo ko. Abogada, ekonomista, tapat, at walang bahid ng corruption,” dagdag pa niya.

Para matiyak na tama ang kanyang desisyong suportahan si VP Leni, sinabi ni Piolo na siya’y nagsaliksik, nakinig sa ibang tao at binuksan ang isip bago naghayag ng suporta sa bise-presidente.

Gaya ng ibang volunteers, sinabi ni Piolo na tumugon siya sa panawagan ni VP Leni na tumayo at ipaglaban ang bansa at kapakanan ng taumbayan, lalo na iyong mga nangangailangan.

Todo-hingi ng boto para kay Pacquiao, pero…SASABIHIN NG MADLANG PIPOL, BAWAL SA IG NI JINKEE

ni Janiz Navida - @Showbiz Special | May 2, 2022

Maraming bilib at natutuwa kay Jinkee Pacquiao sa pagiging very supportive wife sa presidentiable hubby niyang si Sen. Manny Pacquiao.

Kesehodang nakakapagod at nakakaubos ng energy ang pag-iikot sa iba’t ibang parte ng ‘Pinas maka-reach out lang sila sa mga botante at mahingi ang tiwala ng mga ito para iboto si Sen. Manny sa pagka-pangulo sa 2022 elections ay walang reklamo si Mrs. Pacquiao at game na game talaga!

At maging sa kanyang Instagram account ay ang sipag-sipag ni Jinkee, post ito nang post ng mga happenings kung saan sila nagpunta ng mister at kung gaano kainit ang pagtanggap sa kanila ng mga tao sa kanilang mga pinupuntahan.

Pero ang siste at napansin lang ng mga netizens, bakit restricted pa rin daw ang IG account ni Mrs. Pacquiao?

Mapapansin ang “Comments on this post have been limited” sa ibabang bahagi ng bawat post ni Jinkee.

Tuloy, kahit gustung-gustong magpaabot ng mga netizens at supporters nila ng suporta at words of encouragement para sa pagtakbo ng mister ni Jinkee, du’n na lang nila idinadaan sa IG account ni Sen. Manny.

At least nga naman du’n, may freedom silang sabihin lahat ng nasasaloob nila, good or bad.

Well, ang basa namin sa move na ‘yan ni Jinkee ay para magkaroon siya ng peace of mind at hindi ma-bash nang bonggang-bongga.

Mahirap nga namang instead ang focus na lang nila ay sa eleksiyon, eh, mai-stress pa si Madam Jinkee sa dami ng toxic comments na puwedeng ibato sa kanila sa social media.

Devah naman?!!!

Nagmadaling tumakbong pangulo… MADLANG PIPOL KAY ISKO: SOBRANG AMBISYOSO KA, SAKIM AT HAMBOG!

ni Janiz Navida - @Showbiz Special | May 1, 2022

Binigyan na naman ng rason ni Manila Mayor Isko Moreno ang mga bashers niya para banat-banatan siya.

Umani na naman ng mga negatibong komento ang latest tweet kahapon (April 30) ng presidentiable kung saan ganito ang laman ng kanyang ipinost sa Twitter...

"Hindi ko po kayang matulog sa gabi at magbingi-bingihan na lamang sa kumakalam na hinaing ng ating mga kababayan sa iba't ibang panig ng bansa na naghihikahos sa buhay. Tumakbo po ako para solusyunan ang mga problema ng bansa, hindi para maghiganti at may bawiin. #IbaNaman"

Kasabay ng Twitter post na 'yun ang isang art card kung saan mababasa ang sinabi ni Mayor Isko na, "Kung pansarili lang ang iisipin ko, eh, di sana tumakbo na lang ulit akong mayor ng Maynila. Pinili ko po ang tao kaysa kapanatagan ko sa posisyon."

Komento ng mga netizens sa kanyang Twitter post…

"Wehhh talaga?! Alam na tunay na kulay mo, Yorme, 'wag mong gawing bobo ang mga tao!"

"Eh, di sana, ibinigay mo 'yung P50 M... laking tulong sa kanila 'yun. Plastik!"

"'Di ka pa tapos sa Maynila, Yorme. Naiangat mo na ba ang buhay ng mga mahihirap? Kadumi pa kaya ng Maynila. Daming pulubi. Daming natutulog sa daan. 'Wag ka nga."

May naalala naman ang isang netizen, "Ask ko lang po… hindi po ba, isa kayo sa nagsabing bayaran ng mga Marcoses 'yung P203 B na estate tax? So, hindi n'yo na po babawiin?"

Mukhang G na G (gigil na gigil) naman ang isang netizen at personal na ang comment kay Yorme na, "Ipasok na 'yan sa Mental."

Samantala, pambabara ng isa pa sa katwiran ni Mayor Isko na mas pinili niyang tumakbong pangulo kesa mag-mayor ay para sa taumbayan, "No. It's because you are so ambitious and greedy. That's the real reason, and everyone knows it, including yourself."

Habol pang komento ng isang netizen, "There is something in Isko that no matter how hard he tried to convince the Pinoys to vote for him, still Pinoys snob Isko, bawasan kasi ang yabang! 'Yung gigil ambisyon maging presidente is an overkill! #NoToIsko"

Awww!!!

May kasabihan, less talk, less mistake. 'Yun na!

---

Kasunod ng pagkakatanggal kay Migz Zubiri sa opisyal na senatorial slate ng Robredo-Pangilinan tandem, nananawagan ang mga tagasuporta ng tambalang Leni-Kiko sa Twitter at iba pang social media channels na ipalit si Monsour Del Rosario sa nabakanteng ika-12 puwesto.

Si Del Rosario ay miyembro ng Partido Reporma, ngunit kamakailan ay napukaw niya ang atensiyon ng mga tagasuporta nina Leni at Kiko nang lantaran niyang ihayag ang pagsuporta kay Robredo. Ito ay matapos magbitiw ni Ping Lacson bilang chairman at presidential candidate ng Reporma.

Mula noon, si Del Rosario ay napabilang na rin sa grupong 1Sambayan na ngayon ay may kabuuang 11 kandidato, 8 dito ay kabilang din sa opisyal na Tropang Angat slate.

Dating atleta at aktor si Monsour bago napasok sa pulitika at nagsilbi ng 9 na taon bilang konsehal ng District 1 ng Makati sa loob ng dalawang termino.

Naging kongresista rin siya mula 2016 hanggang 2019 kaya kung tutuusin, malaki na rin ang karanasan niya sa public service at nakagawa na ng maraming batas.

“Nagpapasalamat ako sa mga netizens at supporters nina VP Robredo at Sen. Pangilinan sa kanilang pagtitiwala sa akin pero ang Leni-Kiko team lang ang makakapagdesisyon kung gusto nila akong isama sa kanilang official slate o hindi.

"Sa huli, ang mga botante ang magdedesisyon kung sino ang gusto nilang maging susunod na senador. Kaya naman narito rin ang ating 1Sambayan slate para mag-alok ng mga alternatibo. Kung pipiliin ng mga tao na iboto ako, lubos akong magpapasalamat at susuklian ko ang kanilang mga boto ng 101% na tunay na serbisyo, tulad ng ginawa ko noong nasa Kongreso ako,” wika ni Del Rosario.

Samantala, patuloy ang pagdalo ni Monsour sa mga Leni-Kiko rally kung saan kapansin-pansin ang karisma at hatak niya sa mga tao.

“Nakakagaan ng loob na makita ang mga tao na nagkakaisa para sa layuning mapabuti ang ating bansa. Tingin ko, ang pagkakasama ko sa 1Sambayan ay hindi lang nagkataon.

Pakiramdam ko, nakatadhana ako dito dahil ang layunin ko sa pagtakbo bilang senador ay lubos na naaayon sa layunin ng mga taong sumusuporta sa 1Sambayan at sa Leni-Kiko tandem.

"Lahat tayo ay may iisang hangarin na iangat ang buhay ng bawat Pilipino sa pamamagitan ng isang mapagkakatiwalaang pamahalaan na nakatuon sa tunay na serbisyo publiko,” dagdag pa ni Del Rosario.