Saudi Arabia, itinigil ang kasunduan sa US dahil sa isyu sa Israel

ni Angela Fernando @World News | Nov. 30, 2024

Photo: Prince Mohammed bin Salman at si Israel Prime Minister Benjamin Netanyahu - FB, circulated

Itinigil na ng Saudi Arabia ang pagnanais nito para sa isang malawakang kasunduan sa depensa kasama ang United States (U.S.) kapalit ng normalisasyon ng relasyon sa Israel.

Sa kasalukuyan, inihihirit na nito ang mas simpleng kasunduan sa kooperasyong militar, ayon sa dalawang opisyal ng Saudi at apat na opisyal mula sa West na nakausap ng Reuters.

Magugunitang nu'ng unang bahagi ng taon, bilang bahagi ng pagsisikap na makamit ang malawakang kasunduan sa seguridad, nagpakita ang Riyadh ng paghina sa posisyon nito ukol sa pagtatatag ng estado ng Palestine.

Binigyang-diin nito sa Washington na maaaring sapat na ang isang pampublikong pangako mula sa Israel para sa solusyon sa dalawang estado upang ma-normalisa ang relasyon para sa Gulf kingdom.

Ngunit dahil sa matinding galit ng publiko sa Saudi Arabia at sa mas malawak na rehiyon ng Middle East laban sa mga aksyong militar ng Israel sa Gaza, muling iginigiit ni Crown Prince Mohammed bin Salman na ang pagkilala sa Israel ay magiging kondisyonal lamang kung gagawa ito ng konkretong hakbang para sa pagbuo ng isang estado ng Palestine.

Samantala, patuloy na nagnanais ang Israel Prime Minister na si Benjamin Netanyahu na makamit ang normalisasyon ng relasyon sa Saudi Arabia bilang isang makasaysayang tagumpay at patunay ng mas malawak na pagtanggap ng kanilang nasasakupan sa mundo ng mga Arabo.

Israel at Hezbollah, nagturuan kung sino ang lumabag sa kasunduan sa tigil-putukan

ni Angela Fernando @Overseas News | Nov. 29, 2024

Photo: Beirut's southern suburbs - Israel-Hezbollah war - Fadel Itani / AFP

Nagpahayag ang militar ng Israel na inatake ng kanilang air force ang isang pasilidad ng Hezbollah na ginagamit para mag-imbak ng mid-range rockets sa katimugang Lebanon kamakailan, matapos magpalitan ng paratang ang dalawang panig kaugnay ng paglabag sa tigil-putukan na layong tapusin ang mahigit isang taon ng labanan.

Ayon sa Israel, nagpaputok din sila nu'ng Huwebes sa direksyon ng kanilang tinatawag na mga suspek na dumating sakay ng mga sasakyan sa ilang lugar sa katimugang bahagi ng rehiyon.

Tinawag nila ang mga itong paglabag sa kasunduan sa tigil-putukan sa armadong grupong Hezbollah na suportado ng Iran, na nagsimula nu'ng Miyerkules.

Samantala, inakusahan ni Hezbollah lawmaker Hassan Fadlallah ang Israel ng paglabag sa kasunduan—naglabas din ng pahayag ang Lebanese army, na nagsabing ilang beses nilabag ng Israel ang mga nasabing kasunduan.

Ang palitan ng mga paratang ay nagpakita ng kahinaan ng kasunduan, na itinaguyod ng United States (US) at France upang wakasan ang labanan na kasabay pa ng giyera sa Gaza.

Magugunitang ang bisa ng tigil-putukan ay nasa loob lang ng 60 araw, na bahagi ng layuning makamit ang tuluyang pagtigil ng mga palitan ng pag-atake.

Israel at Hezbollah, nagkasundo sa tigil-putukan sa tulong ng US at France

ni Angela Fernando @World News | Nov. 27, 2024

Sa larawang ito sa Tel Aviv, ay makikita sina US President Joe Biden (kaliwa) at Prime Minister Benjamin Netanyahu. (October 18, 2023) File Photo: Haim Zach / GPO

Magkakabisa ngayong Miyerkules ang tigil-putukan sa pagitan ng Israel at ng Iran-backed Hezbollah matapos tanggapin ng magkabilang panig ang kasunduan na binuo ng United States (US) at France, ayon kay Pangulong Joe Biden.

Naglalayon ang kasunduang ito na tapusin ang labanan sa pagitan ng Israel at Lebanon na kumitil ng libu-libong buhay simula nang pumutok ang Gaza war nu'ng nakaraang taon.

Ipinaalam ni Biden na nagbigay ng pag-apruba ang security cabinet ng Israel sa kasunduan sa botong 10-1.

"This is designed to be a permanent cessation of hostilities," saad ni Biden.

Samantala, sa kanyang pahayag mula sa White House, sinabi niyang nakipag-usap siya kay Punong Ministro Benjamin Netanyahu ng Israel at pansamantalang Prime Minister Najib Mikati ng Lebanon.

Nakatakdang magwakas ang labanan sa ganap na alas-4 ng umaga (0200 GMT).